შალვა პაპუაშვილი მარტა კოსის განცხადებაზე: ევროკავშირის ერთ-ერთი კომისარი უკრძალავს კანდიდატ ქვეყნებს ამერიკის შეერთებული შტატების ადმინისტრაციასთან ურთიერთობას. სასაცილოა უკვე - იმდენად არაკვალიფიციურია ევროკავშირის საგარეო პოლიტიკა, მათ შორის, გაფართოების მიმართულებით, რომ ჩვენ უკვე სერიოზულად ვეღარ ვუყურებთ იმ განცხადებებს, რომლებიც ამ მიმართულებით გვესმის

ევროკავშირის ერთ-ერთი კომისარი უკრძალავს კანდიდატ ქვეყნებს ამერიკის შეერთებული შტატების ადმინისტრაციასთან ურთიერთობას. სასაცილოა უკვე. როდესაც [ევროკავშირის] წევრებიც არ არიან, არიან კანდიდატები და სუვერენული ქვეყნები, ცდილობენ მათ საგარეო პოლიტიკასა და საგარეო ურთიერთობებთან დაკავშირებით პირდაპირ ულტიმატუმები დაუყენონ. ჯერ იყო ჩინეთი, ახლა ჩინეთს მიაყოლეს ამერიკის შეერთებული შტატები, - განაცხადა საქართველოს პარლამენტის თავმჯდომარემ მედიასთან.

შალვა პაპუაშვილმა ასე შეაფასა გაფართოების საკითხებში ევროკომისრის მარტა კოსის განცხადება, რომ ევროკავშირის კანდიდატმა ქვეყნებმა აშშ-ის პრეზიდენტის დონალდ ტრამპის მოძრაობა MAGA-სთან კავშირები უნდა გაწყვიტონ.

მან ევროკავშირის საგარეო პოლიტიკას არაკვალიფიციური უწოდა.

„იმდენად არაკვალიფიციურია ევროკავშირის საგარეო პოლიტიკა, მათ შორის, გაფართოების მიმართულებით, რომ ჩვენ უკვე სერიოზულად ვეღარ ვუყურებთ იმ განცხადებებს, რომლებიც ამ მიმართულებით გვესმის. როდესაც ამას საჯაროდ იტყვის გაფართოების კომისარი, რომ ამერიკის შეერთებული შტატების ადმინისტრაციასთან არ უნდა ჰქონდეთ ურთიერთობა და „მაგა“ სხვა არაფერია, თუ არა ტრამპის პოლიტიკური და მისი ფილოსოფიის მთავარი საყრდენი, როგორ შეიძლება ამის შემდეგ რამე სერიოზულად გავიგოთ?!“, - განაცხადა შალვა პაპუაშვილმა.

ამასთან, პარლამენტის თავმჯდომარის შეფასებით, კოსის განცხადებას კიდევ ერთი კონტექსტი აქვს და ეს სერბეთის არჩევნებში ჩარევის მცდელობაა.

„ამას აქვს მეორე კონტექსტიც, რომელიც უნდა გავითვალისწინოთ. ეს განცხადება გაკეთდა განსაკუთრებით სერბეთის გასაგონად. სადაც მალე იმართება კონფერენცია, რომელიც მათ შორის ამ მოძრაობის მონაწილეობით იქნება და სერბეთში ოქტომბერში დანიშნულია არჩევნები. ეს სიგნალიც არის მათ შორის არჩევნებში ჩარევის ერთ-ერთი მცდელობა. მანამდე, სულ ახლახან იყო განცხადებები სერბეთში ერთ-ერთი სერბის გარდაცვალებასთან დაკავშირებით, რომელიც სასჯელს იხდიდა მათ შორის სერბეთში 1990-იან წლებში მომხდარი სხვადასხვა დანაშაულისთვის, მაგრამ [ბრიუსელში] არ მოეწონათ, რომ სერბეთში საზოგადოებაში გარკვეულ ჯგუფებს ჰქონდათ პოზიტიური დამოკიდებულება, ამას პირდაპირ მოაყოლეს ულტიმატუმები.

ეს ყველაფერი არის მცდელობა, რომ ჩაერიონ სერბეთის არჩევნებში და ამიტომ საბაბებს ეძებენ, ხან ეს იქნება, ყოფილი ჩინოვნიკის დასაფლავების ცერემონიამ ასე ჩაიარა თუ ისე, ახლა არის „მაგა“-სთან ურთიერთობა ექნებათ თუ არა და კონფერენციას ჩაატარებენ თუ არა, ეს არის პირდაპირ ჩარევა კანდიდატი ქვეყნის არჩევნებში. დარწმუნებული ვარ, ამას კიდევ მოჰყვება სხვა [თემები], დავაკვირდეთ და დავინახავთ კარგად ბრიუსელის ჩარევის მცდელობებს სერბეთის არჩევნებში ისევე, როგორც ამ მცდელობებს ჰქონდა ადგილი საქართველოს არჩევნებთან დაკავშირებით.

ეს თავისთავად აჩვენებს ერთ რამეს - ის, რაზეც საუბრობენ ევროპულ ღირებულებებთან დაკავშირებით და თუკი რაიმე არის ევროპული ღირებულება, არის სხვა ქვეყნის სუვერენიტეტისა და ხალხის სუვერენული არჩევანის პატივისცემა, ამას პირდაპირ თელავს დღევანდელი ბრიუსელი იმით, რომ პირდაპირ ერევა არჩევნებში. 2024 წლის არჩევნები ამის ყველაზე კარგი მაგალითია, სადაც უხეშად, თავად რომ უყვართ ხოლმე თქმა, რუსული მეთოდებიო, ზუსტად ასეთი მეთოდებით ჩაერივნენ საქართველოს არჩევნებში. მას შემდეგ ვხედავთ არა მხოლოდ კანდიდატი, არამედ წევრი ქვეყნების არჩევნებში ჩარევას და არჩევნების შედეგების გაუქმების იძულებას სხვადასხვა ქვეყანაში“, - განაცხადა შალვა პაპუაშვილმა.

როგორც ცნობილია, გაფართოების საკითხებში ევროკომისარმა მარტა კოსმა განაცხადა, რომ ევროკავშირის კანდიდატმა ქვეყნებმა აშშ-ის პრეზიდენტის დონალდ ტრამპის მოძრაობა MAGA-სთან კავშირები უნდა გაწყვიტონ, რათა ევროკავშირში გაწევრიანდნენ.