თავისუფალი საქართველო მიწათსარგებლობის გენგეგმის შეფასების პროცესში ერთვება

„თავისუფალი საქართველო“ მიწათსარგებლობის გენერალური გეგმის შეფასების პროცესში ჩაერთვება. პარტიის თავმჯდომარის მოადგილე თენგო ომანიძე იმედოვნებს, რომ თბილისის მერის კახა კალაძის განცხადება, რომელმაც ოპოზიციას შესთავაზა მიწათსარგებლობის გენერალური გეგმის შეფასების პროცესში მონაწილეობა, რეალური ინიციატივაა და ოპოზიციის ჩართვა და მათი აზრის გათვალისწინება  ნამდვილად მოხდება.

"ქალაქის გენერალურ გეგმას უკავშირდება თბილისელების მრავალი მნიშვნელოვანი პრობლემა, მათ შორის: საცობები, ეკოლოგია, განაშენიანება. სამწუხაროდ, 1992 წლის შემდეგ, არ მოიძებნა ხელისუფლება, რომელიც თბილისის გენერალურ გეგმას სწორედ თბილისელების და არა მსხვილი დეველოპერების ინტერესების გათვალისწინებით შეადგენდა. შესაბამისად „თავისუფალი საქართველო“ მზადაა, მონაწილეობა მიიღოს ამ პროცესში. იმედს გამოვთქვამთ, რომ თბილისის მერის განცხადება წარმოადგენს რეალურ ინიციატივას და არ არის გათვლილი მხოლოდ პიარზე“, - განაცხადა ომანიძემ.  

26 იანვარს დედაქალაქის მერმა ოპოზიციას მიწათსარგებლობის გენერალური გეგმის შეფასების პროცესში მონაწილეობა შესთავაზა.

25 დეკემბერს თბილისის მერიამ გენგეგმის ჯგუფი 145 600 ლარით დააჯარიმა და ხარვეზების გამოსასწორებლად 10-დღიანი ვადა მისცა. თბილისის მიწათსარგებლობის გენერალურ გეგმაზე მუშაობა 2015 წელს დაიწყო. კომპანია „სითი ინსტიტუტი საქართველო“ მერიის ყოფილმა ხელმძღვანელობამ კონკურსის წესით შეარჩია და ქალაქის მთავარი დოკუმენტის შესაქმნელად 2 800 000 ლარი გამოყო.

თბილისის განვითარების გენერალური გეგმის პროექტი, რომელიც 2030 წლამდეა გაწერილი, მერიას 18 ივნისს ჩაბარდა. მისი შემქმნელების თქმით, ეს დოკუმენტის სამუშაო ვერსიაა და მნიშვნელოვანია პროცესში მოქალაქეთა ჩართვა. თბილისის ახალარჩეული მერმა უკვე დასრულებული გენგეგმა თავიდან შესასწავლად სპეციალურ ჯგუფს გადასცა.