ქართული ოცნების დეპუტატი NDI-ს ხელმძღვანელისგან ბოდიშის მოხდას ითხოვს

ქართული ოცნების დეპუტატი ლორა თორნტონის განცხადებას პასუხობს და მოუწოდებს მას მოიხადოს ბოდიში იმ განცხადებისთვის, რომელიც "მტრის წისქვილზე ასხავს წყალს." ამის შესახებ განცხადება ირაკლი მეზურნიშვილმა პრესკონფერენციაზე გააკეთა.

"მინდა გამოვეხმაურო რამდენიმე დღის წინ NDI-ის საქართველოს ოფისის ხელმძღვანელის, ქალბატონ ლორა თორნტონის მიერ გაკეთებულ საჯარო კომენტარს, რომლის თანახმადაც აშშ-ის პრეზიდენტი რუკაზეც კი ვერ მოძებნის საქართველოს. მისი ეს განცხადება „მტკიცებაა“, რომ ჩვენი ქვეყნის მთავარი სტრატეგიული პარტნიორი, ამერიკის შეერთებული შტატები, რომელიც მჭიდროდ თანამშრომლობს ჩვენს ქვეყანასთან, განუხრელად მხარს უჭერს საქართველოს ტერიტორიულ მთლიანობას, მისი საზღვრების ურღვეობას, მტკიცედ გმობს ჩვენი ქვეყნის ოკუპაციას და არც კი იცის სად არის ეს საზღვრები!? სამწუხაროდ, ეს ირონიული კომენტარი, ხელს უწყობს იმ აზრის დამკვიდრებას, რომ საქართველო იმდენად მცირე და უმნიშვნელო ქვეყანაა დასავლეთისთვის, რომ მისი მოძებნა რუკაზედაც კი შეუძლებელია. ასეთი უპასუხისმგებლო განცხადება განსაკუთრებით შეურაცხმყოფელია როგორც საქართველოსთვის, ასევე ამერიკის შეერთებული შტატებისთვის, განსაკუთრებით ისეთი ავტორიტეტული ორგანიზაციის ხელმძღვანელისგან, როგორიც NDI არის. შევახსენებ, რომ NDI ჩვენი ქვეყნის მიმართ ურყევ მხარდაჭერას გამოხატავს ბოლო 25 წლის განმავლობაში,"- აღნიშნა მეზურნიშვილმა.

ქართული ოცნების დეპუტატის თქმით, საქართველოსთვის მნიშვნელოვანია NDI -ს როლი, როგორც ახალი დემოკრატიული სახელმწიფოს ჩამოყალიბებასა და განვითარებაში.

"გაუმართლებელია ცინიკური განცხადებებით ხელი შეუწყო ჩვენი ქვეყნებისთვის მტრული ნარატივის დამკვიდრებას, ნარტივისა, რომლის თანახმადაც აშშ-ს არაფრად უღირს ჩვენსავით პატარა ქვეყნების პარტნიორობა. მივმართავ NDI-ის საქართველოს ოფისის ხელმძღვანელს, საჯაროდ მოიხადოს ბოდიში ამ განცხადებისთვის, რადგან ასეთი განცხადებები მხოლოდ აშშ-სა და საქართველოს მტრის წისქვილზე ასხავს წყალს,"- განაცხადა მეზურნიშვილმა.

მისივე თქმით, ეს არის მისი პოზიცია და არა გუნდის განცხადება.

23 იანვარს გადაცემაში “პირისპირ” თორნტონი NDI-ის საზოგადოებრივ-პოლიტიკურ კვლევებში კითხვების ფორმულირებასთან დაკაშირებულ შეკითხვებს პასუხობდა. წამყვანის ერთ-ერთ კითხვას, რა მიზანი ჰქონდა კვლევაში ისეთი კითხვის დასმას, როგორიცაა მაგალითად,  “რომელი ქვეყანა უფრო ძლიერია სამხედრო თვალსაზრისით - რუსეთი თუ ამერიკის შეერთებული შტატები”, რაზეც გამოკითხულთა 41% პასუხობს რომ რუსეთი, ხოლო 36% - აშშ” და ხომ არ ცდილობს ამგვარ კითხვებზე მიღებული პასუხებით ორგანიზაცია ამერიკის პრეზიდენტისთვის მისი საგარეო პოლიტიკის ხარვეზების შეხსენებას, თორნტონმა ჯერ გადაცემაში განაცხადა, რომ მათ ასეთი მიზანი არ აქვთ, ხოლო მეორე დღეს წამყვანის შეკითხვის კრიტიკისას სოციალურ ქსელში დაწერა: 

”გასულ ღამეს, "იმედის" ჟურნალისტმა სიტყვასიტყვით მკითხა, ხომ არ გეგმავდა NDI-ი აშშ-ის და რუსეთის სამხედრო ძალებზე კითხვის ამგვარად ფორმულირებით ამერიკის პრეზიდენტის რუსეთთან დაპირისპირების ლობირებას. ხმამაღლა გამეცინა. ტრამპი რუკაზე საქართველოს დიდი ალბათობით ვერც იპოვის, არათუ თვალს ადევნებს აქ ჩატარებული კვლევის შედეგებს! მაგრამ მე მომწონს ვარაუდი, თითქოს ამხელა გავლენა გვაქვს!”, - წერს ლორა თორნტონი Facebook-ზე.