ბიზნესომბუდსმენი ხელისუფლებას შრომის უსაფრთხოების კანონზე რეკომენდაციებს სთავაზობს

საქართველოს პარლამენტში „შრომის უსაფრთხოების შესახებ’’ კანონის მიმდინარე განხილვასთან დაკავშირებით ბიზნესომბუდსმენი განცხადებას ავრცელებს. 

საქართველოს ბიზნესომბუდსმენის აპარატი დადებითად აფასებს იმ ფაქტს, რომ კანონპროექტის განხილვის პროცესში და სამუშაო ჯგუფის მუშაობაში ჩართულები არიან ბიზნესასოციაციების წარმომადგენლები და მათ საშუალება აქვთ, შესაძლებლობის ფარგლებში, დააფიქსირონ საკუთარი შენიშვნები და მოსაზრებები.

თუმცა, კანონპროექტის უკანასკნელი ვერსიიდან გამომდინარე, ბიზნესომბუდსმენის აპარატს აქვს შემდეგი რეკომენდაციები, რომლებიც შემდეგ საკითხებს შეეხება: სანქციების ოდენობა, დამსაქმებლის და დასაქმებულის პასუხისმგებლობა, ადმინისტრირების და კანონის მოთხოვნების შესაბამისობის უზრუნველყოფა, სახელმწიფოს თანამონაწილეობა შრომის უსაფრთხოების სისტემის ეფექტურ დაგეგმარებაში, 

" ბიზნესომბუდსმენის აპარატი მიესალმება საქართველოს პარლამენტის მზაობას ფართო და გამჭირვალე სადისკუსიო ფორმატის შექმნასთან დაკავშირებით“, – ნათქვამია განცხადებაში.

დღეს პარლამენტის ჯანდაცვის კომიტეტში შრომის უსაფრთხოებასთან დაკავშირებით მომზადებული კანონპროექტის განხილვა გადაიდო. 

დეპუტატებს დღეს ცვლილებებზე მეორე მოსმენით უნდა ემსჯელათ, თუმცა ჯანდაცვის მინისტრის მოადგილემ თამარ ბარკალაიამ საკითხის ერთი კვირით გადადება მოითხოვა.

დღესვე საქართველოს პარლამენტის თავმჯდომარე ირაკლი კობახიძემ შრომის უსაფრთხოების დაცვის შესახებ კანონპროექტზე სპეციალური განცხადება გაავრცელა.

როგორც კობახიძე წერს, საქართველოს პარლამენტი განიხილავს კანონპროექტს მძიმე, მავნე და საშიშ პირობებიან სამუშაოებზე შრომის უსაფრთხოების დაცვის შესახებ. ეს არის შრომითი საქმიანობის ის სფეროები, სადაც მდგომარეობა კრიტიკულია და სახელმწიფოს დაუყონებლივ ჩარევას საჭიროებს.

ადამიანის უფლებების სწავლებისა და მონიტორინგის ცენტრმა (EMC) მთავრობა დანაპირების შეუსრულებლობაში დაადანაშაულა. ორგანიზაციის წარმომადგენელმა ლინა ღვინიანიძემ თქვა, რომ შრომის უსაფრთხოების კანონი 2017 წლის ბოლომდე უნდა მიეღოთ, თუმცა პირობა დაირღვა.