ლევან იზორია: საქართველო ნატოს წევრი ტერიტორიული მთლიანობის პრინციპის დაცვით გახდება

თავდაცვის მინისტრმა ლევან იზორიამ ნატოში გაწევრიანებასთან დაკავშირებით ამერიკელი ექსპერტის მიერ გამოთქმულ მოსაზრებებს გამოეხმაურა. მისი თქმით, ის ამერიკელ ექსპერტს ლუკ კოფის მანამდე ესაუბრა, ვიდრე საჯარო განცხადებას გააკეთებდა.

"მე ვესაუბრე ამ ტექსტის ავტორს განცხადების საჯაროდ გაკეთებამდე და ცალსახად დავაფიქსირე ჩემი პოზიცია და ქვეყნის განწყობა. ტერიტორიული მთლიანობა ამ ექსპერტის განცხადებაში კითხვის ნიშნის ქვეშ არ დგას. ჩვენ გავხდებით ნატოს წევრი ქვეყანა ტერიტორიული მთლიანობის პრინციპის დაცვით. ყველა ექსპერტს შეუძლია თავისი აზრი ჰქონდეს ნატოში გაწევრიანების პექსპექტივზე. მე როგორც თავდაცვის უწყების ხელმძღვანელმა, პრინციპულად პოზიცია დავაფიქსირე",- განაცხადა ლევან იზორიამ.

საერთაშორისო პოლიტიკის მიმომხილველის ლუკ კოფის განცხადებით, არც ერთ სხვა ასპირანტ ქვეყანას არ აქვს იმდენი ინიციატივა ნატოსთან, რამდენიც საქართველოს. ამის შესახებ მიმომხილველმა „ამერიკის ხმასთან“ ინტერვიუს დროს განაცხადა.

ლუკ კოფიმ აღნიშნა, რომ საქართველო ნატოში შეიძლება გაწევრიანდეს განსაკუთრებული კომპრომისის - „დროებითი ღონისძიებების“ საფუძველზე. "ბევრს ეშინია, რომ საქართველოს ნატოში გაწევრიანება აუცილებლად ნიშნავს რუსეთთან ომს. საქართველო შესაძლოა, მიიწვიონ 1949 წლის შეთანხმების მე-6 მუხლში შეტანილი შესწორების საფუძველზე. ეს შესწორება გულისხმობს, რომ მე-5 მუხლის მოქმედება დროებით არ გავრცელდება რუსეთის მიერ ოკუპირებულ აფხაზეთსა და ცხინვალის რეგიონზე. ეს დროებითი ღონისძიება იმოქმედებს იქამდე, ვიდრე საქართველო მშვიდობიანი და დიპლომატიური საშუალებებით არ აღადგენს თავის ტერიტორიულ მთლიანობას საერთაშორისოდ აღიარებულ საზღვრებში. ეს ნაბიჯი მოსკოვს გამოაცლის ბერკეტს, რომ მოახდინოს ზეგავლენა ქვეყნებზე, რომელთაც ალიანსში გაწევრიანება სურთ, თუმცა მათი ტერიტორიები რუსეთის მიერაა ოკუპირებული" -  თქვა ლუკ კოფიმ და მაგალითად 1951 წელს, ალიანსში საბერძნეთისა და თურქეთის გაწევრიანება დაასახელა.

ლუკ კოფი ამერიკული ფონდის Heritage Foundation-ის, დუგლას და სარა ელისონების სახელობის საგარეო პოლიტიკის ცენტრის დირექტორია. მან 8 თებერვალს თბილისში თავისი მოხსენების პრეზენტაცია გამართა, რომელიც საქართველოში რუსეთის შემოჭრასა და საქართველოს ნატოში გაწევრიანებისთვის გადადგმულ ნაბიჯებს მიეძღვნა.