თეთრი ხმაური: ხელისუფლება დასაქმებულთა უფლებებისადმი გულგრილია

"თეთრი ხმაურის მოძრაობა" შრომის უსაფრთხოების დაცვის მოთხოვნით დღეს დაგეგმილ აქციებთან დაკავშირებით განცხადებას ავრცელებს.

მოძრაობის ცნობით, "ნაცვლად იმისა, სახელმწიფომ თვალი გაუსწოროს არსებულ საგანგაშო ვითარებას და ყველა გზას მიმართოს საკუთარი მოსახლეობის სიცოცხლის უზრუნველსაყოფად, ის გულგრილი რჩება დასაქმებულთა უფლებების მიმართ და ადამიანებს მონური პირობებისთვის, სიკვდილისთვის წირავს."

„უკანასკნელი ხუთი წლის განმავლობაში 1209 ადამიანი დაიღუპა და დასახიჩრდა სამუშაო ადგილებზე. სულ რამდენიმე დღის წინ, მშენებლობამ 26 წლის ახალგაზრდის სიცოცხლე იმსხვერპლა. ეს ტრაგიკული შემთხვევები არ არის შემთხვევითი ხასიათის, ის პირდაპირი გამოძახილია ქვეყანაში არსებული ეკონომიკური და სოციალური უთანასწორობის მაღალი მაჩვენებლის, რაც სიღარიბეში მყოფ მოსახლეობას სიცოცხლისთვის საშიშ, უსაფრთხოების ნორმების არარსებობის პირობებში შრომას აიძულებს.

ნაცვლად იმისა, სახელმწიფომ თვალი გაუსწოროს არსებულ საგანგაშო ვითარებას და ყველა გზას მიმართოს საკუთარი მოსახლეობის სიცოცხლის უზრუნველსაყოფად, ის გულგრილი რჩება დასაქმებულთა უფლებების მიმართ და ადამიანებს მონური პირობებისთვის, სიკვდილისთვის წირავს. ხელისუფლებას არათუ სისტემური ნაბიჯები არ გადაუდგამს მოსახლების კეთილდღეობის უზრუნველსაყოფად, პარლამენტი დღემდე აჭიანურებს და არასრულყოფილი ფორმით ცდილობს გაიტანოს კანონი შრომის უსაფრთხოების პირობების შესახებ, რომელსაც ქვეყანას ევროკავშირთან ასოცირების ხელშეკრულებაც ავალდებულებს.

"თეთრი ხმაურის მოძრაობა" იყო და იქნება სოლიდარული ყველა იმ საკითხის მიმართ, რომელიც ჩვენს მოსახლეობას უმძიმეს ტვირთად აწევს. სამწუხაროდ, დღეს ქვეყანაში სიმწვავის ხაზი არათუ შრომის ღირსეულ პირობებსა და სათანადო ანაზღაურებაზე, არამედ ადამიანთა სიცოცხლის შენარჩუნებაზე გადის.

ყველა იმ ადამიანს, ვინ იაზრებს პრობლემის ტრაგიკულობას და ვისთვისაც მტკივნეულია დასაქმების ადგილებზე ჩვენი მოქალაქეების დაუსრულებელი გარდაცვალებისა თუ ჯანმრთელობის დაზიანების ფაქტები, მოგიწოდებთ მხარდაჭერა გამოხატოთ და შეუერთდეთ დღევანდელ აქციას“,- წერია „თეთრი ხმაურის მოძრაობის“ მიერ გავრცელებულ განცხადებაში.

შრომის უსაფრთხოების დაცვის მოთხოვნით, თბილისსა და ბათუმში დღეს აქციები გაიმართება. არასამთავრობო ორგანიზაციები სტუდენტების მიერ დაგეგმილ აქციას, რომლებიც ქვეყანაში შრომის უსაფრთხოებასთან დაკავშირებით, ხელისუფლების უმოქმედობას აპროტესტებენ, დღეს შუერთდებიან.

აქციის მონაწილეები თსუ-ს პირველი კორპუსის ეზოდან პარლამენტისკენ წავლენ. აქცია-მსვლელობა ერთდროულად თბილისსა და ბათუმში გაიმართება.

13 თებერვალს შრომის ინსპექციის ამოქმედებისთვის ხელმოწერების შეგროვება დაიწყო. არასამთავრობო ორგანიზაციებმა დღეს შრომის უსაფრთხოებაზე ევროკომისრებს მიმართეს.