ჯანდაცვის კომიტეტში შრომის უსაფრთხოების კანონპროექტს განიხილავენ

“შრომის უსაფრთხოების შესახებ”კანონპროექტს პარლამენტის ჯანდაცვის კომიტეტის სხდომაზე მეორე მოსმენით განიხილავენ. კანონპროექტს მთავრობის საპარლამენტო მდივანი შალვა თადუმაძე წარადგენს. ამის შესახებ 1tv წერს.

როგორც შრომის, ჯანმრთელობისა და სოციალური დაცვის მინისტრის მოადგილემ თამილა ბარკალაიამ განმარტა, კანონპროექტი შრომითი უსაფრთხოების პრობლემის აღმოფხვრაზეა ფოკუსირებული.

მისი თქმით, ერთი კვირის განმავლობაში კანონპროექტთან დაკავშირებით არაერთი საკონსულტაციო შეხვედრა გაიმართა და რამდენიმე სადავო საკითხი დაზუსტდა, მათ შორის სანქციების შესახებ.

„ერთი კვირის წინ ჩვენ საკომიტეტო მოსმენის გადავადება ვითხოვეთ, ვინაიდან კანონპროექტთან დაკავშირებით გარკვეული ნიუანსები შესაჯამებელი გვქონდა. ჩამოვყალიბდით ვერსიაზე, რომელიც საკომიტეტო მოსმენაზე განიხილება. საუბარი იყო იმაზე, თუ რა შემთხვევაში ჩაითვლება განმეორებითი მონიტორინგი განმეორებითად და დარღვევა განმეორებითად, ასევე, როგორი იქნება სანქცირების მექანიზმი და  სანქციების რაოდენობა“, – განაცხადა მინისტრის მოადგილემ.

მისი თქმით, სანქცირების მექანიზმი დღგ-ზე იქნება მიბმული. სანქციების რაოდენობა კი, განსხვავებული. აღსანიშნავია, რომ სანქციების რაოდენობა კანონპროექტის წინა ვერსიასთან შედარებით, გაორმაგდა.

„აგრეთვე, დაწესდა 50 ათას ლარიანი სანაცია, ისევე, როგორც საქმიანობის შეჩერება. კანონპროექტი ფოკუსირებულია შრომითი უსაფრთხოების პრობლემის აღმოფხვრაზე და სანქციები არ არის მასში გათავლისწინებული ერთადერთი მექანიზმი“, – განაცხადა თამილა ბარკალაიამ.

მისი თქმით, კანონპროექტში კარგადაა გაწერილი შრომითი ინსპექტორების მექანიზმი; იზრდება შრომითი ინსპეტორის უფლებები და პასუხისმგებლობა; ამასთან, ბიზნესი ვალდებული ხდება, შრომის უსაფრთხოების მენეჯერები ჰყავდეს; გეგმიური ისნპექტირების, განმეორებითი მონიტორინგისა და ორგანიზაციიდან შესული შეტყობინების შემთხვევაში, ინსპექტირების ჩატარება სასამართლოს გარეშეა გათვალისწინებული.  კანონპროექტით, ბიზნესი ვალდებული იქნება საკუთარი ორგანიზაციების ფარგლებში, შრომის უსაფრთხოების საკითხი გაწეროს.

5 თებერვალს ირაკლი კობახიძემ შრომის უსაფრთხოების დაცვის შესახებ კანონპროექტზე სპეციალური განცხადება გაავრცელა.

როგორც კობახიძე წერს, საქართველოს პარლამენტი განიხილავს კანონპროექტს მძიმე, მავნე და საშიშ პირობებიან სამუშაოებზე შრომის უსაფრთხოების დაცვის შესახებ. ეს არის შრომითი საქმიანობის ის სფეროები, სადაც მდგომარეობა კრიტიკულია და სახელმწიფოს დაუყონებლივ ჩარევას საჭიროებს.

შრომის უსაფრთხოების დაცვის მოთხოვნით  თბილისში საპროტესტო აქცია გაიმართა.

აუდიტორია 115 შრომითი უფლებების დაცვას ითხოვს.

აქციის მონაწილეები ქმედითი შრომის ინსპექციის არსებობის საჭიროებაზე საუბრობენ და ამბობენ, რომ კანონპროექტი, რომელსაც ახლა პარლმენტი განიხილავს, შრომის უსაფრთხოებას სრულად ვერ უზრუნველყოფს და ის უფრო მასშტაბური უნდა გახდეს.