დეა გოშხეთელიანის ყოფილი ქმრის ადვოკატის თქმით, მას ქსელში ემუქრებიან

ადვოკატი ლედი ტუკვაძის მიმართ მუქარის შემცველი SMS-ების ფაქტზე პროკურატურამ გამოძიება დაიწყო. უფლებადამცველმა მედიისთვის ბრიფინგი გამართა და განაცხადა, რომ მისთვის ცნობილია იმ ადამიანის ვინაობა, ვინც ემუქრება.

ტუკვაძე გამოძიებას ელოდება, რომ ზუსტად დადგინდეს, თუ ვინ დგას სოციალურ ქსელში ყალბი პროფილების უკან. ადვოკატი ვარაუდობს, რომ მის მიმართ დაწყებული ფსიქოლოგიური ზეწოლა და მუქარა ყოფილი ცოლის ძალადობაში ბალდებული გრიგოლ ბაკურაძის საქმეს უკავშირდება. 

"ყალბი Facebook-ექაუნთებით მიზანმიმართულად ვრცელდება ღირსების შემლახავი ინფორმაცია სოციალურ ქსელში. გარდა მუქარის შემცველი წერილებისა, რომ მე ვიცავ მოძალადეს, რომ ყველას ჩაგვსვამენ ციხეში ვინც გრიგოლ ბაკურაძეს იცავს, ასევე მომდის სარიტუალო ხასიათის მუსიკა. ამ ადამიანს აქვს ჯანმრთელობის პრობლემა და მაქვს ეჭვი, რომ მას კონკრეტული ადამიანები მართავენ",  - ამბობს გრიგოლ ბაკურაძის ადვოკატი ლედი ტუკვაძე.

ადვოკატთა ასოციაციის თავმჯდომარემ დავით ასათიანმა პროკურატურას გუშინ მოუწოდა ადვოკატზე განხორციელებული მუქარის შესწავლისკენ. 

პოლიციამ დეა გოშხეთელიანს ყოფილი ქმრის ოჯახზე სოციალურ ქსელში წერა აუკრძალა და ამისთვის შემაკავებელი ორდერი გამოსცა.

22 წლის დეა გოშხეთელიანი ყოფილ ქმარს ფიზიკურ ზეწოლაში ადანაშაულებს. მისი თქმით, გრიგოლ ბაკურაძე, 3 იანვარს, თავს დაესხა მას და მამამისს და მცირეწლოვანი შვილის თანდასწრებით, ფიზიკურად გაუსწორდა.

7-8 თებერვალს ფიზიკურ ძალადობაში ბრალდებულმა გრიგოლ ბაკურაძემ ციხეში თვითმკვლელობა სცადა. როგორც მისი ადვოკატი ამბობს, ამის მიზეზი ბაკურაძის შესახებ სოციალურ ქსელებში "ცილისმწამებლური კამპანია" იყო.

12 თებერვალს სააპელაციო სასამართლომ გრიგოლ ბაკურაძის ადმინისტრაციული სარჩელი განიხილა. საუბარია ქუთაისის საქალაქო სასამართლოს გადაწყვეტილებაზე,რომლის მიხედავითაც ბაკურაძე გოშხეთემიანისთვის ძალადობის შემცველი სმს-ის გაგზავნაში სამართალდამრღვევად იქნა ცნობილი.

სააპელაციო სასამართლომ გრიგოლ ბაკურაძის სარჩელი დააკმაყოფილა და ამ ნაწილში ის დამნაშავედ არ ცნო.