ტატუნაშვილის გარდაცვალების გამო, ევროპული საქართველო ე.წ. ოთხოზორიას სიის შექმნას ითხოვს

ევროპული საქართველო პარლამენტს ინიციატივით მიმართავს, შეიქმნას ე.წ. ოთხოზორიას სია, რომელშიც ის ადამიანები შევლენ, რომლებიც ოთხოზორიას მკვლელობასა, თუ სხვა საქმეებში დამნაშავეები არიან და რომლებიც ასევე მალავენ დამნაშავეებს. ინფორმაციას სააგენტო "ინტერპრესნიუსი" ავრცელებს.

სერგი კაპანაძის განცხადებით, ცხინვალში გარდაცვლილი ტატუნაშვილის საქმეზე სახელმწიფომ უნდა მოახდინოს უმკაცრესი რეაგირება. 

"გავრცელდა ინფორმაცია, რომ ცხინვალის საოკუპაციო რეჟიმმა მოკლა არჩილ ტატუნაშვილი, საქართველოს შეიარაღებული ძალების ყოფილი წევრი, რომელიც იბრძოდა ოკუპანტის წინააღმდეგ 2008 წელს, გავრცელებული ინფორმაციით, ეს იყო სასტიკი მკვლელობა, შინაარსით მსგავსი იმ მკვლელობისა, რომელიც განხორციელდა გიგა ოთხოზორიას შემთხვევაში. ამაზე საჭიროა უმკაცრესი რეგირება ხელისუფლების მხრიდან და ერთ–ერთი ფორმა ინიციატივის სახით ევროპულმა საქართველომ წარუდგინა პარლამენტს. ეს არის ის, რომ საქართველოს ხელისუფლებამ შექმნას ე. წ. ოთხოზორიას სია, რომელშიც შეიყვანენ იმ ადამიანებს, რომლებიც პირდაპირ არიან დამნაშავეები და ვინც ფარავენ ასეთი ტიპის დანაშაულებს. ამოცანა უნდა იყოს ორი: ერთი, ის რომ პარტნიორებმა ამ ადამიანებზე გაავრცელონ სანქციები და მეორე ამ ადამიანებმა ოკუპირებულ ტერიტორიაზე მცხოვრებთათვის განკუთვნილი სამედიცინო და სხვა შეღავათებით არ ისარგებლონ. იმედი მაქვს ქართული ოცნება პასუხისმგებლობით მიუდგება ამ საქმეს“, - განაცხადა სერგი კაპანაძემ.

არჩილ ტატუნაშვილის გარდაცვალების ფაქტზე პასუხისმგებლობა პირდაპირ ეკისრება რუსეთის ფედერაციას და საოკუპაციო რეჟიმს, - ამის შესახებ შერიგებისა და სამოქალაქო თანასწორობის საკითხებში საქართველოს სახელმწიფო მინისტრმა ქეთევან ციხელაშვილმა განაცხადა.

ამასთანავე სუსი საერთაშორისო ორგანიზაციებსა და ჟენევის დისკუსიების თანათავმჯდომარეებს მომხდარზე მყისიერი და პრინციპული რეაგირებისკენ მოუწოდებს. ასევე მოითხოვს არჩილ ტატუნაშვილის გარდაცვალების და ყველა ზემოთხსენებული პირის დაკავების შესახებ ზუსტი და ამომწურავი ინფორმაციის მიღებას.

სუსის განცხადებაში ასევე ნათქვამია, რომ ოკუპირებული ცხინვალის წარმომადგენლებმა, საქართველოს მოქალაქეები: არჩილ ტატუნაშვილი, ლევან ქუტაშვილი და იოსებ პავლიაშვილი, 2018 წლის 22 თებერვალს, უკანონოდ დააკავეს.

ოსური მხარის ცნობით, 35 წლის საქართველოს მოქალაქე არჩილ ტატუნაშვილი,  2008 წლის აგვისტოში სამხრეთ ოსეთში საბრძოლო მოქმედებებში აქტიურად მონაწილეობდა და რესპუბლიკის ტერიტორიაზე, რუსეთის საპრეზიდენტო არჩევნებამდე ახალ დივერსიებს ამზადებდა.

მათივე ინფორმაციით, დაკავებულმა ტატუნაშვილმა წინააღმდეგობა გაუწია იზოლატორის ოფიცრებს, რა დროსაც მან წონასწორობა დაკარგა და კიბეზე დაგორდა. ამის შემდეგ მისი ჯანმრთელობის მდგომარეობა გაუარესდა და სუთქვის უკმარისობით საავადმყოფოში გადაიყვანეს, თუმცა ორი საათის შემდეგ ის გარდაიცვალა.

განცხადებაში წერია, რომ ოსურმა სპეცსამსახურებმა ტატუნაშვილსა და საქართველოს სპეცსამსახურებს შორის თანამშრომლობის შესახებ იცოდნენ და შესაბამისად, მას თვალყურს ადევნებდნენ. ის სამხრეთ ოსეთში მისი მორიგი ჩასვლის დროს დააკავეს.