სერგეენკო თემურ გაბაიძის საქმეზე: ძალიან მალე სრული სურათი გვეცოდინება

ჯანადაცვის მინისტრის, დავით სერგეენკოს თქმით, გასულ წელს, კურორტ გოდერძიზე მიყენებული დაზიანებების შედეგად გარდაცვლილი თემურ გაბაიძის საქმეზე მალე სრული სურათი იქნება ცნობილი. ინფორმაციას "ბათუმელები" ავრცელებს.

„ყველაზე ცოტა, მინიმალური ვადა, რაც სჭირდება სამინისტროს შესწავლისთვის, არის თვე-ნახევარი. ყოფილა რთული შემთხვევები, როდესაც ამას დასჭირვებია ორი წელი ან მეტი. ჩვენ ამ ეტაპზე ვართ უკვე ფინალიზაციისკენ და ვფიქრობთ, რომ უკვე ძალიან მალე სრული სურათი გვეცოდინება.

სამედიცინო რეგულირების სააგენტო არის ჯანდაცვის სამინისტროს ნაწილი. როცა ჯანდაცვის მინისტრი გაძლევთ პასუხს, ის მოიცავს რეგულირების სააგენტოს ეტაპს.  

მათ სრულად შეისწავლეს საკითხი, რაც მოიცავდა სამედიცინო დოკუმენტაციის დეტალურ შესწავლას და ყველა იმ სამედიცინო პერსონალის, რომელიც მონაწილეობდა ამ პაციენტის მართვაში, დაწვრილებით გამოკითხვაში, ასევე ამ გამოკითხვის დაოქმებაში.

ამის შემდეგი ეტაპია ის, რომ პროფესიული ასოციაციები განიხილავენ საკითხს ამ დოკუმენტაციის საფუძველზე და უკვე ვსხდებით ერთად პროფესიული განვითარების საბჭოს ფორმატში, რომლის თავმჯდომარეც მე გახლავართ და გამოგვაქვს უკვე გადაწყვეტილება" – თქვა სერგეენკომ. 

თემურ გაბაიძე, აჭარის ფინანსთა და ეკონომიკის მინისტრის ყოფილი მოადგილე, გასულ წელს კურორტ გოდერძიზე მიყენებული დაზიანების შედეგად გარდაიცვალა. როგორც ცნობილია, გაბაიძეს ფეხსაცმლის შეკვრისას თხილამურებით გადაუარეს.

გარდაცვალებიდან მალევე, ჯანდაცვის სამინისტრომ გამოაქვეყნა განცხადება: "ხულოს რაიონულმა საავადმყოფომ კატასტროფის ბრიგადის გამოძახების თაობაზე განაცხადი 19:05 საათზე გააკეთა. ბრიგადა ბათუმიდან გავიდა 19:10 საათზე, ადგილზე მივიდა 21:00 საათზე".

გასული წლის თებერვალში ჯანდაცვის სამინისტრომ კურორტ გოდერძიზე მომხდარი უბედური შემთხვევის შესწავლა დაიწყო.

გაბაიძის ოჯახი გარდაცვალებას სამ ექიმს აბრალებს. 

"სიმპტომები (ძლიერი დარტყმა თავის არეში, დარტყმის შედეგად გონების კარგვა, სისხლჩაქცევა მარჯვენა თვალის არეში, ღია ჭრილობა შუბლზე და ძლიერი გულისრევა) ექიმის მიერ მყისიერად არ შეფასდა, როგორც კრიტიკული. ექიმმა გადაწყვიტა პაციენტი დაეტოვებინა კურორტის სამედიცინო პუნქტში დაკვირვების ქვეშ და მანამ არ მიიღო მისი დაუყოვნებელი ტრანსპორტირების შესახებ გადაწყვეტილება, სანამ თემურ გაბაიძეს არ დაეწყო ცნობიერების დაბინდვა.

ზემოაღნიშნულის გამო დაიკარგა თემურ გაბაიძის გადარჩენისათვის საჭირო ძვირფასი დრო. თავის ტვინის ტრავმული დაზიანების დროს კი, რაც გამოხატული იყო შესაბამისი სიმპტომატიკით პირველივე წუთებიდანვე, ყოველ წუთს აქვს სიცოცხლის გადარჩენისათვის გადამწყვეტი მნიშვნელობა, რაც დადასტურდა პაციენტის გარდაცვალების ფაქტით და რაც მიუთითებს იმაზე, რომ პაციენტზე ხანგრძლივი დაკვირვების ნაცვლად მისი სასწრაფო ჰოსპიტალიზაცია იყო საჭირო“, – დაწერა გარდაცვლილის მეუღლემ საჩივარში.

სამედიცინო საქმიანობის რეგულირების სააგენტომ ჯანდაცვის სამინისტროს პროფესიული განვითარების საბჭოს სამი ექიმის (შპს „ემერჯენსი სერვისის“ ექიმი, ხათუნა გელაშვილი, შპს „უნიმედი აჭარას“ ბათუმის რეფერალური საავადმყოფოს ექიმები: გიორგი კავთელაძე და მაია მამისაიშვილი) პროფესიული პასუხისმგებლობის თაობაზე მიმართა.