თბილისში უსაფრთხოების წესების დარღვევაზე 500 ობიექტი გააფრთხილეს, 272 დააჯარიმეს

თბილისის მერის კახა კალაძის თქმით, დედაქალაქში სამშენებლო უსაფრთხოების იგნორირების გამო, ან დარღვევით მიმდინარე პროექტებზე გაფრთხილება მიცემული აქვს 500 ობიექტს, მათგან უკვე დაჯარიმდა 272 სამშენებლო ობიექტი. ინფორმაციას 1tv ავრცელებს.

კახა კალაძის ინფორმაციით, შეჩერების დადგენილება ამოქმედდა 120 ობიექტის მიმართ.

„მინდა გითხრათ, რომ მერიის ზედამხედველობის სამსახურმა შეადგინა ოქმი საარჩევნო პლაკატების ჩამოუხსნებლობის 59 ფაქტზე, ხოლო სარეკლამო კონსტრუქციების გამო, გაფრთხილებულია 300-მდე ობიექტი პოლიტიკოსებმა და პოლიტიკურმა პარტიებმა მეტი უნდა გააკეთონ, რათა წინასაარჩევნოდ გაკრული პლაკატები კეთილი ინებონ და ჩამოხსნან, რადგან ეს ყველაფერი ამახინჯებს და აბინძურებს გარემოს. მგონია, რომ ამ მიმართულებითაც უნდა გამკაცრდეს მიდგომები და უნდა გაიზარდოს ჯარიმები”, – აღნიშნა კახა კალაძემ.

მისივე თქმით, აუცილებლად უნდა შეიცვალოს ზედამხედველობის სისტემა, უფრო მობილური და ეფექტური უნდა გახდეს დაჯარიმების პროცესი.

„კანონის დაცვა დედაქალაქში განაპირობებს სანქციების გაზრდილ რაოდენობას. ჩემთვის მტკივნეულია და მიუღებელია, როცა თბილისთან მიმართებაში ხშირად იხმარება სიტყვა უსისტემო, უკანონო, ქაოსური. თბილისი თანამედროვე დედაქალაქია, ეს უწესრიგობა და დარღვევები უნდა დასრულდეს. ამისთვის ზედამხედველობის, როგორ ინსტიტუციის გაძლიერება და დახვეწა ჩვენი ერთ-ერთი პრიორიტეტია. ვავალებ ქალაქის ვიცე-მერს ირაკლი ხმალაძეს, რომ მოამზადოს და დროულად დაიწყოს ზედამხედველობის სისტემისა და ზედამხედველობის სამსახურის რეფორმა. მათ შორის ამ სამსახურის თანამშრომლების გადამზადების, ტესტირების პროცესი, ყველანაირი აღჭურვილობა რაც კი რის საჭირო ამისთვის ეს იქნება კამერები, ფორმები , ავტომობილები შეიძინეთ, გააკეთეთ, რომ ეს სამსახური იყოს უფრო ეფექტური და უმაღლეს დონეზე განახორციელონ საზედამხედველო ფუნქციები. ასევე მნიშვნელოვანია შეიქმნას რეაგირების ეფექტიანი მექანიზმი, დაიხვეწოს მოქალაქეებთან და იურიდიულ პირებთან კომუნიკაციის მეთოდები. მგონია, ეს ამ სამსახურის ძალიან მნიშვნელოვანი რეფორმა იქნება”, – განაცხადა კალაძემ.

5 მარტს ცნობილი გახდა, რომ თბილისის მერიამ დარღვევების გამო 46 მშენებარე ობიექტი შეაჩერა. სანქციების რაოდენობის გაზრდის ინიციატივით დედაქალაქის მერი კახა კალაძე გამოვიდა. სამშენებლო რეგულაციების ნაწილი, რომელიც „მშენებლობის ნებართვის გაცემის წესისა და სანებართვო პირობების შესახებ“ დადგენილებაში უკვე შევიდა, 22 თებერვლიდან ამოქმედდა.