თბილისის ყოფილი მერები სითი პარკთან ხელშეკრულების გაწყვეტას აფასებენ

სითი პარკთან ხელშეკრულების გაწყვეტას თბილისის ყოფილი მერები დავით ნარმანია და გიგი უგულავა აფასებენ. ინფორმაციას სააგენტო "ინტერპრესნიუსი" ავრცელებს.

დავით ნარმანიას განცხადებით, „სითი პარკს“ საკმაოდ დიდი ცოდვები დაუგროვდა წლების განმავლობაში - შესაბამისად, მასთან ხელშეკრულების გაწყვეტა მისასალმებელია. ყოფილი მერი მიიჩნევს, რომ „დანაშაულებრივი ხელშეკრულების“ სათავეში მყოფ პირებს პასუხი უნდა მოეკითხოთ. 

"მნიშვნელოვანია, გაწყვეტის შემდგომი პროცედურები ნაკლებ მტკივნეულად იქნას გატარებული და ამით მოიგოს საზოგადოებამ. აქვე, არასდროს უნდა დაგვავიწყდეს, ვინ იდგა ამ დანაშაულებრივი ხელშეკრულების სათავეში და მათ შესაბამისი ორგანოების მხრიდან მოეკითხოთ პასუხი“, - განაცხადა დავით ნარმანიამ.

გიგი უგულავას  შეფასებით კი თბილისის მერია მზად არ არის იმ ფუნქციების შესათავსებლად, რაც ხელშკერულების გაწყვეტის შემდეგ დაეკისრება. მისი თქმით, საკრებულოში მათი ფრაქცია აუცილებლად დაიბარებს თბილისის სატრანსპორტო კომპანიას, რათა ცნობილი გახდეს ის გეგმა, თუ როგორი იქნება პარკირების სისტემა 10 აპრილის შემდეგ.

„მე ვთხოვ ჩვენს ფრაქციას საკრებულოში, დაიბაროს თბილისის სატრანსპორტო კომპანია და საზოგადოებას წარუდგინოს გეგმა, რას აპირებს თბილისის სატრანსპორტო კომპანია 10 აპრილის შემდეგ. მე მაქვს განცდა, რომ მერიის დღევანდელი ადმინისტრაცია ამ სიმძიმისთვის ამწუთას მოუმზადებელია და ჩვენ 10 აპრილის შემდეგ შეიძლება უბრალოდ ქაოსი მივიღოთ. მე ძალიან კარგად მესმის, რომ პარკინგის ინსპექტორები, მსოფლიოს არც ერთ ქალაქში, არავის, არასდროს არ უყვარს, თუმცა ეს არის აუცილებელი „ბოროტება“, რომელიც საჭიროა იმისთვის, რომ ქალაქმა იფუნქციონირებს და ელემენტარული წესრიგი იყოს. ყველაზე ცუდი წესრიგიც კი სჯობს ქაოსს და უწესრიგობას, რომელშიც ჩვენ ვიყავით 90-იანებში. დღეს შეიძლება კიდევ უფრო უარესი შედეგი მივიღოთ, ვინაიდან მანქანების რაოდენობა გაცილებით მეტია. ახლა მთავარია, ჩვენ მერიას მოვთხოვოთ რას აპირებს, როგორ აპირებს, რა რესურსებით აპირებს და რა განსხვავება იქნება მასსა და „სითი პარკს“ შორის 10 აპრილის შემდეგ“, - განაცხადა უგულავამ.

თბილისის მერის კახა კალაძის განცხადებით, თბილისის მერია 2018 წლის 10 აპრილიდან სითი პარკთან კონტრაქტს წყვეტს. ამის შესახებ კალაძემ ბრიფინგზე განაცხადა.  თავად კომპანიაში აცხადებენ, რომ მერიის გადაწყვეტილება მათთვის მოულოდნელი იყო. ისინი ამ თემაზე ოფიციალურ განცხადებას უახლოეს საათებში გააკეთებენ. სითი პარკთან ხელშეკრულების გაწყვეტის გამო მერია პირგასამტეხლოს არ გადაიხდის. 

კომპანია "სითი პარკსა" და თბილისის მერიას შორის ხელშეკრულება 2007 წელს გაფორმდა და ის 2024 წლის 31 დეკემბრამდე მოქმედი უნდა ყოფილიყო.