რა შემთხვევაში უნდა გადაუხადოს თბილისის მერიამ სითი პარკს პირგასამტეხლო

თბილისის მერიამ კომპანია "სითი პარკთან" ხელშეკრულების გაწყვეტის შესახებ განაცხადა. ხელშეკრულება 2018 წლის 10 აპრილიდან დაკარგავს ძალას. კომპანია უფლებების დასაცავად ყველა სამართლებრივ გზას მიმართავს.

ხელშეკრულების შეწყვეტის გამო, თბილისის მერიას კომპანიისთვის პირგასამტეხლოს გადახდას ავალდებულებს. საუბარია 25 მილიონ ლარზე. თუმცა ვიცემერის თქმით, თანხას არ გადაიხდიან, რადგან სითი პარკი ხელშეკრულების დარღვევის გამო რამდენჯერმე უკვე გააფრთხილეს.

არასამთავრობო ორგანიზაცია "ინფორმაციის თავისუფლების განვითარების ინსტიტუტი" (IDFI) IDFI 2013 წელს ცდილობდა მიეღო ხელშეკრულების ასლი, თუმცა 2013 წლის დეკემბერში ინსტიტუტმა მიიღო ხელშეკრულების მხოლოდ ის ნაწილი, რომელიც მერიის ცნობით არ წარმოადგენდა შპს „სი-ტი პარკის“ კომერციულ საიდუმლოს. „სი-ტი პარკთან“ გაფორმებული ხელშეკრულების ყველა დეტალი მხოლოდ 2014 წელს გახდა ცნობილი, როდესაც თბილისის ახალი მთავრობის გადაწყვეტილებით ხელშეკრულება გასაჯაროვდა.

IDFI გთავაზობთ ხელშეკრულების იმ ნაწილების ანალიზს, სადაც საუბარია ხელშეკრულების შეწყვეტასა და კომპენსაციის გადახდაზე.

„სი-თი პარკის“ ვალდებულებები:

ხელშეკრულების მიხედვით, „სი-თი პარკის“ მომსახურებები მოიცავს შემდეგს:

• ინფრასტრუქტურის მომზადება
• საგზაო ნიშნების მონტაჟი
• საგზაო ნიშნების განახლება
• საზოგადოების ინფორმირება
• ავტომატური საზომი მოწყობილობების, პარკირების ფიჭური სისტემის გავრცელება და ოპერირება
• პარკირების საფასურის გადახდის დაზიანებული ან მოპარული მოწყობილობების აღდგენა
• ქოლ-ცენტრების მუშაობა კვირაში 5 სამუშაო დღე,
• გადახდის ცენტრების ოპერირება ა.შ.

ხელშეკრულების თანახმად, ქ. თბილისის მერიამ შპს „სი-თი პარკს“ კომპენსაცია უნდა გადაუხადოს შემდეგ შემთხვევებში:

• თუ ქ. თბილისის მერია შეწყვეტს ხელშეკრულებას საკუთარი მიზეზით, „სი-ტი პარკის“ მხრიდან აღებული ხელშეკრულებების დარღვევის გარეშე (მუხლი 12.2.)
• თუ შპს „სი-ტი პარკი“ თავად შეწყვეტს ხელშეკრულებას ქ. თბილისის მერიის მიერ ვალდებულების შეუსრულებლობის გამო (მუხლი 12.2.)
• თუ თბილისის მერია მესამე მხარეს ან სხვა სამთავრობო ორგანოს გადასცემს ხელშეკრულებით განსაზღვრული უფლებების მსგავს ან კონკრეტულ უფლებას (მუხლი 9)
• თუ საქართველოს კანონმდებლობა ისე შეიცვლება, რომ შპს „სი-ტი პარკს“ შეეზღუდება შესაძლებლობა, განახორციელოს მის მიერ ნაკისრი ვალდებულებები, დაეკისრება დამატებითი პასუხისმგებლობა, ან რაიმე სახით შეუმცირდება შემოსავალი (მუხლი 5)

შპს „სი-თი პარკისთვის“ ასანაზღაურებელი კომპენსაცია გამოიანგარიშება შემდეგი წესით:

პირველ სამ შემთხვევაში (მუხლი 12.2. და მუხლი 9):

• თუ შეწყვეტა მოხდებოდა ხელშეკრულების დაწყებიდან 4 წლის განმავლობაში, შპს „სი-თი პარკისთვის“ გადასახდელი კომპენსაცია დაიანგარიშდებოდა შემდეგი ფორმულით - 500,000 ლარი გამრავლებული ხელშეკრულების შეწყვეტიდან ვადის დასრულებამდე დარჩენილი თვეების რაოდენობაზე.
• თუ შეწყვეტა მოხდებოდა ხელშეკრულების დაწყებიდან 4 წლის შემდეგ, ქ. თბილისის მერია ვალდებული იყო შპს „სი-თი“ პარკისთვის აენაზღაურებინა შეწყვეტის ხარჯები, რომლებიც შემდეგი ფორმულით დაანგარიშდებოდა: გასული 12 თვის განმავლობაში შპს „სი-თი პარკის“ მომსახურებიდან მიღებული საშუალო თვიური შემოსავალი გაყოფილი ორზე და გამრავლებული ხელშეკრულების შეწყვეტიდან მისი ვადის ბოლომდე დარჩენილი თვეების რაოდენობაზე.

მეოთხე შემთხვევაში (მუხლი 5):

• საკანონმდებლო ცვლილებებამდე არსებული უშუალო ბოლო თორმეტი თვის განმავლობაში მიღებული შემოსავლის საშუალო თვიური მაჩვენებელი გამრავლებული იმ თვეების რაოდენობაზე, რაც დარჩენილი იყო ცვლილების ძალაში შესვლიდან ხელშეკრულების ვადის გასვლამდე.
• ამას გარდა, შპს „სი-თი პარკი“ უფლებამოსილი არის მიიღოს კომპენსაცია იმ დამატებითი ხარჯების გაწევის გამო, რომელიც უკავშირდება საკანონმდებლო ცვლილებებიდან გამომდინარე ვალდებულებებსა და ხელშეკრულების საგანს.

ხელშეკრულების თანახმად, ქ. თბილისის მერიამ შპს „სი-თი პარკს“ კომპენსაცია არ უნდა გადაუხადოს შემდეგ შემთხვევებში:

1. "სი-თი პარკის" მიერ ხელშეკრულებით ნაკისრი ვალდებულების დარღვევის შემთხვევაში ქ. თბილისის მერია წერილობით გააფრთხილებს "სი-ტი პარკს", აღნიშნავს დარღვევის ბუნებას და მისცემს "სი-თი პარკს" დარღვევის გამოსწორების 60 დღიან ვადას (მუხლი 13.3.)
2. „სი-თი პარკის“ მიერ ნაკისრი ვალდებულებების განმეორებით შეუსრულებლობის შემთხვევაში ქ. თბილისის მერია შეწყვეტს ხელშეკრულებას (მუხლი 13.3.)

თბილისის მერის კახა კალაძის განცხადებით, თბილისის მერია 2018 წლის 10 აპრილიდან სითი პარკთან კონტრაქტს წყვეტს. ამის შესახებ კალაძემ ბრიფინგზე განაცხადა.  თავად კომპანიაში აცხადებენ, რომ ისინი თავიანთ უფლებებს სამართლებრივი გზით დაიცავენ. სითი პარკთან ხელშეკრულების გაწყვეტის გამო მერია პირგასამტეხლოს არ გადაიხდის. 

კომპანია სითი პარკსა და თბილისის მერიას შორის ხელშეკრულება 2007 წელს გაფორმდა და ის ძალაში 2024 წლის 31 დეკემბრამდე უნდა ყოფილიყო.