საპატრიარქო სახელმწიფოს რელიგიური გრძნობების სათანადოდ დაცვისკენ მოუწოდებს

საქართველოს საპატრიარქო სახელმწიფოს რელიგიური გრძნობების სათანადოდ დაცვისკენ მოუწოდებს.

საპატრიარქოს განცხადებას უცვლელად გთავაზობთ:

„სამწუხაროდ, ბოლო დროს კიდევ უფრო გაძლიერდა მორწმუნე საზოგადოების გრძნობების შეურაცხყოფისა და ღვთის გმობის გამოვლინებები. სახეზეა არაერთი შემთხვევა, თუმცა კომპანია „აიისას“ და მისი დირექტორის უზნეო თავგასულობა და „რუსთავი – 2“- ის ა.წ. 18 მარტის სიუჟეტი თავისი უტიფრობით სარკაზმითა და ცინიზმით  საზოგადოებისთვის ღია გამოწვევად იქცა.

ამას შედეგად მოყვა ცალკეული მოქალაქეების, „ქართული მარშის“ და ზოგიერთი სასულიერო პირის მკვეთრი რეაგირება.

ჩვენ მხარს ვერ დავუჭერთ ძალადობრივ ქმედებებს. ამასთან,  მკვეთრ  რეაგირებას ვითხოვთ ხელისუფლებისაგან, რომ მორწმუნეთ (იქნება ეს ქრისტიანი, მუსლიმი, იუდეველი თუ სხვა) უსამართლობისა და დაუცველობის განცდა მოეხსნათ.

გამოხატვის თავისუფლება, წარმოადგენს ფასეულობას, რომელიც დემოკრატიული საზოგადოების განვითარებისა და ადამიანის უფლებების დაცვის ერთ-ერთი მთავარი გარანტია, მაგრამ ხაზგასმით აღვნიშნავთ, რომ ამ უფლებით სარგებლობა განუყოფლადაა  დაკავშირებული პასუხისმგებლობასთან და სხვისი უფლებებისა და თავისუფლების დაცვასთან.

ამიტომაც, მივმართავთ მორწმუნეთ, ახალგაზრდებს, ინტელიგენციას, არასამთავრობო სექტორს, სახალხო დამცველს და საერთოდ ყველას, ძალისხმევა მივმართოთ იქითკენ, რომ სახელმწიფომ დროულად უზრუნველყოს რელიგიური გრძნობების სათანადოდ დაცვა, რითაც დაიცავს  ქვეყანის  სტაბილურობის  ერთ-ერთ მთავარ ფაქტორს“, – წერია საპატრიარქოს განცხადებაში.

18 მარტს გიორგი გაბუნიამ პირდაპირ ეთერში იესო ქრისტეს შესახებ თქვა: “მე ვფიქრობ, რომ იესო ქრისტემ საშინელი შეცდომა დაუშვა, როდესაც 2000 წლის წინ ისრაელში მოვიდა. უნდა მოსულიყო აჭარაში და ჯვარზე ვეღარ გააკრავდნენ, რადგან ხე აღარ იქნებოდა დარჩენილი, რადგან ბიძინამ ყველა ხე თავის ეზოში გადარგა”.

19 მარტს ტელეკომპანია „რუსთავი-2“-ის მიმდებარე ტერიტორიაზე ქართული მარშის წევრებმა აქცია გამართეს და გიორგი გაბუნიასგან მის მიერ გაკეთებული განცხადების გამო ბოდიშის მოხდა მოითხოვეს. აქცია დაპირისპირებაში გადაიზარდა. საბოლოოდ, პოლიციამ აქციის 6 მონაწილე დააკავა. 

რამდენიმე წუთის წინ ხნის წინ ცნობილი გახდა, რომ პოლიციამ რუსთავი 2-თან მომხდარი ინციდენტის გამო ლადო სადღობელაშვილი დააკავა.