აშშ საქართველოს მთავრობის სამშვიდობო ინიციატივას მიესალმება

საქართველოს მთავრობის დღევანდელი სხდომის დროს წარმოდგენილ ღონისძიებათა პაკეტს „ნაბიჯი უკეთესი მომავლისკენ“ საქართველოში აშშ-ის საელჩოც გამოეხმაურა. 

„აშშ მიესალმება საქართველოს შეთავაზებათა პაკეტს, რომელიც ადმინისტრაციული საზღვრის გასწვრივ კავშირების გამტკიცებას  ისახავს მიზნად.

ეს ზომები მიმართულია ადმინისტრაციული საზღვრის ორივე მხარეს ყველაზე მოწყვლადი მოსახლეობის საჭიროებებისკენ და უზრუნველყოფს მობილობის შესაძლებლობების ზრდას, საარსებო წყაროების გაუმჯობესებასა და განათლებაზე ხელმისაწვდომას.

მივესალმებით საქართველოს ვალდებულებას დიალოგისა და კონფლიქტის მშვიდობიანი გზით გადაჭრისთვის.

აშშ კიდევ ერთხელ ადასტურებს თავის მხარდაჭერას საქართველოს სუვერენიტეტისა და ტერიტორიული მთლიანობის მიმართ, მის საერთაშორისოდ აღიარებულ საზღვრებში“, – ნათქვამია განცხადებაში, რომელიც საქართველოში აშშ-ის საელჩოს ვებგვერდზე გამოქვეყნდა.

საქართველოს პრემიერ-მინისტრმა, გიორგი კვირიკაშვილმა მთავრობის დღევანდელ სხდომაზე ახალი სამშვიდობო ინიციატივა „ნაბიჯი უკეთესი მომავლისკენ“ წარადგინა.

პრემიერმინისტრის თქმით, ხელისუფლება შერიგებისა და ჩართულობის პოლიტიკის ფარგლებში, დგამს ნაბიჯებს, რომელიც მიზნად ისახავს აფხაზეთსა და ცხინვალის რეგიონებში მცხოვრები მოსახლეობის ჰუმანიტარული და სოციალურ-ეკონომიკური მდგომარეობის გაუმჯობესებას.

ინიციატივა სამ მიმართულებას გულისხმობს: პირველი მიმართულება ადმინისტრაციული გამყოფი ხაზების გასწვრივ ვაჭრობის გაფართოება და გამარტივება ახალი შესაძლებლობების შექმნის გზით; მეორე მიმართულება: ხარისხიანი განათლების მიღების დამატებითი შესაძლებლობების შექმნა და წვდომის გამარტივება განათლების ყველა საფეხურზე, როგორც ქვეყნის შიგნით, ისე საზღვარგარეთ; 

მესამე მიმართულება კი, ისეთი მექანიზმის შექმნაა, რომლითაც მარტივდება წვდომა იმ სარგებელზე, რომლებიც ქვეყნის განვითარების შედეგად, მათ შორის ევროინტეგრაციის გზაზე ხელმისაწვდომი გახდა-ეს არის უვიზო მიმოსვლის უფლება, თავისუფალი ვაჭრობის უფლება და ა.შ.