ქუთაისში „დედაენის კედელი“ გაიხსნა

დედაენის დღესთან დაკავშირებით, ქუთაისში კონკურსში „მოხატე ქალაქი დედაენით“ გამარჯვებული ესკიზით 100 კვ.მ ფართობის კედელი მოიხატა.

მარიამ ქებურიას და თამარ წახნაკიას ნამუშევარში შენარჩუნებულია კედლის პირველადი სახე და მიღებულია აგურის შენობისა და თანამედროვე ნახატის სინთეზი. ასევე გამოყენებული ფერთა პალიტრა მორგებულია გარემოს იერ-სახეს.

აღსანიშნავია ნამუშევრის შინაარსობრივი ნაწილიც, რომელზეც გამოსახულია როგორც ანბანის ელემენტები, ასევე ახალგაზრდა თაობის წიგნთან ურთიერთობით გამოწვეულ აღტაცება.გარდა ამისა, ახალგაზრდა მხატვრებმა ქუთაისს კიდევ ერთი ნახატი აჩუქეს წარწერით „ დედა ენა“ ,რომელიც ძირითადი ნამუშევრის ერთგვარი ლოგიკური გაგრძელებაა.

კონკურსი „მოხატე ქალაქი დედა ენით“ სსიპ ჟვანიას სკოლამ და ქუთაისის მერიამ ერთობლივად გამოაცხადეს და კონკურსში გამარჯვებული ესკიზით განახორციელეს.

საქართველოში დედაენის დღე 14 აპრილს 1990 წლიდან უკვე ოცდამეცხრედ აღინიშნება. უკვე 40 წელი გავიდა მას შემდეგ, რაც საქართველოში რუსული გეგმა ჩავარდა და კონსტიტუციაში სახელმწიფო ენის შესახებ ჩანაწერი ვერ შეცვალეს.

ამას 1978 წლის 14 აპრილს სტუდენტები მანიფესტაციებით დაუპირისპირდნენ. მოსკოვი საქართველოში ქართული ენი, როგორც სახელმწიფო ენის სტატუსის გაუქმებას აპირებდა. ამ მანიფესტაციების შედეგად საქართველოს ქართული ენა სახელმწიფო ენის სტატუსით შეუნარჩუნდა.