პოლიცია: პატრიარქის დაცვის წევრები თავად იტყვიან, დარჩებიან თუ წავლენ

ტელეკომპანია "იბერიის" ცნობით, კათოლიკოს-პატრიარქის ილია მეორის დაცვის 17 წევრი სამსახურიდან გაათავისუფლეს. 

პატრიარქის დაცვის სამსახურის უფროსის სოსო ოხანაშვილის გადადგომის შესახებ ინფორმაცია მეუფე დიმიტრი შიოლაშვილმა 23 თებერვალს დადასტურა. მანამდე, პატრიარქის მდივანმა მიქაელ ბოტკოველმა თქვა, რომ ილია მეორის ბერლინიდან დაბრუნების შემდეგ ოხანაშვილი საპატრიარქოში არ უნახავთ. მალევე, სოსო ოხანაშვილი გამოჩნდა და თქვა, რომ ბოტკოველმა იცრუა.

დეკანოზ მიქაელ ბოტკოველმა ოხანაშვილთან სიტყვიერი დაპირისპირების გამო პატრიარქის მდივნის თანამდებობა დატოვა. თუმცა საკუთარი გადაწყვეტილების მიუხედავად, ილია მეორის მდივნის თანამდებობაზე რჩება, რადგან როგორც მოგვაინებით, საპატრიარქოს ფონდის ხელმძღვანელმა ლაშა ჟვანიამ თქვა, დეკანოზს უწმინდესთან გადაწყვეტილება არ შეუთანხმებია, მდივნის დანიშვნა-გათავისუფლების საკითხს კი პატრიარქი წყვეტს.

რაც შეეხება სოსო ოხანაშვილის საკითხს, ლაშა ჟვანიას თქმით, პატრიარქის დაცვის სამსახური შინაგან საქმეთა სამინისტროს დაქვემდებარებაშია, შესაბამისად, სამსახურის უფროსის დანიშვნა-გათავისუფლების გადაწყვეტილება უწყებამ უნდა მიიღოს. ოხანაშვილმა განაცხადა, რომ საკუთარი გადაწყვეტილებას რამდენიმე დღეში გაასაჯაროებს.

რაც შეეხება, პატრიარქის დაცვის სამსახურის 17 წევრს, შსს-ს დაცვის პოლიციის პრესსამსახურის ცნობით, "ეს ადამიანები ამ დრომდე დაცვის პოლიციის თანამშრომლები არიან. თუ რაიმე გადაწყვეტილებას მიიღებენ, განცხადებასაც თავად გააკეთებენ".