პროტოპრესვიტერი ზვიადაძე: საპატრიარქო არ თვლის, რომ კანონმდებლობის გამკაცრებაა საჭირო

რელიგიური გრძნობების შესახებ კანონპროექტს პროტოპრესვიტერი გიორგი ზვიადაძე ეხმიანება. მისი თქმით, აუცილებელია საპატრიარქოს პოზიცია ზედმიწევნით ზუსტად გამოიკვეთოს, ვინაიდან ეს საპატრიარქოს ინიციატივაა.

პროტოპრესვიტერი განმარტავს, რომ საკითხებში საპატრიარქოს ჩართულობა საერთო სიკეთეს ემსახურება და არ უკავშირდება მხოლოდ საქართველოს მართლმადიდებელ ეკლესიას. ამასთან, პროტოპრესვიტერი ამბობს, რომ საპატრიარქოსთვის დაუშვებელია ნებისმიერი აღმსარებლობის ადამიანის რელიგიური გრძნობების შეურაცხყოფა.

"საქართველოს საპატრიარქო არ თვლის, რომ აუცილებელია სისხლის სამართლის კანონმდებლობის გამკაცრება ამასთან დაკავშირებით. არამედ გვაქვს პოზიცია, რომ საჭიროა ამ საკითხზე ფიქრი და მსჯელობა. ამდენად ვფიქრიბთ, რომ საჭიროა გარკვეულ მიზნამდე მისვლა და მსჯელობა. საჭიროა შემუშავდეს პრინციპები და გარკვეული ორიენტირები, რათა დაცული იყოს გამოხატვის თავისუფლება და ამას არავითარი გარკვეული შეზღუდვა არ დაემუქროს, რადგან უაღრესად მნიშვნელოვანია. მაგრამ, ამავე დროს, ძალიან მკაფიო და მკვეთრი ზღვარი გაევლოს იმას თუ რა არის ეს გამოხატვის თავისუფლება და რა არის რელიგიური გრძნობების შეურაცხყოფა. რელიგიური გრძნობების შეურაცხყოფა ყოველთვის იწვევს დაპირისპირებას. ეს დაპირისპირება შეიძლება ძალიან გაღრმავდეს, რაც უაღრესად საზიანონ იქნება ჩვენი სახელმწიფოსთვის, ჩვენი საზოგადიებისთვის", - თქვა პროტოპრესვიტერმა.

რელიგიური გრძნობების შესახებ კანონის გამკაცრების ინიციატივას დღეს პრემიერის თანამშწე სოფიო ჯაფარიძეც გამოეხმაურა. სხვადასხვა რელიგიის წარმომადგენლები რელიგიური გრძნობების შესახებ კანონპროექტის გაცნობას ითხოვენ, რათა თავიანთი მოსაზრებები დააფიქსირონ.

"პატრიოტთა ალიანსის" წევრის, ემზარ კვიციანის მიერ ინიცირებული პროექტის მიხედვით, რელიგიური გრძნობების შეურაცხყოფა 1 წლამდე პატიმრობას ან ჯარიმას ითვალისწინებს. პროექტი 24 აპრილს ადამიანის უფლებათა კომიტეტში განიხილეს, თუმცა კენჭისყრიდან მოიხსნა, ვინაიდან გადაწყდა, რომ უნდა შეიქმნას სამუშაო ჯგუფი.