ევროკავშირი საქართველოში ადამიანის უფლებების დასაცავად გატარებულ რეფორმებს დადებითად აფასებს

ბრიუსელში, ევროკავშირსა და საქართველოს შორის ადამიანის უფლებების სფეროში ყოველწლიური დიალოგის მეთერთმეტე რაუნდი გაიმართა. შეხვედრაზე საქართველოში ადამიანის უფლებების სფეროში არსებული მდგომარეობას და ამ მიმართულებით, ქვეყნის ხელისუფლების მუშაობას შეეხებოდა. შეხვედრასთან დაკავშირებით, საქართველოში ევროკავშირის წარმომადგენლობამ განცხადება გაავრცელა.

განცხადების თანახმად, ევროკავშირი საქართველოში ადამიანის უფლებების დაცვის კუთხით გატარებულ რეფომებს დადებითად აფასებს. გაერთიანების ცნობით, 2017 წელს ამ მიმართლებით სტაბილური წინსვლა იყო. 

განცხადების ტექსტს სრულად გთავაზობთ:

"ევროკავშირმა მხედველობაში მიიღო ეუთოს/ეუთოს დემოკრატიული ინსტიტუტებისა და ადამიანის უფლებების ოფისის (OSCE/ODIHR) საარჩევნო სადამკვირვებლო მისიის ანგარიში, რომელშიც 2017 წლის ოქტომბერ–ნოემბერში საქართველოში ჩატარებული ადგილობრივი არჩევნები ზოგადად დადებითადაა შეფასებული, და ხაზი გაუსვა, რომ უნდა გამოსწორდეს საარჩევნო საჩივრების ეფექტიანად განხილვისა და მათზე რეაგირების პროცესში გამოვლენილი ხარვეზები, ასევე, უკეთ იქნეს უზრუნველყოფილი თანაბარი საარჩევნო პირობები. მხარეებმა აღნიშნეს, რომ მიუხედავად მედიის მზარდი თავისუფლებისა და აქტიურობისა, რამაც ხელი შეუწყო მეტი პოლიტიკური დებატის წარმართვას, თავისუფალი და პლურალისტური მედიაგარემოსა და პოლიტიკური პლურალიზმის შენარჩუნება არჩევნების დემოკატიულად ჩატარების უმნიშვნელოვანესი წინაპირობაა. ევროკავშირმა მოუწოდა საქართველოს, უზრუნველყოს ქალებისა და ეროვნული უმცირესობების წარმომადგენლების მეტი მონაწილეობა პოლიტიკაში.

ევროკავშირმა კიდევ ერთხელ დაადასტურა საქართველოს სუვერენიტეტისა და ტერიტორიული მთლიანობის მხარდაჭერა საერთაშორისოდ აღიარებულ საზღვრებში; ასევე, კიდევ ერთხელ გამოთქვა შეშფოთება ამა წლის თებერვალში, ცხინვალში, პატიმრობაში მყოფი საქართველოს მოქალაქის, არჩილ ტატუნაშვილის სიცოცხლის ხელყოფასთან დაკავშირებით; ასევე, საქართველოს რეგიონებში – აფხაზეთსა და ცხინვალის რეგიონში/სამხრეთ ოსეთში – ადამიანის უფლებების სფეროში ზოგადი მდგომარეობის გაუარესებასთან დაკავშირებით, განსაკუთრებით ეთნიკური დისკრიმინაციის, თავისუფალი გადაადგილების, საკუთრების უფლების, მშობლიურ ენაზე განათლების მიღების, ასევე, იმ მუდმივი დაბრკოლებების შესახებ, რომლებიც ექმნებათ იძულებით გადაადგილებულ პირებს თავიანთ სახლებში უსაფრთხო და ღირსეული დაბრუნების უფლების განხორციელების პროცესში. ამ სამწუხარო კონტექსტში, ევროკავშირი და საქართველო შეთანხმდნენ, რომ აუცილებელად უნდა მიეცეს შესაძლებლობა , რომელიც საერთაშორისო ორგანიზაციების ფარგლებში მოქმედ ადამიანის უფლებების საერთაშორისო მონიტორინგის მექანიზმს, ასევე, ევროკავშირის სადამკვირვებლო მისიას (EUMM), დაუბრკოლებლად შევიდნენ საქართველოს რეგიონებში – აფხაზეთსა და ცხინვალის რეგიონში/სამხრეთ ოსეთში.

მხარეებმა, ასევე აღნიშნეს, რომ რუსეთის ფედერაცია ვალდებულია, შეასრულოს ევროკავშირის შუამავლობით მიღწეული 2008 წლის 12 აგვისტოს შეთანხმება ცეცხლის შეწყვეტის შესახებ. ევროკავშირი მიესალმა საქართველოს მთავრობის ახალ სამშვიდობო ინიციატივას, რომელიც სიკეთეს მოუტანს ადმინისტრაციული გამყოფი ხაზების ორივე მხარეს მცხოვრებ მოსახლეობას და გაამარტივებს ვაჭრობას, განათლებას, გადაადგილებას და ხელს შეუწყობს ადამიანებს შორის კონტაქტების დამყარებასა და ნდობის აღდგენას გაყოფილ ჯგუფებს შორის. 

ევროკავშირმა მოუწოდა საქართველოს, რომ გაგრძელდეს ანტიდისკრიმინაციული კანონის ეფექტიანად განხორცილება, მათ შორის, კერძო სექტორში. დიალოგის მონაწილეებმა ხაზგასმით აღნიშნეს ადამიანის უფლებების საყოველთაოდ აღიარებული პრინციპების ერთგულება, რელიგიური აღმსარებლობის, მრწამსის, რასის, სქესის, ენის, სექსუალური ორიენტაციის, გენდერული იდენტობის, შესაძლებლობის ან რაიმე სხვა ნიშნის მიუხედავად. ევროკავშირმა ხაზი გაუსვა საქართველოს მიერ განხორციელებულ წინსვლას ეთნიკური უმცირესობების დაცვისა და მათი სამოქალაქო ინტეგრაციის საკითხებში და მოუწოდა მთავრობას, გაგრძელდეს ამ მიმართულებით ნაბიჯების გადადგმა. ევროკავშირმა იმედი გამოთქვა, რომ შინაგან საქმეთა სამინისტროში ახლადშექმნილი ადამიანის უფლებების დეპარტამენტი, ხელს შეუწყობს სიძულვილით გამოწვეულ დანაშაულზე ეფექტიან რეაგირებას და მოუწოდა მთავრობას, კიდევ უფრო დაიხვეწოს კოორდინაციის მექანიზმი ადამიანის უფლებების სფეროში. 

ევროკავშირი მიესალმა საქართველოს ინიციატივებს, რომლებიც ეფუძნება ქალთა მიმართ ძალადობის და ოჯახური ძალადობის პრევენციისა და აღკვეთის ,,სტამბოლის კონვენციით“ განსაზღვრულ ვალდებულებებს. დიალოგის მონაწილეები შეთანხმდნენ, რომ უნდა გაძლიერდეს ქვეყანაში მოქმედი ინსტიტუტების შესაძლებლობები ქალთა საკითხების მხარდასაჭერად. კერძოდ, ევროკავშირმა მოუწოდა საქართველოს, უფრო აქტიურად გატარდეს ის ღონისძიებები, რომლებიც უზრუნველყოფს ქალთა და გოგონათა მიმართ ძალადობის პრევენციას, ძალადობასთან დაკავშირებული საქმეების გამოძიებას და მსხვერპლთა დაცვას. 
ევროკავშირმა მხედველობაში მიიღო ის ფაქტი, რომ შრომის უსაფრთხოების შესახებ კანონი მიღებულია, თუმცა აღნიშნა, რომ მეტი ძალისხმევაა საჭირო იმის უზრუნველსაყოფად, რომ შრომის ინსპექცია გახდეს სრულფასოვანი და რომ ახალი კანონი თანდათანობის ეკონომიკის ყველა სექტორზე გავრცელდეს. ევროკავშირმა მოუწოდა საქართველოს, გააძლიეროს შიდა სოციალური დიალოგი და განაგრძოს ,,შრომის საერთაშორისო ორგანიზაციასთან“ მჭიდრო თანამშრომლობა.

ევროკავშირმა აღნიშნა, რომ მოწყვლად და სიღარიბეში მყოფ ბავშვთა საკითხებში წინსვლაა მიღწეული და თხოვნით მიმართა ხელისუფლების შესაბამის სტრუქტურებს, მეტი ძალისხმევა გამოიჩინონ ორსულთა და ახალშობილთა პირველადი ჯანდაცვის ხარისხის გასაუმჯობესებლად.
საქართველომ მნიშვნელოვან წინსვლას მიაღწია წამებისა და ცუდი მოპყრობის პრევენციის საკითხში. ევროკავშირმა ხაზგასმით აღნიშნა, რომ საჭიროა ამ წინსვლის განმტკიცება. ევროკავშირმა მოუწოდა საქართველოს, გაგრძელდეს მუშაობა ისეთი საგამოძიებო მექანიზმის მისაღებად, რომელიც იქნება დამოუკიდებელი და მიუკერძოებელი და გამოიძიებს სამართალდამცავი ორგანოების წარმომადგენელთა მიერ ადამიანის უფლებების და თავისუფლებების სავარაუდო დარღვევებს. 

ევროკავშირმა კიდევ ერთხელ გამოთქვა კმაყოფილება სამოქალაქო საზოგადოების მონაწილეობასთან დაკავშირებით იმ პროცესში, რომელიც წინ უძღოდა სახალხო დამცველის დანიშვნას 2017 წლის დეკემბერში. 
მხარეები შეთანხმდნენ, ასევე, რომ გააგრძელებენ და კიდევ უფრო დახვეწენ მათ შორის არსებულ კარგ თანამშრომლობას ადამიანის უფლებების საკითხებზე მრავალმხრივი ფორმატების ფარგლებში, როგორიცაა გაერო, ეუთო და ევროპის საბჭო.

ევროკავშირი დაინტერესდა აფგან მუხთარლის საქმის გამოძიების მიმდინარეობით და მოუწოდა, გაგრძელდეს საქართველოში მცხოვრები ადამიანის უფლებების დამცველთათვის უსაფრთხო გარემოს უზრუნველყოფა", - წერია ევროკავშირის განცხადებაში.

დიალოგი მნიშვნელოვან როლს თამაშობს, ასევე, ევროკავშირსა და საქართველოს შორის გაფორმებული ,,ასოცირების შესახებ შეთანხმების“ განხორციელების მონიტორინგის პროცესში.