კლუბ ბასიანის გახსნის საკითხი ხვალინდელ შეხვედრაზე გაირკვევა

კლუბ „ბასიანის“ გახსნის საკითხი ხვალ განიხილება. ამის შესახებ შინაგან საქმეთა სამინისტროში გამართული შეხვედრის შემდეგ, კლუბის ერთ-ერთმა დამფუძნებელმა ივანე გეთიამ განაცხადა. ინფორმაციას 1tv-ი ავრცელებს. 

მისი თქმით, დღევანდელ შეხვედრაზე ძირითადად ფორმატი და ხვალინდელი დღის წესრიგი იქნა განხილული, დეტალებზე საუბარი არ ყოფილა.

„როდის გაიხსნება „ბასიანი“ ეს საკითხიც განიხილება ხვალ. ეს ძალიან მსხვრევადი საკითხია, ძალიან დიდი დაფიქრება და ყურადღება სჭირდება. შესაბამისად, კიდევ ერთხელ ვიმეორებ, ყველაფერი მოვიტოვეთ ხვალ, ვინაიდან არ არის ერთი, ორი და სამი კაცის, ან კლუბის აქცია. ეს არის ხალხის ხმა. შესაბამისად, ჩვენ გვჭირდება ლეგიტიმაცია ჩვენივე თანამებრძოლებისგან, ამ შეხვედრებზე  დეტალურად რომ გავიაროთ ეს ყველაფერი. ვალდებულები ვიყავით, რომ ეს ფორმატი დღეს დაგვედგინა და უფრო მომზადებულები შევხვედროდით ერთმანეთს“, – განაცხადა გეთიამ.

დღეს შსს-ში გიორგი გახარიას და თეთრი ხმაურის წარმომადგენლებს შორის შეხვედრა გაიმართა. როგორც შეხვედრის შემდეგ როგორც გახარიამ განმარტა, ღამის კლუბებში შესვლა პოლიციამ ნარკოტიკებით ინტოქსიკაციის შემთხვევების გახშირებისა და კლუბებში რეალიზაციის ფაქტების დადასტურების შემდეგ გადაწყვიტა.

წუხელ მინისტრსა და მოძრაობის წევრებს შორის შეხვედრა საათზე მეტი გაგრძელდა. შეხვედრის დასრულების შემდეგ, მიღწეული შეთანხმებები აქციის მონაწილეებს მოძრაობის წევრმა ბექა წიქარიშვილმა გააცნო, თუმცა მინისტრის შეთავაზებები თხმ-ს წევრთა და აქციის მონაწილეთა ერთ ნაწილს არ მოეწონა და უკმაყოფილება გამოითქვა. მოგვიანებით, აქციის მონაწილეებს შს მინისტრმა მიმართა, მათ ბოდიში მოუხადა და პირობა დადო, რომ დანაპირები შესრულდება. საბოლოოდ, თეთრი ხმაურის მიერ ორგანიზებული აქციის მონაწილეები პარლამენტის ტერიტორიიდან ავტობუსებით გაიყვანეს.

თეთრი ხმაურის მოძრაობამ აქციის დასასრულს განაცხადა, რომ ამ ერთი კვირის განმავლობაში შს სამინისტროსა და მინისტრის მიერ დანაპირების შესრულებას დააკვირდებიან, ამასთან შემდეგ შაბათს მორიგი აქცია დააანონსა.

ამის ფონზე მიმდინარეობდა კონტრაქციაც, რომელსაც მალევე ქართული მარში შეუერთდა. თხმ-ის აქციის დასრულების მიუხედავად, ნეონაცისტური ჯგუფები პარლამენტის ტერიტორიას არ ტოვებდნენ. ამასთან, მთელი დღის განმავლობაში მათსა და პოლიციას შორის, რომელიც თეთრი ხმაურის აქციას იცავდა, სიტყვიერი და ფიზიკური დაპირისპირება რამდენჯერმე მოხდა - ისინი პოლიციის კორდონის გარღვევას ცდილობდნენ. პოლიციამ 10-მდე ადამიანი წინააღმდეგობის გაწევისთვის დააკავა.

თბილისში 12-13 მაისს თეთრი ხმაურის მოძრაობამ და ახალგაზრდებმა აქციები მას შემდეგ დაიწყეს, რაც 11 მაისის ღამეს, თბილისის ღამის კლუბებში შსს-მ სპეცოპერაციები ჩაატარა. მანამდე 8 ნარკორეალიზატორი დააკავეს. ახალგაზრდებმა ჩათვალეს, რომ სამართალდამცველებმა სპეცოპერაციისას ძალას გადაამეტეს და ამიტომ, აქციები იმ ღამესვე გამართეს.