კობახიძე: საქართველო სტაბილურობისა და საინვესტიციო მიმზიდველობით რეგიონის ერთ-ერთი ლიდერია

სტამბოლში შავი ზღვის ეკონომიკური თანამშრომლობის საპარლამენტო ასამბლეის (PABSEC) 25-ე წლისთავისადმი მიძღვნილი სამიტი დაიწყო. სამიტში საქართველოს პარლამენტის თავმჯდომარე ირაკლი კობახიძეც მონაწილეობს. ინფორმაციას პარლამენტის პრესსამსახური ავრცელებს.

სამიტზე სიტყვით გამოსვლისას კობახიძემ შავი ზღვის ეკონომიკური თანამშრომლობის ორგანიზაციის საპარლამენტო ასამბლეის მიზანსა და მნიშვნელობაზე გაამახვილა ყურადღება.

"გასული 25 წლის განმავლობაში მსოფლიომ შეძლო დაენახა საქართველოს ერთგულება მშვიდობის, დემოკრატიის, უსაფრთხოების, კეთილდღეობისა და ეკონომიკური განვითარებისადმი“, - განაცხადა ირაკლი კობახიძემ.

მისივე თქმით, საქართველომ შეძლო სუსტი სახელმწიფოდან საბაზრო ეკონომიკად გარდაქმნა, ძლიერი ინსტიტუტების ჩამოყალიბება და თავისუფალი ეკონომიკის განვითარებისთვის შესაბამისი პირობების შექმნა.

კობახიძის შეფასებით,  2014 წელს ევროკავშირთან ასოცირების შეთანხმების გაფორმება იყო უმნიშვნელოვანესი მიღწევა ევროკავშირთან ურთიერთობის მიმართულებით და ქვეყნის შემდგომი განვითარებისა და გარდაქმნისთვის ძლიერ სტიმულს წარმოადგენდა.

შავი ზღვის რეგიონის უსაფრთხოებისა და მდგრადი განვითარების შესახებ საუბრისას, ირაკლი კობახიძემ აღნიშნა, რომ სამწუხაროდ, 21-ე საუკუნეში, კვლავ უხეშად ირღვევა შავი ზღვის რეგიონის ქვეყნების სუვერენიტეტი და ტერიტორიული მთლიანობა.

"ჩვენ მნიშვნელოვანი გამოწვევების წინაშე ვდგავართ შავი ზღვის რეგიონში: ამ ორგანიზაციის დამფუძნებელი წევრი აგრძელებს გაეროს ქარტიის ძირითადი პრინციპების აშკარა დარღვევას და თავად ამ ორგანიზაციის არსი მიზნად ისახავს „შავი ზღვის რეგიონის მშვიდობის, სტაბილურობისა და კეთილდღეობის რეგიონად გარდაქმნას“, როგორც ეს განცხადებულია ჩვენი ორგანიზაციის ქარტიაში. ამ თვალსაზრისით, ჩვენ უნდა ვისწრაფოდეთ ვიპოვოთ მშვიდობიანი გზა გაეროს ქარტიისა და ჰელსინკის დეკლარაციის პრინციპების საფუძველზე, რათა გადავჭრათ არსებული კონფლიქტები შავი ზღვის რეგიონის სასარგებლოდ და საკეთილდღეოდ",- განაცხადა ირაკლი კობახიძემ.