ზაქარეიშვილი: რუსეთი დიდ ხანს მუშაობდა, რათა სირიას ოკუპირებული ტერიტორიები ეღიარებინა

რუსეთი ძალიან დიდი ხნის განმავლობაში მუშაობდა სირიაზე, რათა მას აფხაზეთი და „სამხრეთ ოსეთი“ „დამოუკიდებელ სახელმწიფოებად ეღიარებინა“. ამის შესახებ შერიგებისა და სამოქალაქო თანასწორობის საკითხებში ყოფილმა სახელმწიფო მინისტრმა პაატა ზაქარეიშვილმა განაცხადა. ინფორმაციას სააგენტო "ინტერპრესნიუსი" ავრცელებს.

ზაქარეიშვილი მიიჩნევს, რომ საქართველოს ხელისუფლებამ ოკუპირებული რეგიონების არაღიარების  პოლიტიკის მიმართულებით ყურადღება მოადუნა. 

„სირია დიდხანს ფიქრობდა ამაზე, არაერთი დელეგაცია იყო ჩასული ბოლო წლების განმავლობაში დამასკოში, კონტაქტები იყო რუსეთის დონეზე. რუსეთი ცდილობდა, დაერწმუნებინა სირია წასულიყო ამ ნაბიჯზე. როგორც ჩანს, სირიამ ვერ გაუძლო ზეწოლას. ამდენ ხანს რომ არ მომხდარა ეს „აღიარება“ მეტყველებს, რომ სირიაში სხვადასხვა მოსაზრებები იყო, იმდენად დარტყმის ქვეშ არის სირია, ისე გარიყულია მსოფლიოსგან და მხოლოდ რუსეთზეა დამოკიდებული, რომ მე მგონია, საქართველოს ხელისუფლება აქ უძლური იქნებოდა. სირიის დღევანდელი რეჟიმი გადაარჩინა რუსეთმა. შესაბამისად, მან ამ აღიარებით მოსკოვისადმი მადლიერება გამოხატა. მაგრამ რეჟიმის გადარჩენა ერთია და სირიის მომავლის გადარჩენა - მეორე. აქ უკვე საქართველო უნდა იყოს პრინციპული და სირიას ძვირად დაუსვას ეს გადაწყვეტილება. რა თქმა უნდა, სირიის მიერ აფხაზეთის და „სამხრეთ ოსეთის“ აღიარება არ არის კარგი, მაგრამ ამით ისტორია არ მთავრდება. სირია მოწყვლადი სახელმწიფოა და დაშლის ქვეშ არის, მან თავისი უგუნური ნაბიჯით საქართველო აქცია თავის მოწინააღმდეგედ. საკმარისია სირიაში დაიწყოს დეზინტეგრაციის პროცესები, რომ საქართველოს იმედი მას აღარ უნდა ჰქონდეს. საქართველოს სახით შეიძლება მიიღოს სახელმწიფო, რომელიც აღარ დაინდობს. ახლა საქართველოს აქვს შანსი და საშუალება, უგულვებელყოს სირიის ინტერესები, როცა ამის რეალობა დადგება“, - განაცხადა ზაქარეიშვილმა.

ზაქარეიშვილი მიიჩნევს, რომ საქართველომ სირიის პასუხისმგებლობის საკითხი უნდა დააყენოს გაეროში და ყველგან "სერიოზული განგაში უნდა ატეხოს". 

"ახლა ძალიან მნიშვნელოვანია, რომ არაბულ სახელმწიფოთაა დარაზმვა მოხდეს სირიის გადაწყვეტილების წინააღმდეგ და ამ მიმართულებით უნდა იმუშაოს თბილისმა. რუსეთის წინააღმდეგ შეიძლება საუბარი, მაგრამ სირია სუვერენული სახელმწიფოა და მარტო რუსეთზე ყურადღების გადატანა არ გამოვა. სერიოზულად უნდა გავილაშქროთ სირიის წინააღმდეგ“, - განაცხადა პაატა ზაქარეიშვილმა.

სირიის მიერ აფხაზეთისა და სამხრეთ ოსეთის რეგიონების აღიარებასთან დაკავშირებით, საქართველო სირიასთან დიპლომატიურ ურთიერთობებს წყვეტს. ამ საკითხს Twitter-ზე საგარეო უწყების ხელმძღვანელი, ვიცეპრემიერი მიხეილ ჯანელიძეც გამოეხმაურა.

ოკუპირებელ აფხაზეთსა და დეფაქტო ცხინვალის მთავრობას ამჟამად აღიარებს რუსეთი, ვენესუელა,  ნიკარაგუა, ნაურუ და სირია.