გაეროში სირიის მიერ საქართველოს ოკუპირებული რეგიონების აღიარებაზე განცხადება გაკეთდა

2018 წლის 29 მაისს, სირიის რეჟიმის მიერ ოკუპირებული აფხაზეთისა და სამხრეთ ოსეთის აღიარებაზე განცხადება გაეროშიც გაკეთდა.

გაერთიანებული ერების ორგანიზაციაში საქართველოს მუდმივმა წარმომადგენელმა პრესკონფერენცია გამართა. კახა იმნაძემ დამასკოს გადაწყვეტილება საერთაშორისო კანონის დარღვევად შეაფასა და საქართველოს საგარეო საქმეთა სამინისტროს მიერ გავრცელებული ოფიციალური განცხადება დეტალურად განმარტა.

დიპლომატმა ასევე დასძინა, რომ სირიის რეჟიმის მიერ ოკუპირებული აფხაზეთისა და სამხრეთ ოსეთის ეგრეთწოდებული დამოუკიდებლობის აღიარება რუსეთის გავლენის შედეგია.

"სირიაში ბაშარ ალ ასადის რეჟიმმა, კიდევ ერთი არალეგალური გადაწყვეტილება მიიღო. საქართველოს ოკუპირებული რეგიონების აფხაზეთისა და სამხრეთ ოსეთის დამოუკიდებლობის აღიარებით, დამასკომ საერთაშორისო კანონი დაარღვია. ეს ტერიტორიები ამ დრომდე რჩება რუსეთის უკანონო სამხედრო ოკუპაციის ქვეშ. საქართველოს საგარეო საქმეთა სამინისტროს ოფიციალურ განცხადებაში აღნიშნულია, რომ აფხაზეთისა და სამხრეთ ოსეთის ეგრეთწოდებული დამოუკიდებლობის აღარებით, ასადის რეჟიმმა მხარი დაუჭირა რუსეთის ფედერაციის მიერ საქართველოს წინააღმდეგ განხორციელებულ სამხედრო აგრესიას, აფხაზეთისა და ცხინვალის რეგიონების უკანონო ოკუპაციასა და წლების განმავლობაში მიმდინარე ეთნიკურ წმენდას. მინდა განვაცხადო, რომ ეს გადაწყვეტილება მოულოდნელი არ ყოფილა იმ ქმედებების გათვალისწინებით რაც ასადის რეჟიმმა საკუთარი ხალხის მიმართ განახორციელა,"- თქვა საქართველოს წარმომადგენელმა გაეროში კახა იმნაძემ.

სირიამ საქარველოს ოკუპირებული რეგიონები, აფხაზეთი და ცხინვალის რეგიონი დამოუკიდებელ სახელმწიფოებად აღიარა.

მომხდარი ფაქტი შეაფასეს ნატოში. ნატოს სპიკერის თქმით, სირიის გადაწყვეტილება საერთაშორისო საზოგადოების აზრს ვერ შეცვლის. ევროკავშირმა საქართველოს ტერიტორიული მთლიანობის მხარდამჭერი განცხადება გამოაქვეყნა.

ოკუპირებელ აფხაზეთსა და დეფაქტო ცხინვალის მთავრობას ამჟამად აღიარებს რუსეთი, ვენესუელა,  ნიკარაგუა, ნაურუ და სირია.