კახა იმნაძე: ალანიის რესპუბლიკის და სამაჩაბლოს ახლანდელი სახელწოდებები კომუნისტების გამონაგონია

გაერთიანებული ერების ორგანიზაციაში საქართველოს მუდმივმა წარმომადგენელმა კახა იმნაძემ 29 მაისს, სირიის რეჟიმის მიერ ოკუპირებული აფხაზეთისა და სამხრეთ ოსეთის აღიარებასთან დაკავშირებით პრესკონფერენცია გამართა.

როგორც კახა იმნაძემ თქვა, ასადის რეჟიმმა მხარი დაუჭირა რუსეთის ფედერაციის მიერ საქართველოს წინააღმდეგ განხორციელებულ სამხედრო აგრესიას, აფხაზეთისა და ცხინვალის რეგიონების უკანონო ოკუპაციასა და წლების განმავლობაში მიმდინარე ეთნიკურ წმენდას. 

"ოკუპირებულ ტერიტორიებზე ეთნიკური წმენდა დღესაც გრძელდება. ამის მიზანი რეგიონში არასტაბილურობის შექმნის გარდა, არის ის, რომ აიძულოს საქართველო, გადაუხვიოს არჩეული გზას. თუმცა, ეს არ მოხდება, რადგან ეს არის ქართველი ხალხის მიერ არჩეული გზა. ეს არის გზა, რომელსაც საქართველო 100 წლის წინ დაადგა, როდესაც პირველი დემოკრატიული რესპუბლიკა გამოაცხადა. ეს არის გზა, რომელიც დაფუძნებულია თანასწორობის დემოკრატიულ პრინციპებზე", – განაცხადა კახა იმნაძემ.

"თვითგამორკვევა ნამდვილად არ არის ის, როდესაც შენი მოსახლეობის 75%-ზე მეტს გადაასახლებ და დარჩენილებთან თოფის ლულის ქვეშ ე.წ. რეფერენდუმს ჩაატარებ, შემდეგ კი, ამ რეფერენდუმის შედეგებზე დაყრდნობით მოითხოვ თვითგამორკვევას.

ასევე საოცარია, როდესაც ამ თვითგამოცხადებული ე.წ. რესპუბლიკების ლიდერები ითხოვენ ინტეგრაციას სხვა სახელმწიფოსთან. ეს არ არის თვითგამორკვევა. ეს არის მანიპულაცია. ასეთ შემთხვევაში ყველაზე მარტივი, შევხედოთ გეოგრაფიას. ჩვენ გვაქვს ბუნებრივი საზღვარი რუსეთსა და საქართველოს შორის – ეს არის კავკასიის მთები. სამხრეთ და ჩრდილოეთ ოსეთი არასდროს არსებობდა. ყოველთვის იყო ალანიის რესპუბლიკა და სამაჩაბლო. ყველაფერი დანარჩენი კომუნისტების გამოგონილია, როდესაც მათ დაიპყრეს საქართველო. მინდა ასევე ვთქვა, რომ რუსეთი აგრძელებს საქართველო ორი რეგიონის ფაქტობრივი ანექსიისკენ მიმართული ნაბიჯების გადადგმას და ოკუპაციაც გრძელდება”, – განაცხადა გაეროში საქართველოს ელჩმა კახა იმნაძემ.

სირიამ საქარველოს ოკუპირებული რეგიონები, აფხაზეთი და ცხინვალის რეგიონი დამოუკიდებელ სახელმწიფოებად აღიარა.

მომხდარი ფაქტი შეაფასეს ნატოში. ნატოს სპიკერის თქმით, სირიის გადაწყვეტილება საერთაშორისო საზოგადოების აზრს ვერ შეცვლის. ევროკავშირმა საქართველოს ტერიტორიული მთლიანობის მხარდამჭერი განცხადება გამოაქვეყნა.

ოკუპირებელ აფხაზეთსა და დეფაქტო ცხინვალის მთავრობას ამჟამად აღიარებს რუსეთი, ვენესუელა,  ნიკარაგუა, ნაურუ და სირია.