„საქნახშირი“ აცხადებს, რომ პერსონალის უსაფრთხოების ახალ სისტემას ნერგავს

„საქნახშირის“ ინფორმაციით, კომპანია მეშახტეთა უსაფრთხოების მიზნით, ახალ სტანდარტებს ამკვიდრებს. პერსონალის მონიტორინგის, დეტექციისა და კავშირის ელექტრონული სისტემა ადმინისტრაციას საშუალებას აძლევს, ფლობდეს ინფორმაციას იმის შესახებ, თუ შახტის რომელ წერტილში იმყოფებიან მეშახტეები. აგრეთვე დაინერგა შახტში მავნე და ფეთქებადსაშიში აირების კონცენტრაციის კონტროლის ავტომატური სისტემა. კომპანიის ინფორმაციით, ახალი სისტემის დანერგვა კომპანიას მილიონნახევარი ლარი დაჯდა. ამის შესახებ 1TV წერს.

“იმ შემთხვევაში თუ შახტში, ჰაერის დაბინძურების ნორმა ზღვარს გადააჭარბებს, ავტომატურად გაითიშება ელექტრონული სისტემა და ადმინისტრაცია დასაქმებულებს უსაფრთხო ადგილზე გადაიყვანს”,-ამბობს „საქნახირის“ შრომის დაცვის და ტექნიკური უსაფრთხოების დირექტორი, დავით რობაქიძე.

არსებული ინფორმაციით, ბოლო წლების განმავლობაში “საქნახშირის“ ობიექტებზე 20-ზე მეტი ადამიანია გარდაცვლილი. საქნახშირი არის საქართველოს ინდუსტრიული ჯგუფის სრულ მფლობელობაში არსებული შვილობილი კომპანია. ის ნახშირის ერთადერთი მომპოვებელი კომპანიაა საქართველოში, სადაც მოქმედებს ორი ნახშირის საბადო ტყიბულში - მინდელი და ძიძიგური.