რა პროცედურაა საჭირო დეპუტატის დასაკავებლად

საქართველოს პარლამენტის რეგლამენტით განსაზღვრულია, თუ როდის აქვს სამართალდამცავ ორგანოს დეპუტატის დაკავების უფლება. ეს საკითხი აქტუალური მას შემდეგ გახდა, რაც "ნაციონალური მოძრაობის" დეპუტატის, აზერ სულეიმანოვის მიმართ პროკურატურამ მოქალაქეზე ძალადობის ბრალდებით სამართლებრივი დევნა დაიწყო.

რეგლამენტის თანახმად, დეპუტატის დაკავება ან დაპატიმრება, მისი ბინის, მანქანის, სამუშაო ადგილის ან პირადი ჩხრეკა შეიძლება მხოლოდ პარლამენტის თანხმობით. გამონაკლისია დანაშაულზე წასწრების შემთხვევა, რაც დაუყოვნებლივ უნდა ეცნობოს პარლამენტს. თუ პარლამენტი 48 საათის განმავლობაში არ მისცემს თანხმობას, დაკავებული ან დაპატიმრებული დეპუტატი დაუყოვნებლივ უნდა გათავისუფლდეს.

იმისთვის, რომ პროკურატურამ დეპუტატის წინააღმდეგ შესაბამისი საგამოძიებო მოქმედებების ჩატარება შეძლოს, მთავარმა პროკურორმა (აზერ სულეიმანოვის შემთხვევაში კი მთავარი პროკურორის მოვალეობის შემსრულებელმა), პარლამენტში წინადადება უნდა შეიტანოს. ამ წინადადებას პარლამენტის საპროცედურო საკითხთა კომიტეტი 5 დღის ვადაში შეისწავლის და წერილობით დასკვნას წარუდგენს პარლამენტის ბიუროს. ბიუროს კი ეს საკითხი პარლამენტის უახლოეს პლენარულ სხდომაზე გააქვს განსახილველად.

პლენარულ სხდომაზე საკითხის განხილვის შემდეგ გადაწყვეტილება მიიღება დადგენილებით.

პარლამენტის თავმჯდომარემ, ირაკლი კობახიძემ მარნეულში მომხდარ ინციდენტთან დაკავშირებით მთავარი პროკურორის მოვალეობის შემსრულებლისგან პარლამენტში შემოსულ წერილთან დაკავშირებით, პლენარულ სხდომაზე, განმარტება გააკეთა:

„ჩვენი პრეროგატივა არ არის არც ბრალის წაყენება, და მითუმეტეს, არც ვინმეს დადანაშაულება კონკრეტული დანაშაული ჩადენაში. როგორც უკვე მოგახსენეთ, აღძრულია სისხლის სამართლის საქმე, მათ შორის პარლამენტის წევრის მიმართ. მთავარი პროკურორი ვალდებულია შესაბამისი წერილით მიმართოს საქართველოს პარლამენტს და გააცნოს საქმის არსი. შესაბამისი წერილი შემოდის პარლამენტის თავმჯდომარის სახელზე. გამომდინარე იქედან, რომ ადრესატი არის არა პარლამენტის თავმჯდომარე, არამედ პარლამენტი, მე ვალდებული ვარ კანონმდებლობის თანახმად ეს გაგაცნოთ თქვენ და სწორედ ვიმოქმედე კანონმდებლობის შესაბამისად. რაც შეეხება იმას, თუ ვინ არის დამნაშავე და რა მოხდა, ამას ბუნებრივია დაადგენს გამოძიება და ეს არ არის ჩვენი პრეროგატივა“, - განაცხადა ირაკლი კობახიძემ.