ენმ-ის წევრებმა ოზურგეთის საკრებულოს შენობაში შიმშილობა დაიწყეს

ერთიანი ნაციონალური მოძრაობის წევრები: დათო მჟავანაძე, ბესო ქათამაძე და თორნიკე გოგუაძე ოზურგეთის საკრებულოს შენობაში შევიდნენ და შიმშილობა დაიწყეს. 

როგორც ისინი აცხადებენ, მათი მთავარი მოთხოვნაა, ინციდენტში მონაწილე ყველა მაღალი რანგის თანამდებობის პირებმა დატოვონ თანამდებობა და უმკაცრესად აგონ პასუხი სამართლის წინაშე.

ენმ-ში ამბობენ იმასაც, რომ ბესიკ ქათამაძეს ფიზიკური შეურაცხყოფა არა მარტო "ქართული ოცნების" დეპუტატმა ტარიელ აროშიძემ მიაყენა, არამედ მას საკრებულოს 4 წევრი დაესხა თავს.

ოპოზიციური პარტია საკრებულოს თავმჯდომარის გადადგომასაც ითხოვს. 

ოზურგეთის რაიონულმა სასამართლომ საკრებულოს “ნაციონალური მოძრაობის” დეპუტატის, ბესო ქათამაძის ცემის ფაქტზე ბრალებულ "ქართული ოცნების" დეპუტატს ტარიელ აროშიძეს აღკვეთი ღონისძიების სახით 5 000-ლარიანი გირაო შეუფარდა. 

მანამდე ოზურგეთის საკრებულოს “ნაციონალური მოძრაობის” დეპუტატ ბესო ქათამაძის ცემის ფაქტზე “ქართული ოცნების“ დეპუტატს ტარიელ აროშიძეს ბრალი წარედგინა.

ქათამაძის განცხადებით, ის სოციალურ ქსელში გამოქვეყნებული განცხადებების გამო „ქართული ოცნების“ წევრებმა დაიბარეს და სცემეს.