„გირჩის“ ორგანიზაცია მღვდელმსახურებს გასაუბრებით შეარჩევს

პოლიტიკური გაერთიანება „გირჩის“ ორგანიზაცია „ბიბლიური თავისუფლება“ „რეფორმაციას“ იწყებს. როგორც განცხადებაში წერია, ის პირველი ივლისიდან პირველ აგვისტომდე გაგრძელდება. ეს პერიოდი კი იმიტომ შეირჩა, რომ ამ დროს ჯარში გაწვევის პროცედურა შეჩერებულია, "ანუ ადამიანებს მღვდელმსახურის მოწმობის აღება არ ეჩქარებათ და აქვთ საკმარისზე მეტი დრო მოსამზადებლად და დასაფიქრებლად", - წერია განცხადებაში.

რეფორმაციის ფარგლებში, "ბიბლიური თავისუფლება" მღვდელმსახურებს გასაუბრებით შეარჩევს.  
პირველი ივლისიდანვე ნებისმიერ ადამიანს პირადად ან Facebook-ით, შეუძლია კონსულტაციის გავლა „გირჩის“ მოქმედ მღვდელმსახურებთან, რომლებიც გააცნობენ მათ გასაუბრების წესებს.

მიზეზი თუ რატომ დაიწყო „ბიბლიურმა თავისუფლებამ“ „რეფორმაცია“ შემდეგია: 

"ბიბლიური თავისუფლების" ცნობით, სახელმწიფო სამხედრო სამსახურის ერთჯერადი გადავადება ოფიციალურად 2000 ლარი ღირს. ბიბლიური თავისუფლება ამას, ფაქტობრივად, (ნებაყოფლობით შემოწირულობა 20 ლარი) უსასყიდლოდ აკეთებს. მათი თქმით, ეს იყო და არის გირჩის საჩუქარი საქართველოს ახალგაზრდობისთვის.

ამასთან, თავისუფლებაში ამბობენ, რომ სამხედრო სავადლებულო სამსახურიდან გათავისუფლებული 7 ათასი ადამიანიდან, სულ მცირე ექვსმა ათასმა ვერ გაიაზრა: რატომ და როგორ გათავისუფლდა მონობისგან; სად, და რა ორგანიზაციაში მოვიდა; რა რწმენის ადამიანები დაეხმარნენ და თავად რა პროცედურაში მიიღო მონაწილეობა.

"რა გვაძლევს ამის თქმის საფუძველს? გათავისუფლებული ათი ადამიანიდან ერთმა მოაწერა ხელი პეტიციას, რომელიც განმათავისუფლებლის არჩევნებში მონაწილეობის მხარდაჭერას გულისხმობდა და რომლის ერთერთი წინასაარჩევნო დაპირება სწორედ სავალდებულო სამხედრო სამსახურის გაუქმებაა; არასოდეს გამოუხატავს დაინტერესება იმ ხალხის მიმართ, ვინც დაეხმარა; დიდ ნაწილს დღემდე სექტანტები ვგონივართ, ვინც ისინი ბანალურად გამოიყენა. მოკლედ რომ ვთქვათ, პატივს არ სცემენ არც იდეას და არც მორწმუნე ადამიანებს", - წერია თავისუფლების განცხადებაში.

"გირჩმა" რელიგიური ორგანიზცია 2017 წლის აპრილში დააფუძნა. „ბიბლიური თავისუფლება“ ახალგაზრდებს სავალდებულო სამხედრო სამსახურის გადავადებაში ეხმარება.