მდინარაძე: ოპოზიცია ისე აკრიტიკებს მინისტრობის კანდიდატებს, რომ არც იციან ვინ არიან

ფრაქცია ქართული ოცნების თავმჯდომარე მამუკა მდინარაძე ამბობს, რომ ახალი მინისტრთა კაბინეტის 11-წევრიანი შემადგენლობა მომავალ კვირაში დასახელდება.

მამუკა მდინარაძე ოპოზიციას ტენდენციურობის გამო აკრიტიკებს და ამბობს, რომ ოპოზიციის წევრებმა არ იციან ვინ იქნებიან მინისტრობის კანდიდატები, თუმცა წინასწარ აცხადებენ, რომ მათ მხარს არ დაუჭერენ.

"ოპოზიციის ტენდენციურობაზე ისიც მიუთითებს, რომ არ იციან ადამიანების სახელები და გვარები, არ იციან პროგრამები და წინასწარ აცხადებენ, რომ მათ მხარს არ დაუჭერენ, ყველაფერი ცხადია. მათ აქვთ პოზიცია ტენდენციის თვალსაზრისით და არ აქვთ ხედვები, იქნება ემთხვევა მინისტრობის კანდიდატების წარმოდგენილი ხედვები მათ ხედვებს. რაც შეეხება მინისტრობის კანდიდატებს, მომდევნო კვირიდან უკვე გავივლით პრემიერთან ამ საკითხს, კონკრეტულ სახელებს და გვარებს მომავალ კვირაში გაიგებთ“,– განაცხადა მამუკა მდინარაძემ.

პარლამენტში მთავრობის განახლებული შემადგენლობისთვის ნდობის გამოცხადების პროცედურები მომავალი კვირიდან იწყება. მინისტრობის კანდიდატებს და პრემიერმინისტრს დეპუტატები 13 ივლისიდან მოუსმენენ. 

მთავრობას ნდობის მისაღებად 76 დეპუტატის მხარდაჭერა დასჭირდება. რაც შეეხება პრემიერმინისტრ მამუკა ბახტაძის მხრიდან მთავრობის წევრების წარდგენის საკითხს, გავრცელებული ინფორმაციით, მთავრობის ახალ შემადგენლობაში ფინანსთა, ეკონომიკისა და განათლების, მეცნიერების, კულტურისა და სპორტის მინისტრების თანამდებობაზე ახალი სახეები გამოჩნდებიან. მანამდე კი ქვეყანას დროებითი მთავრობა ჰყავს, რომელსაც საქართველოს პარლამენტმა ნდობა 20 ივნისს გამოუცხადა. 

პარლამენტმა მთავრობის სტრუქტურული ცვლილებები მესამე მოსმენით 5 ივლისს დაამტკიცა, რომლის თანახმადაც, 14 სამინისტრო 11-მდე შემცირდა.

მამუკა ბახტაძე 14 ივნისს ქართულმა ოცნებამ პრემიერმინისტრობის კანდიდატად დაასახელა. გიორგი კვირიკაშვილმა პრემიერმინისტრის თანამდებობა 12 ივნისს დატოვა.