თბილისის მერს პრეზიდენტის სასახლის მუზეუმად გადაკეთების იდეით მიმართეს

თბილისის მერიის ვებგვერდზე ქალაქის განვითარების შესახებ მოქალაქეთა იდეების მიღება მიმდინარეობს.

ერთ-ერთ იდეით მერს მოქალაქე მიხეილ დიაკონიძე მიმართავს და სთავაზობს, პრეზიდენტის სასახლე მეფეთა მუზეუმად გადაიქცეს. 

​დიაკონიძის მოსაზრებით, იდეა შესაძლოა მხოლოდ თბილისის მერიის გადაწყვეტილებაზე არ იყოს დამოკიდებული, თუმცა გასახმოვანებლად უკეთეს ტრიბუნას ვერ იპოვიდა.

" შემოვდივარ წინადადებით: ე.წ ,,პრეზიდენტის სასახლე" გადავაკეთოთ ,,მეფეთა მუზეუმად", კერძოდ შენობის ინფრასტრუქტურას არ დასჭირდება დიდად შეცვლა, გავაკეთოთ ჩვენი მეფეების ცვილის ფიგურები (შესაძლებელია გარდაცვლილი პრეზიდენტებიც) თან დავურთოთ საინფორმაციო დაფა და აუდიო ისტორია მისი მეფობის მნიშვნელოვან ეპიზოდებზე, რათა ტურისტებმა (და ეჭვი მაქვს ბევრმა ჩვენმა თანამოქალაქემაც) შეძლონ მათთვის გასაგებ ენაზე მოსიმინონ ისტორიები საქართველოს მეფეებისა და ქვეყნისთვის მნიშვნელოვანი და გარდამტეხი თარიღების შესახებ.

ამავე შენობაში გამოიყოფა სივრცე სადაც შეგვიძლია სუვენირების სახით გავყიდოთ საქართველოსთან ასოცირებული სიმბოლიკები (დროშა, გერბი, თუნდაც მეფეების მინი ფიგურები და ა.შ). სასახლე (შემდგომში მეფეთა მუზეუმი) იქნება ფინანსურადაც შემოსავლიანი, ასევე მოხდება ტურისტების ინფორმირება სუფრისა და სადღეგრძელოების გარეთ :)) , შენობა გახდება სავიზიტო ბარათი, სადაც მოსულ ადამიანს შესაძლებლობა ექნება თუნდაც ერთ დღეში წარმოდგენა შეიქმნას საქართველოს ისტორიისა და მდიდარი წარსულის შესახებ.

ამავე სასახლეში (შემდგომში მეფეთა მუზეუმში) შესაძლებელია ერთ-ერთ სივრცეში შესაძლებელია წარმოდგენილ იქნას მომავლის საქართველო არსებული და განვითარრების დიდი პერსპექტივის მქონე ადგილებითა და არსებული ობიექტებით (სვანეთი, ბაკურიანი, ბათუმი და სხვა); ეს იქნება ერთ სივრცეში მოკრძალებულად ჩატეული საქართველოს წარსული, აწმყო და მომავალი. და ბოლოს ვფიქრობ იმ მოკრძალებულ ფუნქციებს რაც პრეზიდენტს გააჩნია ახალი სასახლეც ეყოფა :)) p.s თვითონ სახელი ,,მეფეთა მუზეუმი" მომწონს და გოლიათი აღმაშენებლის ცვილის ფიგურას რომ წარმოვიდგენ უკვე შემდგარი პროექტი მგონია", - წერს მიხეილ დიაკონიძე.

ამ ეტაპზე ვებგვერდზე 168 მიმდინარე, 175 დაბლოკილი, 466 არშემდგარი იდეა ფიქსირდება. 9 იდეა განხილვის პროცესშია, ორი კი უკვე შეთანხმებულია.