სერგი კაპანაძე: მირზა სუბელიანმა ცრუ ჩვენება მოგვცა, როცა გვითხრა, რომ თბილისის პროკურორს არ შეხვედრია

ხორავას ქუჩაზე მოკლული ორი მოზარდის საქმეზე შექმნილმა პარლამენტის დროებითმა საგამოძიებო კომისიამ დღეს პროკურატურის წარმომადგენლები გამოკითხა. თბილისის ყოფილი პროკურორის, მიხეილ შაყულაშვილის ინფორმაციით, 1 დეკემბერს, ხორავას ქუჩაზე მომხდარი მკვლელობის შემდეგ მირზა სუბელიანი მასთან კაბინეტში პირადად მივიდა და რჩევა ჰკითხა, თუ რა გაეკეთებინა. თუმცა გაირკვა, რომ მირზა სუბელიანმა კომისიის წევრებს არასწორი ინფორმაცია მიაწოდა, რომელთაც გამოკითხვაზე უთხრა, რომ მიხეილ შაყულაშვილს არ შეხვედრია. ამის შესახებ კომისიის თავმჯდომარემ სერგი კაპანაძემ თქვა. ინფორმაციას 1tv ავცელებს.

სერგი კაპანაძემ განაცხადა, რომ სამწუხარო ტრადიციად ჩამოყალიბდა, როდესაც შსს-სა და პროკურატურის წარმომადგენლებს კითხავენ, კომისიის წევრებს მეტი კითხვა რჩებათ, ვიდრე პასუხებს იღებენ.

„კომისიამ თბილისის პროკურატურის ყოფილი მაღალჩინოსნების გამოკითხვა დაასრულა, რომლებიც მაშინ თბილისის პროკურატურას ხელმძღვანელობდნენ. მგონი, რაღაც სამწუხარო ტრადიციად ჩამოყალიბდა, რომ ყოველი შეხვედრის შემდეგ შსს-სა თუ პროკურატურის წარმომადგენლებთან უფრო მეტი კითხვა გვრჩება, ვიდრე პასუხებს ვიღებთ.

დღესაც სრულიად იგივე შთაბეჭდილება მაქვს. ძალიან ბევრ კითხვაზე პასუხი ვერ მივიღეთ. უფრო მეტიც, კითხვები დამატებით გაგვიჩნდა. მაგალითად საკითხი ისევ და ისევ გარკვეული არ არის, ვერსია, რომელიც პროკურატურას აქვს და იცავდა, საიდან მოდის და რას ეყრდნობოდა. ამ შემთხვევაში მე მ.კ-სთან მიმართებაში დამოკიდებულებას და გ.ბ-თან მიმართებაში არსებულ მტკიცებულებებს ვგულისხმობ. პასუხები ამასთან დაკავშირებით სამწუხაროდ ვერ მივიღეთ.

დღეს ერთი საინტერესო დეტალი გაირკვა. გუშინ მირზა სუბელიანმა ჩვენთან არასწორი ინფორმაცია გააჟღერა. რეალურად ცრუ ჩვენება მოგვცა იმასთან დაკავშირებით, რომ ის მიხეილ შაყულაშვილს არ შეხვედრია, რომელმაც დღეს შეხვედრის დეტალები მოყვა. აქედან გამომდინარე, ეს დამატებით კითხვებს აღგვიძრავს. “,- განაცხადა სერგი კაპანაძემ.

კაპანაძის განცხადებით, თუ საგამოძიებო უწყებაში იცოდნენ, რომ მირზა სუბელიანი პირველ დეკემბერს პროკურატურის მაღალჩინოსნებთან დაკავშირებას ცდილობდა, რატომ არ დაკითხეს.

"ასევე კითხვის ნიშნები არსებობს იმასთან დაკავშირებით, რომ ექსპერტიზის კონკრეტული დასკვნა შეიძლება პროკურატურისთვის გამოსადეგი ყოფილიყო და მათ ეს დასკვნა არ მოითხოვეს. ამიტომ, მარტივად, რომ შევაჯამოთ, კიდევ უფრო მეტი კითხვა გვაქვს და ამ კითხვებს, ისევე როგორც სხვა დამატებით კითხვებს, პროკურატურის დარჩენილ მაღალჩინოსნებსაც დავუსვამთ”,- განაცხადა სერგი კაპანაძემ.

მოზარდების მკვლელობის საქმეზე კიდევ ერთი მოზარდი ცრუ ჩვენების მიცემის ბრალდებით 19 ივლისს დააკავეს. დაკავებულ არასრულწლოვანს ბრალი 20 ივლისს წარედგინა.

დღეის მდგომარეობით, კომისიამ საქმეზე ორი რეკომენდაცია გასცა. 

საგამოძიებო კომისიის პარალელურად, გამოძიებას ხელახლა აწარმოებს შინაგან საქმეთა სამინისტრო. 

ხორავას ქუჩაზე ორი არასრულწლოვანი დავით სარალიძე და ლევან დადუნაშვილი 2017 წლის 1 დეკემბერს დაჭრეს. ერთი მოზარდი საავადმყოფოში მიყვანამდე გარდაიცვალა. მეორე - მრავლობითი დაზიანებებით საავადმყოფოში მოთავსებიდან მეორე დღეს, 2 დეკემბერს გარდაიცვალა.