სამოქალაქო ავიაციის სააგენტო ბათუმში მომხდარი ინციდენტის მიზეზებს განმარტავს

სამოქალაქო ავიაციის სააგენტო ბათუმში დღეს მომხდარ ინციდენტს, რა დროსაც მეწარმემ, დელტაპლანით მისი ფრენის აკრძალვის გამო, ხელი ხეზე მიიჭედა, სპეციალური განცხადებით ეხმაურებაა და აცხადებს, რომ მას არარეგისტრირებული მოტოდელტაპლანები აქვს, რაც ადამიანის სიცოცხლეს და ჯანმრთელობას უქმნმის საფრთხეს.

„მოტოდელტაპლანების ოპერატორების საყურადღებოდ 10 ივლისს გაკეთებულ უსაფრთხოების მითითებას ზოგიერთი ოპერატორის მხრიდან გაღიზიანება მოყვა. ერთ-ერთმა მათგანმა, სამწუხაროდ, პროტესტის მძიმე ფორმას მიმართა, რამაც შესაძლოა, საზოგადოების გარკვეულ წრეებში მოტოდელტაპლანების უკონტროლო გადაადგილების მიმართ მცდარი შეხედულება წარმოშვას.

სააგენტოს მითითების თანახმად, ოპერატორებს უმოკლეს ვადებში უნდა განეხორციელებინათ სატრანსპორტო საშუალებების რეგისტრაცია საქართველოს სამოქალაქო საჰაერო ხომალდების სახელმწიფო რეესტრში. გარდა ზემოაღნიშნული მითითებისა, ბოლო 2 წლის განმავლობაში, აღნიშნული სატრანსპორტო საშუალებების მფლობელებთან გაიმართა არაერთი შეხვედრა, სადაც არაერთხელ განემარტათ კანონმდებლობით გათვალისწინებული მოთხოვნები, გაეწიათ შესაბამისი კონსულტაცია და მიეცათ გაფრთხილება კანონის მოთხოვნების დაცვის შესახებ. სამოქალაქო საჰაერო ხომალდების სახელმწიფო რეესტრში მოტოდელტაპლანების რეგისტრაციის მოთხოვნის აუცილებლობა გამოიწვია იმ გარემოებამ, რომ აჭარის რეგიონის სანაპირო ზოლში ფუნქციონიერებენ არარეგისტრირებული მოტოდელტაპლანები, რომლებიც რისკის ქვეშ აყენებენ ფრენების უსაფრთხოებას და საფრთხეს უქმნიან ადამიანების სიცოცხლეს და ჯანმრთელობას.

მეტიც, როგორც სააგენტოს მიერ განხორციელებული მოკვლევიდან ირკვევა, აღნიშნული საჰაერო ხომალდები არ არის წარმოებული ქარხნულად, არის ხელნაკეთი (კუსტარულად დამზადებული) და შესაბამისად, მწარმოებელი ვერ უზრუნველყოფდა გაურკვეველ პირობებში და გაურკვეველი კომპონენტებით დამზადებული აპარატების ტექნიკური მდგომარეობის შეფასებას, ასევე უსაფრთხოების ნორმებთან მისი შესაბამისობის დადგენას“, - განმარტავენ სააგენტოში.

ბათუმელმა ვასიკო ტაკიძემ, პროტესტის ნიშნად, დღეს აჭარის მთავრობის სახლის წინ ხეზე ხელი ლურსმნით მიიჭედა. ტაკიძე ამბობს, რომ ბათუმის სანაპირო ზოლში დელტაპლანით ფრენა საჰაერო ნავიგაციამ აუკრძალა. ამ ბიზნეს ის სამი წელია აწარმოებს და ბანკიდან დიდ ოდენობით სესხი აქვს გამოტანილი.