დავით ჭიჭინაძე პარტიიდან გარიცხვას საკონსტიტუციოში გაასაჩივრებს

დავით ჭიჭინაძე პარტია "ქართული ოცნება - დემოკრატიული საქართველოდან" გარიცხვას საკონსტიტუციო სასამართლოში გაასაჩივრებს. მისი განცხადებით, პარტიიდან გარიცხვით მისი კონსტიტუციური უფლება დაირღვა. დეპუტატი მმართველ გუნდს და პარლამენტის თავმჯდომარეს ირაკლი კობახიძეს შურისძიებასა და ანგარიშსწორებაში ადანაშაულებს.

ჭიჭინაძის განცხადებით, ის განსხვავებული აზრის გამო დაისაჯა, რაც მისი აზრით, არასწორი მიდგომაა. 

"პირველ რიგში, ჩემი როგორც მოქალაქის უფლება დაირღვა, როდესაც ჩემთან შეუთანხმებლად მიიღეს გადაწყვეტილება. ადამიანს სამსახურიდან რომ ათავისუფლებენ, მას იბარებენ და ეუბნებიან "თქვენ გათავისუფლებული ხართ", მიზეზს უხსნიან, ხელს აწერენ განცხადებას და მერე იმ ადამიანს შესაბამისად აქვს უფლება გაასაჩივროს ეს სასამართლოში", - თქვა დავით ჭიჭინაძემ.

ჭიჭინაძის განცხადებას უმრავლესობის წევრი და პარლამენტის ვიცესპიკერი გია ვოლსკი გამოეხმაურა. 

"არ მესმის რა დაჩემებაა, თუ ადამიანი ამბობს რომ არ მოსწონს, არ უნდა, და ამავე დროს იბრძვის იმისთვის, რომ პიროვნებებისთვის შეურაცხყოფის მიყენებამ ჩვეულებრივად ჩაიაროს, რა უნდა საერთოდ თვითონ უმრავლესობაში? მის დამოკიდებულებას ვერ ვიგებ? თუ არ უნდა გუნდში და მაინც ცდილობს ამ გუნდში იყოს, რისთვის - დისკრედიტაცია რომ მოახდინოს? ეს არის სწორედ მიზეზი რისთვისაც ის გაირიცხა პარტიდან", - განაცხადა გია ვოლსკი.

მისივე თქმით, სიცრუეა ჭიჭინაძის განცხადება იმის შესახებ, რომ ის პარტიიდან წინასწარი გაფრთხილების გარეშე გარიცხეს.

"არაერთხელ ჰქონია საუბარი უმრავლესობის ლიდერს. თუ ბიუროკარატიულად არ გავაფორმეთ, ეს არ ნიშნავს რომ არ ესაუბრნენ და არ აუხსნეს მდგომარეობის სირთულე. მას თუ ამ თემის გაგრძელება უნდა ეს მისი უფლებაა", - აღნიშნა ვოლსკიმ.

დავით ჭიჭინაძე მმართველი პარტიიდან 18 ივლისს გარიცხეს. უმრავლესობის წევრის გედევან ფოფხაძის თქმით, ეს გადაწყვეტილება არჩილ თალაკვაძემ და თამარ ჩუგოშვილმა მიიღეს.

როგორც „ქართულ ოცნებაში“ განმარტავენ, დავით ჭიჭინაძემ გააკეთა არაერთი საჯარო განცხადება, რომლითაც მან შეურაცხყოფა მიაყენა პოლიტიკური გუნდის წევრებს და ზიანი მიაყენა პარტიის იმიჯსა და ინტერესებს.

ამასთან, პარლამენტარმა ბოლო დღეების განმავლობაში რამდენიმე კრიტიკული განცხადება გააკეთა პარლამენტის თავმჯდომარის ირაკლი კობახიძის მიმართ. 

თავად დეპუტატი დავით ჭიჭინაძე მიიჩნევს, რომ მის მგავსად, ქართული ოცნებიდან ბევრს გარიცხავენ, რადგან პარტიის ხელმძღვანელობას დასჯის მექანიზმად ეს ფორმა მიაჩნია. იმავდროულად, მოგვიანებით მან, ტელეკომპანია „მაესტროს“ ეთერში განაცხადა, რომ მისი გარიცხვის შესახებ პარტიის სამდივნოს გადაწყვეტილებას „ქართული ოცნების“ პოლიტსაბჭოში გაასაჩივრებდა.