თორნიკე რიჟვაძე: „ველმონდში“ დასაქმებული პირები სამუშაოს და ხელფასს შეინარჩუნებენ

აჭარის მთავრობის თავმჯდომარემ, თორნიკე რიჟვაძემ სასტუმრო „ველმონდის“ საქმიანობის შეჩერებასთან დაკავშირებით მედიასთან ისაუბრა.

„უსაფრთხოების ნორმები არის უმთავრესი. შესაბამისად, აჭარის მთავრობა საგანგებო სიტუაციების მართვის სამსახურთან ერთად ჩართული იყო ამ პროცესში. კონკრეტული შეთანხმება მიღწეულია. სასტუმროში დასაქმეული პირები შეინარჩუნებენ სამუშაო ადგილს და ხელფასს. რაც შეეხება ხარვეზებს და დარღვევებს, რომლებიც უსაფრთხოების კუთხით ჰქონდა, კომპანიაში ამბობენ, რომ მას უახლოეს მომავალში გამოასწორებენ და შემდეგ უკვე დავსხდებით და დავილაპარაკებთ, თუ როგორ შეიძლება გაგრძელდეს აღნიშნული ბიზნესოპერატორის საქმიანობა“, - განაცხადა თორნიკე რიჟვაძემ.

რიჟვაძის თქმით, სტუმრების ნაწილი სასტუმროდან უკვე გაყვანილია.

სასტუმროს საქმიანობის შესაჩერებლად ვადა დღეს 18:00 საათზე ეწურება.

10 ივლისს სასტუმრო „ველმონდს“ საქმიანობის უფლება შეუჩერდა.

ბათუმში, სასტუმრო „ლეოგრანდში“ (იგივე „ველმონდი“) ხანძრის შედეგად დაღუპულია 11 ადამიანი, მათგან საქართველოს 10 და ირანის ერთი მოქალაქე. დაშავდა 21 ადამიანი, მათგან ერთი ისრაელის მოქალაქეა, 5 კი - თურქეთის. ხანძარი სასტუმროში 24 ნოემბერს, დაახლოებით 20:00 საათზე გაჩნდა.