ცნობილია, როდის განიხილავს სტრასბურგის სასამართლო ანწუხელიძის შვილების საჩივარს რუსეთის წინააღმდეგ

განხილვას ელოდება საქმე სახელწოდებით „ანა და ლევან ანწუხელიძეები რუსეთის წინააღმდეგ“, რომელიც ადამიანის უფლებათა ევროპულ სასამართლოში 2010 წლის 8 აპრილს ახალგაზრდა იურისტთა ასოციაციამ გაგზავნა. ანა და ლევანი ეროვნული გმირის, გიორგი ანწუხელიძის შვილები არიან. ინფორმაციას რადიო თავისუფლება ავრცელებს.

2008 წლის აგვისტოში, როცა გიორგი ანწუხელიძე ცხინვალში წამებით მოკლეს რუსმა და ოსმა სამხედროებმა, მისი უმცროსი შვილი, ანა, ჯერ დაბადებული არ იყო, ხოლო უფროსი შვილი, ლევანი, მხოლოდ 10 თვის იყო.

მიუხედავად იმისა, რომ სტრასბურგში საჩივრის გაგზავნიდან რვა წელი გავიდა, საიაში დარწმუნებული არიან, რომ 2008 წლის ომის გამო დაზარალებულ პირთა ინდივიდუალური საჩივრები აუცილებლად განიხილება და ეს მას შემდეგ მოხდება, რაც სტრასბურგის სასამართლო გადაწყვეტილებას გამოიტანს რუსეთის წინააღმდეგ საქართველოს მეორე სახელმწიფოთშორის დავასთან დაკავშირებით.​

როგორც საიას იურისტმა ნინო ჯომარჯიძემ თქვა, სტრასბურგის სასამართლო დადგენილი პრაქტიკით ხელმძღვანელობს და სახელმწიფოთშორის საჩივართან დაკავშირებით მიღებული გადაწყვეტილება დიდწილად განსაზღვრავს ინდივიდუალური საჩივრების განხილვის შედეგებს.

საქართველომ მეორე სახელმწიფოთშორისი საჩივარი სტრასბურგში 2008 წლის 11 აგვისტოს წარადგინა და, მთელი რიგი პროცედურების გავლის შემდეგ, სასამართლოს დიდი პალატა 23 მაისს გავიდა გადაწყვეტილების გამოსატანად. გადაწყვეტილების მომზადება კი, სავარაუდოდ, რამდენიმე თვეს მოითხოვს.

ახალგაზრდა იურისტთა ასოციაციას სტრასბურგში გაგზავნილი აქვს 53 ინდივიდუალური საჩივარი, 362 ადამიანის სახელით. ისინი ყველანი რუსეთის ფედერაციას უჩივიან, რადგან 2008 წელს სწორედ რუსეთის სამხედრო აგრესიის შედეგად დაზარალდნენ. მათ შორის არიან ეროვნული გმირის, გიორგი ანწუხელიძის, შვილები - ანა და ლევანი.

IV ქვეითი ბრიგადის 41-ე ბატალიონის სამხედრო მოსამსახურე, უმცროსი სერჟანტი გიორგი ანწუხელიძე 2008 წლის რუსეთ-საქართველოს ომის დროს გმირულად დაიღუპა. გიორგი ანწუხელიძე დაჯილდოებულია ვახტანგ გორგასლის I ხარისხის ორდენით, უწყებრივი მედლით „სამშობლოსათვის თავდადებული“, მინიჭებული აქვს ეროვნული გმირის წოდება, მის სახელს ატარებს სერჟანტთა აკადემია.

18 აგვისტო საქართველოს ეროვნული გმირის, გიორგი ანწუხელიძის დაბადების დღეა. მას 34 წელი შეუსრულდებოდა.