გორის საავადმყოფოში ობობის ნაკბენით მოწამლული პაციენტები მოათავსეს

გორის სამედიცინო კლინიკა „გორმედში“ ობობის ნაკბენით გამოწვეული ინტოქსიკაციით ორი პაციენტი მოათავსეს. მათ მუცლისა და კიდურების არეში ძლიერი ტკივილი აღენიშნებოდათ, ასევე გართულებული ჰქონდათ სუნთქვა. ერთი მათგანი მკურნალობის კურსს კლინიკაში ისევ აგრძელებს.

„რადიო თავისუფლების“ ინფრომაციით, სპეციალისტები ცდილობენ გაარკვიონ, რომელი სახეობის ობობამ დაკბინა მოქალაქეები.

ექიმები ვარაუდეობენ, რომ ეს არის შავი ქვრივი, იგივე ყარაყურთი, რომელიც ძალიან შხამიანია და ზოგჯერ მისი ნაკბენი ადამიანისთვის მომაკვდინებელია. გორის სამედიცინო კლინიკის ექიმი დავით ყაზაიშვილი ამბობს, რომ ასეთ დროს სპეციპიკური მკურნალობის კურსი არ არსებობს და მკურნალობა სიმპტომების მიხედვით მიმდინარეობს.

სპეციალისტთა ნაწილის აზრით, ობობა ვერ იქნებოდა ყარაყურთი და, შესაძლოა, მხოლოდ მისი მსგავსი სახეობა იყო, მაგრამ გორის უნივერსიტეტის პროფესორი, ბიოლოგი გია ედიშერაშვილი მიიჩნევს, რომ კლინიკური ნიშნების მიხედვით სწორედ შავი ქვრივი უნდა ყოფილიყო, რომლის პოპულაციის არეალად შიდა ქართლიც ითვლება.

გორის სამედიცინო კლინიკაში ამბობენ, რომ აქამდე ობობის მიერ დაკბენილ პაციანტთა მიმართვა არ დაფიქსირებულა.