სადაზღვევო კომპანიები მთავრობას ახალი ინიციატივით მიმართავენ

კერძო სადაზღვევო კომპანიები საქართველოს ჯანდაცვის სამინისტროს მოუწოდებენ, საყოველთაო ჯანდაცვის პროგრამის ბენეფიციარებს მისცეს საშუალება, სახელმწიფოსთან ერთად, კერძო სადაზღვევო პოლისითაც ისარგებლონ, - განცხადება ამის შესახებ საქართველოს სადაზღვეო კომპანიების ასოციაციამ გააკეთა.

სადაზღვევო ასოციაცია და კერძო სადაზღვევო კომპანიების ხელმძღვანელები დადებითად აფასებენ  იაფი წამლებით უზრუნველყოფის პროგრამას. თუმცა, მათი აზრით, ეს საკმარისი არ არის, ამიტომ პირველ ეტაპზე კერძო სადაზღვევო ინდუსტრია მზად არის, შესთავაზოს საყოველთაო ჯანდაცვის პროგრამის ყველა ბენეფიციარს შემავსებელი/დაშენებული პროდუქტები, რომლებიც დააფინანსებს მედიკამენტებს; დააფინანსებს ამბულატორიულ მომსახურებას სრულყოფილად, მათ შორის მაღალტექნოლოგიურ კვლევებს (საყოველთაოთი იფარება მხოლოდ საბაზისო ამბულატორია და შეზღუდული დიაგნოსტიკა); დააფინანსებს ჰოსპიტალურ მომსახურებას სრულად – (საყოველთაო პროგრამა მხოლოდ ნაწილობრივ ფარავს ჰოსპიტალურ მომსახურებას); დააფინანსებს სტომატოლოგიას (რაც საერთოდ არ იფარება საყოველთაო პროგრამით).​

საქართველოს სადაზღვევო კომპანიათა ასოციაციის პრეზიდენტის თქმით, კერძო სადაზღვევო მექანიზმების ამოქმედების შემთხვევაში, ჯიბიდან გადახდა მედიკამენტებზე მკვეთრად დაიკლებს, რადგანაც კომპანიების ექსპერტების მხრიდან გაკონტროლდება ექიმის მიერ დანიშნული მედიკამენტების მიზნობრიობა და რაციონალურობა.

„მედიკამენტებზე დანახარჯის მნიშვნელოვანი წილი წამლის არარაციონალურმა მოხმარებამ გამოიწვია. ამის მიზეზი ნაწილობრივ თვითმკურნალობაა, თუმცა მთავარი მიზეზი ანგარებიანი ან არამიზნობრივი დანიშნულებებია, რომელიც ჯიბიდან გადახდის პირობებში უკონტროლოდ გაიცემა. დაფინანსების ინსტიტუციური სქემები იძლევა საშუალებას, გაკონტროლდეს ექიმის დანიშნულება“, – განაცხადა დევი ხეჩინაშვილმა.

სადაზღვევო ინდუსტრიის წარმომადგენლებს მიაჩნიათ, რომ კერძო სადაზღვევო ინდუსტრიის სტატისტიკით, წამალზე დანახარჯი ერთ დაზღვეულზე წელიწადში საშუალოდ 60-70 ლარს არ აღემატება, რაც ეროვნულ დანახარჯზე სამჯერ ნაკლებია. მათი თქმით, ეს უპირველეს ყოვლისა იმის შედეგია, რომ კონტროლდება დანიშნულებების შესაბამისობა გაიდლაინებთან, დანერგილია ხარჯთეფექტური სქემები. მაშინ, როდესაც საერთო ეროვნული მაჩვენებლით ერთ ადამიანზე წამლის ხარჯი – 240 ლარზე მეტია, ეს კი, კომპანიების წარმომადგენლების თქმით, ნიშნავს იმას, რომ კერძო სადაზღვევო სქემაში ჩართული ადამიანი არამხოლოდ ნაკლებს ხარჯავს, არამედ მედიკამენტებს გაცილებით უფრო სწორად და ეფექტიანად მოიხმარს.

ჯანდაცვის სამინისტრომ, მედიკამენტებზე ხელმისაწვდომობის გაზრდის მიზნით, სპეციალური პროგრამა 2017 წელს დაიწყო.