საინიციატივო ჯგუფი კანაფის დეკრიმინალიზაციასთან დაკავშირებით პარლამენტს მიმართავს

საქართველოს მოქალაქეთა საინიციატივო ჯგუფი საკონსტიტუციო ცვლილებებთან დაკავშირებით პარლამენტს მიმართავს. საუბარია ორ ცვლილებაზე. კერძოდ, ერთ-ერთი ცვლილება კონსტიტუციის მე-12 მუხლის ხელახლა ჩამოყალიბებას ეხება, ხოლო მეორე საკონსტიტუციო მართლმსაჯულების ორგანოების რეფორმას. ინფორმაციას 1tv ავრცელებს.

საინიციატივო ჯგუფის წევრების განცხადებით, უნდა მოხდეს საკონსტიტუციო სასამართლოს მიერ 2018 წლის 30 ივლისს მიღებული გადაწყვეტილების ნიველირება, რომლითაც მარიხუანას მოხმარების ლეგალიზაცია მოხდა.

საინიციატივო ჯგუფის წევრის კობა დავითაშვილის განცხადებით, საკონსტიტუციო სასამართლოს უფლებამოსილებები საერთო სასამართლოებს უნდა გადაეცეს.

„მიგვაჩნია, რომ საქართველოში სასამართლო არ არის დამოუკიდებელი, მათ შორის არც საკონსტიტუციო სასამართლო. უნდა გატარდეს რეფორმა და საკონსტიტუციო სასამართლოს უფლებამოსილებები უნდა გადაეცეს საერთო სასამართლოებს, რაც მოქალაქეთათვის საკონსტიტუციო მართლმსაჯულებას ხელმისაწვდომს გახდის. ადამიანი არ იქნება იძულებული, წავიდეს ბათუმში, რომ საკონსტიტუციო სამართალს მიაღწიოს. ჩვენ არ ვაპირებთ, მოვითმინოთ ისეთი ორგანოს არსებობა, რომელსაც გამოაქვს ერისთვის დამღუპველი გადაწყვეტილება, რომლის გადაწყვეტილების გასაჩივრება არც შეიძლება. საკონსტიტუციო სასამართლოს რომ უნდოდეს, თავის გადაწყვეტილებას ვერ გააუქმებს, ამის პროცედურა არ არსებობს“, – აცხადებს კობა დავითაშვილი.

საინიციატივო ჯგუფის ერთ-ერთი წარმომადგენლის ირმა ინაშვილის განცხადებით, საკითხს პარლამენტში ლობირებას „პატრიოტთა ალიანსი“ გაუწევს.

30 ივლისს საკონსტიტუციო სასამართლომ პარტია "გირჩის" წევრების სარჩელი დააკმაყოფილა და მარიხუანის მოხმარებისთვის ადმინისტრაციული სასჯელი გააუქმა. თუმცა არსებობს გარკვეული გამონაკლისები. თუ მოქალაქე კანაფს საზოგადოებრივი თავშეყრის ადგილებში, სასწავლო-სააღმზრდელო დაწესებულებებში მოწევს, ან მისი მოხმარება საფრთხეს შეუქმნის სხვა ადამიანს, მოქალაქე დაჯარიმდება.