ავთანდილ ხურციძის ოჯახი აქციებს აანონსებს

ამერიკაში დაკავებული სპორტსმენის ავთანდილ ხურციძის ოჯახი საპროტესტო აქციების დაწყებას აანონსებს. მშობლები შვილის უდანაშაულობაში დარწმუნებულები არიან და ფიქრობენ, რომ მისი დაპატიმრება დაგეგმილ თამაშს უკავშირდება, რადგან ხურციძე ამერიკაში ჩასვლიდან ერთ თვეში მსოფლიო ჩემპიონს უნდა შეხვედროდა. მის დაპატიმრებაში კი მეტოქის ინტერესებს ხედავენ.

მოკრივის დედა მაყვალა ხურციძე ციხეში მომხდარი ჩხუბის ამსახველი კადრების გადმოცემას ითხოვს და სასამართლოში გასაჩივრებას გეგმავს. ოჯახის წევრები ფიქრობენ, რომ ბოლოს საპატიმროში მომხდარი ჩხუბიც სასჯელის გასამკაცრებლად დაგეგმილი პროვოკაცია იყო.

ავთანდილ ხურციძეს ნიუ იორკის სასამართლომ 10 წლით პატიმრობა მიუსაჯა.

დღეს ნიუ იორკის სამხრეთ ოლქის პროკურატურამ ქართველი სპორტსმენის ავთანდილ ხურციძისთვის პატიმრობის შეფარდების შესახებ ოფიციალურ ინფორმაცია გაავრცელა.

„მსოფლიოში ჩვენი კოლეგა სამართალდამცავი ორგანოების წყალობით, ხურციძის მიერ გამოძალვა და ძალადობრივი ქმედებების ბატონობა დასრულდა, რადგან მას ახლა 10 წლით პატიმრობა აქვს მისჯილი და ამ პერიოდის გატარება ფედერალურ ციხეში მოუწევს“, – აცხადებს მანჰეტენის პროკურორი ჯეფრი ბერმანი.

პროკურორის კომენტარი ამერიკის იუსტიციის დეპარტამენტის ოფიციალურ ვებგვერდზეა გამოქვეყნებული.

გასულ კვირას აშშ-ში, ბრუკლინის ციხეში მსოფლიოს ყოფილი ჩემპიონი კრივში ავთანდილ ხურციძე და ე.წ. კანონიერი ქურდი რაჟდენ შულაია დაჭრეს. 

ქართველი სპორტსმენები ლევან მაყაშვილი და ავთანდილ ხურციძე, აშშ-ში საქართველოს სხვა მოქალაქეებთან ერთად, ე.წ. ქურდულ სამყაროსთან კავშირის, თაღლითობის მომზადებისა და რეკეტში მონაწილეობის ბრალდებით გასული წლის 8 ივნისს დააკავეს. 

ავთანდილ ხურციძეს სასამართლომ ორთვიანი წინასწარი პატიმრობა შეუფარდა.ლევან მაყაშვილი 13 ივნისს, ერთი პირის თავდებობისა და გირაოს სანაცვლოდ გაათავისუფლეს.