ზურაბ ჯაფარიძე კანაფის რეგულირებაზე მთავრობის კანონპროექტის ხარვეზებს ასახელებს

„გირჩის“ ლიდერი ზურაბ ჯაფარიძე კანაფის რეგულირებაზე მთავრობის კანონპროექტის ხარვეზებს ასახელებს. ამის შესახებ ის სოციალურ ქსელში წერს.

ჯაფარიძის აზრით, მთავრობის საკანონმდებლო ინიციატივა არათუ აუმჯობესებს, არამედ აუარესებს არსებულ რეალობას, რადგან კრძალავს ქვეყნის ბაზარზე ისეთ პროდუქტებს, რომლებიც დღეს თავისუფლად იყიდება. ჯაფარიძის თქმით, ამ დოკუმენტის თანახმად მთავრობის მოლოდინი გრანდიოზულ საბიუჯეტო შემოსავლებზე, ფუჭია.

"კანაფის რეგულირებაზე მთავრობის კანონპროექტების პაკეტის შინაარსი ვისაც გაინტერესებთ (მოკლედ არ გამოვა. ყველა სისულელის ამოკრეფა დამეზარა):

დასაშვები იქნება მხოლოდ სამედიცინო და სამრეწველო მიზნებისთვის მოყვანა, გადამუშავება, გადაზიდვა, პროდუქციის წარმოება, ექსპორტი, თესლის/ნერგის იმპორტი

სამრეწველოში იგულისხმება მხოლოდ პარფიუმერულ-კოსმეტიკურ მიზნები (ანუ, თოკის გასაკეთებლად, ტანისამოსის ან იალქნების შესაკერად, ან უბრალოდ მერქნისთვის მოყვანა და ა.შ. იკრძალება :))

რეალიზაცია - მხოლოდ ექსპორტი (ანუ, უცხო ქვეყნებს ვკურნავთ და ვალამაზებთ, მაგრამ ჩვენთვის არ შეიძლება :))

სოფლის მეურნეობის სამინისტროში იქმნება კანაფის კონტროლის სააგენტო, რომელმაც უნდა აკონტროლოს ყველაფერი

ლიცენზიები ცალ-ცალკე გაიცემა:

ა) სამედიციონოს - მოყვანაზე, გადამუშავებაზე, გადაზიდვაზე, პროდუქცის წარმოებაზე, ექსპორტზე, თესლის/ნერგის იმპორტზე

ბ) სამრეწველოს - მოყვანაზე, გადამუშავებაზე, გადაზიდვაზე, პროდუქცის წარმოებაზე, ექსპორტზე, თესლის/ნერგის იმპორტზე

მოყვანის ლიცენზია თუ გაქვს, გადამუშავება და ექსპორტი გეკრძალება (აზრი? ვერტიკალურ ინტეგრაციას ებრძვიან საფუძველშივე :))

გადამუშავების ლიცენზია თუ გაქვს, პროდუქტის წარმოება გეკრძალება (იგივე :))

გადაზიდვის ლიცენზია თუ გაქვს, სხვა ყველაფერი გეკრძალება (აი, მარტო გადაზიდვა რატომ უნდა გინდოდეს? :))

საქართველოს ტერიტორიაზე იკრძალება როგორც სამედიცინო ისე პარფიუმერულ-კოსმეტიკური ნაწარმის რეალიზაცია (ანუ, ახლა რაც იყიდება ბევრ ადგილას, იმასაც კრძალავენ :))

მთავრობა დადგენილებით განსაზღვრავს დათესვა-კულტივირების და წარმოების შიდა კვოტებს, დასაშვებ ტერიტორიებს და მათი შერჩევის კრიტერიუმებს (ანუ, მაგარი ჯიში რომ გააძრო, თუშეთში დათესო და 200 ტონა ზეთის მყიდველი გყავდეს ანტვერპენში, შეიძლება მთავრობამ გითხრას ეგ ჯიში არ მოსულა, თუშეთში არ მოსულა ან 200 ტონა არ მოსულაო :))

კულტივაციისთვის დასაშვებ ჯიშებს განსაზღვრავს მთავრობა (ალბათ დანერგე მომავლის ფარგლებში :))

კვოტაზე მეტი თუ მოიყვანე, ვალდებული ხარ ნამატი გადასცეს უსასყიდლოდ სააგენტოს, განადგურების მიზნით (რატომ უნდა გაანადგურო მცენარე რომელშიც ნარკოტიკული ნივთიერება საერთოდ არ არის? :))

ლიცენზიები გაიცემა 5 წლით (5 წლის მერე კვალიფიკაცია გიქვეითდება ალბათ)

ლიცენზია შეიძლება აიღოს მხოლოდ შპს-მ ან სს-მ (ფიზიკურ პირს ეკრძალება. მერე იტყვიან გლეხი კაცისთვის არავინააო :))

ლიცენზია გაიცემა ან აუქციონის წესით ან პირდაპირ მთავრობის მიერ (ტრადიციულად ხვრელს იტოვებენ ახლობლებისთვის)

იმავე პაკეტში, სალიცენზიო და სანებართვო მოსაკრებლების შესახებ კანონში წერია რომ თითოეული ლიცენზია ღირს 25,000 (ანუ, გაუგებარია, აუქციონია ლიცენზიაზე თუ ფიქსირებული ფასი?)

21 წლამდე ადამიანის ჩართვა ამ ბიზნესში იკრძალება - ისჯება 3-დან 7 წლამდე (რატომ უნდა აუკრძალო ახალგაზრდებს დასაქმება ამ სფეროში? მითუმეტეს რომ ამ მცენარეებში THC არ არის. კიტრის მოყვანაში ახალგაზრდების ჩართვა მოსულა? btw, ახალგაზრდებში უმუშევრობა 2-3-ჯერ მაღალია)

კულტივაცია, გადამუშავება, პროდუქციის შენახვა დასაშვებია მხოლოდ დახურულ შენობაში, შუქხმოვანი სიგნალიზაციით, სადღეღამისო დაცვით და ვიდეომეთვალყურეობის სისტემით როგორც შიდა ისე გარე პერიმეტრზე. პლიუს, ამ შენობებში შესვლა-გამოსვლა მკაცრად რეგულირებულია (პირადობა, ელ. ჟურნალი, საშვები, ჩანაწერები უნდა შეინახონ მინ 2 წელი და ათასი ბოდვა) (კანონის ავტორები აშკარად ვერ არჩევენ სამედიცინო კანაფის სათბურს და ატომურ ელექტრო-სადგურს)

კანაფის გადამუშავების წესი განისაზღვრება მთავრობის დადგენილებით (მთავრობამ საიდან იცის? ან საიდან იცის კერძო მწარმოებელზე უკეთესად?)

გადაზიდვა დასაშვებია მხოლოდ დაცვის თანხლებით (აი, კანაფის ზეთი და მაზები რომ მიგაქვს აეროპორტში, საექსპორტოდ, და ავტომატიანი რობოკოპები რომ გაცილებენ :))

გადაზიდვის უსაფრთხოების წესებს ადგენს მთავრობა (ჰო, კანაფის მაზი და ზეთი ფეთქებად-საშიშია ორივე) :))

სხვა ტვირთთან ერთად გადაზიდვა აკრძალულია (რატომ? შეერევა და დაწამლავს? :))

გადაგზავნა, მათ შორის ფოსტით, აკრძალულია (amazon-დან იწერს ხალხი CBD-ს შემცველ ზეთს. არაო, საშიშიაო :))

კანაფის სურნელის ჰაერში გავრცელება იკრძალება (არ ვაზვიადებ. ეგრე წერია. ამათ ჰგონიათ სამედიცინო კანაფის სათბურიდან მცენარის არომატმა თუ გაჟონა, შეიძლება არასრულწლოვნებს აბსტინენციის სინდრომი ჩამოუყალიბოს ეგრევე :))

სალიცენზიო პირობების დარღვევა - 50,000-დან 100,000 ლარამდე

მოკლე შინაარსი ესაა

რომ შევაჯამო:

საკონსტიტუციო სასამართლომ თქვა, რომ THC-ს ორგანიზმში შეშვება დასაშვებია. ეს კანონი ეხება მხოლოდ THC-ს არშემცველ მცენარეს. ანუ, ამ კანონს საკონსტიტუციოს გადაწყვეტილებასთან საერთო არაფერი აქვს. პირადი მოხმარების მიზნით ვერც მოგყავს და ვერც ყიდულობ.

სრულიად გაუგებარია რა გრანდიოზულ საბიუჯეტო შემოსავლებზე საუბრობს მთავრობა. ამ კანონპროექტიდან რაც ჩანს, ბიუჯეტში შევა მხოლოდ საშემოსავლო და მოგების გადასახადები, რაც ვერ გავა დიდ მაჩვენებლებზე, მითუმეტეს რომ მარტო სამედიცინო კანაფზეა საუბარი. იმედი მაქვს ექსპორტის დაბეგვრას არ დაიწყებენ აქციზით,"- წერს ჯაფარიძე.

კანონპროექტი პარლამენტში 14 სექტემბერს დარეგისტრირდა. ახალმა ამბავმა საზოგადოებაში აზრთა სხვადასხვაობა გამოიწვია. შსს-ს ცნობით, მთავრობის მიერ მარიხუანასთან დაკავშირებით ინიცირებული საკანონმდებლო ცვლილებები ითვალისწინებს ქვეყანაში მარიხუანის გასაღების მკაცრ შეზღუდვას.

30 ივლისს საკონსტიტუციო სასამართლომ პარტია „გირჩის“ წევრების სარჩელი დააკმაყოფილა, რითაც კანაფის მოხმარებისთვის ადმინისტრაციული სასჯელი გააუქმა.საკონსტიტუციო სასამართლომ კანაფის მოხმარებაზე სისხლის სამართლის პასუხისმგებლობა 2017 წლის 30 ნოემბერს გააუქმა.

იმავდროულად საკონსტიტუციო სასამართლოს გადაწყვეტილების ფონზე შსს-მ კანაფის მავნე ზეგავლენის წინააღმდეგ ახალი რეგულაციები მოამზადა.

ასევე ცნობილია, რომ გარემოს დაცვისა და სოფლის მეურნეობის სამინისტროს დაქვემდებარებაში კანაფის კონტროლის სააგენტო შეიქმნება.