გიორგი კვირიკაშვილი: პოლიტიკაში აღარ ვარ და პოლიტიკურ საკითხებზე კომენტარებს აღარ ვაკეთებ

ყოფილი პრემიერ-მინისტრი სასტუმრო „თბილისი მარიოტში“ საქართველოში საფრანგეთის საელჩოს ორგანიზებულ მიღებას დაესწრო. მიღებაზე ჟურნალისტებმა მას რამდენიმე შეკითხვა დაუსვეს, მათ შორის დიმიტრი ქუმსიშვილისა და ზურაბ ალავიძის შესახებ. თუმცა ყოფილმა პრემიერმა პასუხის გაცემა არ ისურვა. ინფორმაციას 1tv ავრცელებს.

პოლიტიკაში აღარ ვარ და პოლიტიკურ საკითხებზე კომენტარებს აღარ ვაკეთებ, – უპასუხა ჟურნალისტებს ყოფილმა პრემიერმინისტრმა, გიორგი კვირიკაშვილმა.

„თბილისი მარიოტში“ მიღება კონფერენციასთან დაკავშირებით გაიმართა, რომელიც საქართველოს, საფრანგეთისა და გერმანიის წარმომადგენელთა ორგანიზებით 17-19 სექტემბერს ტარდება.

გიორგი კვირიკაშვილი პრემიერმინისტრის თანამდებობიდან 13 ივნისს გადადგა და მიზეზად პარტიის თავმჯდომარე ბიძინა ივანიშვილთან ფუნდამენტურ საკითხებზე უთანხმოება დაასახელა.

საქართველოს პროკურატურაში ყოფილი მინისტრების, დიმიტრი ქუმსიშვილისა და ზურაბ ალავიძის საქმიანობაზე გამოძიება მიმდინარეობს. 

დიმიტრი ქუმსიშვილი საქართველოს მთავრობაში 2012 წლის ბოლოს, საპარლამენტო არჩევნებში საარჩევნო ბლოკის „ქართული ოცნება“ გამარჯვების შემდეგ მივიდა და ეკონომიკის მინისტრად დაინიშნა. მანამდე ის ძირითადად საბანკო სექტორში მუშაობდა, მათ შორის 1997-2011 წლებში „ბანკი ქართუს“ ჯერ ხაზინის უფროსად, შემდეგ კი გენერალური დირექტორის პირველ მოადგილედ. ეკონომიკის მინისტრი ქუმსიშვილი 2015 წელს ვიცეპრემიერიც გახდა. 2016 წელს ის ფინანსთა მინისტრად დაინიშნა და პირველი ვიცეპრემიერის თანამდებობაც შეინარჩუნა, ხოლო 2017 წელს კვლავ ეკონომიკის და მდგრადი განვითარების მინისტრის პოზიციაზე დაბრუნდა და ეს თანამდებობა პრემიერმინისტრ გიორგი კვირიკაშვილის გადადგომის შემდეგ დატოვა. მალევე ცნობილი გახდა, რომ ახალი პრემიერის მამუკა ბახტაძის დროებით სამთავრობო გუნდში მისი კანდიდატურა აღარ მოიაზრებოდა.

რაც შეეხება რეგიონული განვითარებისა და ინფრასტრუქტურის ყოფილ მინისტრს ზურაბ ალავიძეს, ის ამ თანამდებობაზე 2016 წლის ნოემბერში დაინიშნა. მანამდე ალავიძე მთავრობის ადმინისტრაციაში მუშაობდა. მან თანამდებობა 2018 წლის 30 მარტს დატოვა, მის ადგილზე მაია ცქიტიშვილი დაინიშნა. ცქტიშვილმა მინისტრის პორტფელი მამუკა ბახტაძის ახალ, მცირე მთავრობაშიც შეინარჩუნა. ამასთან, მაია ცქიტიშვილი 17 ივლისს ვიცეპრემიერად დაინიშნა.