იმნაძე: ვაქცინაცია საქართველოში სრულიად უსაფრთხო და ყველასთვის უფასოა

დაავადებათა კონტროლისა და საზოგადოებრივი ჯანმრთელობის ეროვნული ცენტრის სამეცნიერო ხელმძღვანელი პაატა იმნაძე განმარტავს, რომ ვაქცინაცია საქართველოში სრულიად უსაფრთხო და ყველა სოციალური ფენისთვის უფასოა. ინფორმაციას სააგენტო "ინტერპრესნიუსი" ავრცელებს.

როგორც იმნაძე აცხადებს, საქართველოში შემოსული ვაქცინები მაღალი ხარისხისაა და საფრთხეს არ შეიცავს.

„აბსოლუტური უმრავლესობა ამ ვაქცინებისა ევროკავშირის ქვეყნებში გამოიყენება. საქართველოში დღეს რაც გამოიყენება, ვაქცინების უმეტესობა არის ერთ ან ორდოზიანი დაფასოების. 90-იანი წლებიდან მოყოლებული არ ყოფილა შემთხვევა, რომ აცრის შემდგომ რაიმე ინფექცია შეხვდეს აცრილს. არასდროს ქართულ პოლიტიკაში ჩართულ ადამიანებს ამ საკითხებზე არ ჰქონიათ ორი სხვადასხვა შეხედულება. მთელი ეს წლები ისე გამოიარა საქართველომ, რომ არცერთ პოლიტიკურ ძალას არ გამოუყენებია ეს საკითხი, რადგან ყველა ხვდება, თუ რამდენად მნიშვნელოვანია საქართველოში იმუნიზაციის პრობლემები“, - განაცხადა იმნაძემ.

მისივე თქმით, აცრები სავალდებულო ხდება და ეს ჩანაწერი შესაბამის კანონში იქნება ასახული, თუმცა  ვალდებულების დარღვევა რაიმე სანქციას არ გამოიწვევს. როგორც იმნაძე აცხადებს, ჯანდაცვის კომიტეტი მუშაობს საკითხზე, რომ აცრების ჩანაწერის ნაწილში გაჩნდეს სიტყვა „სავალდებულო“.

სექტემბრის დასაწყისში ცნობილი გახდა, რომ ჯანდაცვის სამინისტროს მიერ შემუშავებული და დამტკიცებული პროფილაქტიკური აცრები შესაძლოა, სავალდებულო გახდეს.

ჯანდაცვის მსოფლიო ორგანიზაციის მონაცემებით, 2018 წლის პირველ 6 თვეში დაავადების 1000-ზე მეტი შემთხვევა გამოვლინდა. ამ მონაცემით საქართველო ევროპის იმ 7 ქვეყანას შორის, სადაც წელს წითელას შემთხვევები ყველაზე მეტად გაიზარდა, მესამე ადგილზეა.