„პალიტრამედიის“ ჰოლდინგის წარმომადგენელს გამოძიებასთან კითხვები აქვს

„პალიტრამედია“ ჰოლდინგში შემავალი კომპანია „კოლორპაკის“ დირექტორმა, გიორგი ჟორჟოლიანმა PALITRANEWS-ის გადაცემაში, სტამბაში პროკურატურის შესვლასა და პროექტში „აწარმოე საქართველოში“ სტამბის მონაწილეობის დეტალებზე ისაუბრა.

სტამბის დირექტორის თქმით, პროექტში „აწარმოე საქართველოში“ „კოლორპაკმა“ იგივე პირობებით მიიღო მონაწილეობა, როგორც სხვა ასობით კომპანიამ.

„აწარმოე საქართველოში“ ასობით კომპანიამ მიიღო მონაწილეობა, როგორც ჩვენ და ასეულობით კომპანია დაფინანსდა. ჩვენ აბსოლუტურად ერთნაირ პირობებში მივიღეთ მონაწილეობა. ასობით კომპანია გახდა ბენეფიციარი. მილიონ 600 ათასი დოლარი ავიღეთ კრედიტით „თიბისი ბანკიდან“.  ჩემი აზრით, ამ პროექტის უპირატესობა ზუსტად ის არის, რომ კორუფცია გამორიცხულია, როცა კერძო ბანკთან მიდის მოლაპარაკება. ის კრედიტი ახლაც გვაწევს კისერზე და ვიხდით“ “, - აღნიშნა გორგი ჟორჟოლიანმა.

მისივე თქმით, 2016 წლის ბოლოს დამთავრდა ეს პროგრამა.

„ყველაზე დიდი კითხვის ნიშანია, თუ მათ აინტერესებდათ „აწარმოე საქართველოში“ ჩვენი მონაწილეობა, შემდგომი მონაცემები რისთვის სჭირდებათ?! ლოგიკურად შეიძლება იყოს, სწავლობენ კომპანიის ფინანსურ მდგომარეობას, თუ რამდენად სწორად დაფინანსდა, მაგრამ ეს ბანკმა განსაზღვრა და ესეც არ არის სისხლის სამართლის თემა. 2016 წლის ბოლოს დამთავრდა ეს პროგრამა. თუ გვიპასუხებენ, რატომ ითხოვენ მონაცემებს 2018 წლამდე, მადლობელი დავრჩები“, - განაცხადა გიორგი ჟორჟოლიანმა.

პალიტრამედიის სტამბაში საგამოძიებო პროცესების დაწყებაზე კომენტარი გააკეთა პარლამენტის თავმჯდომარემ, ირაკლი კობახიძემ. მისი შეფასებით, პროცესები აბსოლიტურად გამჭირვალეა და კითხვებს პასუხები გაეცემა.

კითხვაზე, ხომ არ უკავშირდება ეს პროცესები ეკონომიკის ყოფილ მინისტრს, დიმიტრი ქუმსიშვილის საქმეს, კობახიძე ამბობს, რომ მას ამის შესახებ ინფორმაცია არ აქვს.

პალიტრამედიის სტამბაში მთავარი პროკურატურის გამომძიებლების შესვლაზე ინფორმაცია ჰოლდინგმა გაავრცელა.

ოფიციალური განცხადება გაავრცელა პროკურატურამ. უწყების ინფორმაციით, გამოძიება დაიწყო საქმეზე, რომელიც სახელმწიფო პროგრამა ,,აწარმოე საქართველოს“ ფარგლებში, ცალკეულ საჯარო მოხელეთა მიერ სამსახურებრივი მდგომარეობის გამოყენებით, სახელმწიფოს კუთვნილი დიდი ოდენობით თანხების შესაძლო გაფლანგვის ფაქტებს ეხება.

საქართველოს პროკურატურაში ყოფილი მაღალჩინოსნის, დიმიტრი ქუმსიშვილის საქმიანობაზე გამოძიება ივლისში დაიწყო.