გაეროში ტუბერკულოზისადმი მიძღვნილ სხდომაზე დავით სერგეენკო და ბილ გეიტსი სიტყვით გამოვიდნენ

გაეროს ასამბლეის 73-ე სესიის ფარგლებში, ტუბერკულოზის წინააღმდეგ ბრძოლისადმი მიძღვნილი სხდომის თავმჯდომარედ ჯანდაცვის მინისტრი დავით სერგეენკო აირჩიეს. სესიაზე, რომელსაც სერგეენკო უძღვებოდა, სიტყვით კომპანია Microsoft-ის დამფუძნებელი ბილ გეიტსი გამოვიდა. ინფორმაციას ჯანდაცვის სამინისტრო ავრცელებს.

სხდომაში მონაწილე 162 წარმომადგენელს შორის იყვნენ ჯანდაცვის მინისტრები, სხვადასხვა ორგანიზაციის წარმომადგენლები, რომლებმაც თავიანთი ქვეყნების გამოცდილება და გეგმები განიხილეს.

სესიაზე, სიტყვით გამოსვლისას დავით სერგეენკომ აქცენტი გააკეთა ტუბერკულოზთან ბრძოლის მნიშვნელობაზე:

"მართალია, ტუბერკულოზთან ბრძოლის მიმართულებით მნიშვნელოვანი ინოვაციები შეიქმნა, მათ შორის უფრო ზუსტი და სწრაფი დიაგანოსტიკის მეთოდები, ახალი თაობის მედიკამენტები, თუმცა მაინც არსებობს გამოწვევები განხორციელების პროცესში განსაკუთრებით მოწყვლად ჯგუფებთან და იმ მოსახლეობასთან, რომლებსაც სერვისებზე ნაკლები წვდომა აქვთ. აქედან გამომდინარე, გაჩნდა ვალდებულება, რომ უფრო გააქტიურდეს პროცესები და შემუშავდეს ანგარიშვალდებულების ჩარჩო. ვფიქრობ, საქართველოს გამოცდილება საჯარო და კერძო სექტორის პარტნიორობის მიმართულებით, წარმოადგენს ორი ძირითადი პროვაიდერის მჭიდრო კავშირის მოდელს, ტუბერკულოზის სამკურნალო სერვისების უკეთ მიწოდებისთვის”, – განაცხადა სერგეენკომ.

მისივე თქმით, საქართველო ახორციელებს ტუბერკულოზის, C ჰეპატიტის, აივ ინფექცია/შიდსის ინტეგრირებული სკრინინგის პროექტს.

„პროექტში მუნიციპალური ხელისუფლების ჩართულობა, პროვაიდერების წახალისება და პირველადი ჯანდაცვის სექტორთან თანამშრომლობა ხელს უწყობს მის ეფექტიან და მდგრად განხორციელებას. ტუბერკულოზთან ბრძოლა მოითხოვს მნიშვნელოვან პოლიტიკურ მხარდაჭერას და რესურსების მობილიზებას  ყველა სეგმენტსა და სექტორში, იქნება ეს ეროვნული, რეგიონული, თუ გლობალური. ეს არ იქნება მარტივი, თუმცა ვფიქრობ, ერთადერთი გზაა მივაღწიოთ სწრაფ პროგრესს ტუბერკულოზის საბოლოოდ დასამარცხებლად”, – განაცხადა ჯანდაცვის მინისტრმა, დავით სერგეენკომ.

დღეს დაგეგმილ პლენარულ სესიაზე დავით სერგეენკო არაგადამდები დაავადებების შესახებ გაერო-ში მოხსენებით კვლავ წარდგება.