რა მანევრების ჩაბარებაა სავალდებულო მართვის მოწმობის პრაქტიკულ გამოცდაზე

შინაგან საქმეთა სამინისტროს მომსახურების სააგენტოს ინფორმაციით, პრაქტიკულ გამოცდაზე დასაშვებად, ნებისმიერი კატეგორიის მართვის მოწმობის მსურველს უნდა ჰქონდეს ჩაბარებული თეორიული გამოცდა, რომლის ჩაბარებიდან 30 დღის განმავლობაში, კანდიდატს შეუძლია პრაქტიკულ ნაწილზე გასვლა 7 დღეში ერთხელ. შეზღუდვა არ ვრცელდება ფასიანი გასვლის შემთხვევებში.

გარდა მექანიკური გადაცემათა კოლოფის ავტომობილებისა, პრაქტიკული გამოცდის ჩაბარება შესაძლებელია ავტომატურ გადაცემათა კოლოფის ავტომობილზე. იმ შემთხვევაში თუ 30 დღის განმავლობაში ვერ მოხერხდა პრაქტიკული გამოცდის ჩაბარება, კანდიდატი თეორიულ გამოცდას აბარებს თავიდან. 

სააგენტოს ინფორმაციით, პრაქტიკული გამოცდის დაწყებამდე მძღოლობის ნებისმიერ კანდიდატს ენიჭება 100 ქულა, რომელსაც საკვალიფიკაციო მოთხოვნების შეუსრულებლობის ან არაჯეროვანი შესრულების შემთხვევაში, აკლდება საჯარიმო ქულები. პრაქტიკული გამოცდა წარმატებით ჩაბარებულად ჩაითვლება, თუ მძღოლობის კანდიდატი არ დააგროვებს 39-ზე მეტ საჯარიმო ქულას.

რაც შეეხება გამოცდაზე ჩასაბარებელ ელემენტებს, მომსახურების სააგენტო განმარტავს, რა მანევრების ჩაბარებაა სავალდებულო თოთოეული კატეგორიის მართვის მოწმობის ასაღებად.

კერძოდ, "A" კატეგორიის, აგრეთვე "A1 და B1" ქვეკატეგორიის სატრანსპორტო საშუალების მართვის უფლების მისაღებ პრაქტიკულ გამოცდაზე მძღოლობის კანდიდატი ვალდებულია ჩააბაროს შემდეგი ელემენტები:

რვიანი;

ზიგზაგი;

საგაბარიტო წრეში მობრუნება (მხოლოდ "A კატეგორიისა და A1" ქვეკატეგორიისათვის);

შეზღუდული სიგანის შემოსაბრუნებელი უბანი“ (მხოლოდ "B1" ქვეკატეგორიისათვის);

"B" კატეგორიის სატრანსპორტო საშუალების მართვის უფლების მისაღებ პრაქტიკულ გამოცდაზე მძღოლობის კანდიდატი ვალდებულია ჩააბაროს შემდეგი საკვალიფიკაციო მოთხოვნები:

პარალელური პარკირება;

ზიგზაგი;

შეზღუდული სიგანის შემოსაბრუნებელი უბანი(მოძრაობის მიმართულების შეცვლა):

უკუსვლით პარკირება“ (ბოქსში ავტომობილის უკუსვლით დაყენება);

რვიანი;

აღმართიანი უბანი“ („აღმართი“);

"BE, C, CE, D და DE" კატეგორიის, აგრეთვე "C1, C1E, D1 ან D1E"  ქვეკატეგორიის მართვის უფლების მისაღებ პრაქტიკულ გამოცდაზე მძღოლობის კანდიდატმა უნდა გაიაროს შემდეგი ელემენტები:

უკუსვლით პარკირება“;

აღმართიანი უბანი (აღმართი);

პლატფორმასთან უკუსვლით დაყენება;

ცნობისთვის, მართვის მოწმობის მისაღები თეორიული გამოცდის ტესტებს სატრანსპორტო საშუალების ეკო-მართვის 51 ტესტი დაემატა. ცვლილება ძალაში 2018 წლის 30 სექტემბრიდან შევა.