საია: მოქალაქე ნაზღაიძე სტიქიის შედეგად არ დაზარალებულა

"ახალგაზრდა იურისტთა ასოციაციამ" 2015 წლის 13 ივნისის სტიქიის დროს დაზარალებულად ცნობილი ზვიად ნაზღაიძისთვის კომპენსაციის გადაცემაზე კვლევა გამოაქვეყნა. საია-ს კვლევის თანახმად, მოსამართლე ნატა ნაზღაიძის ძმა, ზვიად ნაზღაიძე 2015 წლის 13-14 ივნისის სტიქიის დროს არ დაზარალებულა და მას 5001 კვ.მ. უძრავი ქონება უსაფუძვლოდ გადაეცა. არასამთავრობო ორგანიზაციაში ამბობენ, რომ ზვიად ნაზღაიძისათვის ქონების ჩამორთმევისა და პირდაპირი მიყიდვის ფორმით, სამართალდამცავი ორგანოები უნდა დაინტერესდნენ. მათივე თქმით, შესაძლოა მუნიციპალიტეტის საჯარო მოხელეების ბრალეულობის საკითხიც დადგეს.  

საიას კვლევის მიხედვით ირკვევა, რომ 2015 წლის 13-14 ივნისის სტიქიის დროს, ზვიად ნაზღაიძე არ იყო თბილისში ყიფშიძის 2-ში  არსებული 1641 კვ.მ. უძრავი ქონების მესაკუთრე. აქედან გამომდინარე, ის არ დაზარალებულა 2015 წლის 13-14 ივნისის სტიქიის დროს.

"თბილისის მუნიციპალიტეტმა, ზვიად ნაზღაიძისათვის, თბილისში, ყიფშიძის ქუჩა #2-ის მიმდებარედ არსებული 1641 კვ.მ. უძრავი ქონების ჩამორთმევის დროს უსაფუძვლოდ გამოიყენა - საზოგადოებრივი საჭიროებისათვის გადაუდებელი აუცილებლობისას საკუთრების ჩამორთმევის წესის შესახებ საქართველოს ორგანული კანონი; არცერთ სამართლებრივ აქტსა და ამ აქტებთან დაკავშირებულ ოფიციალური დოკუმენტებში არ არის დასაბუთებული, ზვიად ნაზღაიძისათვის ქონების ჩამორთმევისას - საზოგადოებრივი საჭიროება და/ან გადაუდებელი აუცილებლობის არსებობა." - ნათქვამის საიას კვლევაში. 

ამასთან, არასამთავრობო ორგანიზაციაში აცხადებენ, რომ ნაზღაიძეს, უსაფუძვლოდ გადაეცა, თბილისში, საბურთალოს საცხოვრებელ რაიონში, V კვარტალში, სანდრო ეულის ქუჩა 5-ში მდებარე 5001 კვ.მ. უძრავი ქონება. საიაში ვარაუდობენ, რომ თბილისის მუნიციპალიტეტსა და ზვიად ნაზღაიძეს შორის არსებობდა წინასწარი შეთანხმება, მუნიციპალიტეტის მიერ, ნაზღაიძის მხრიდან ქონების შეძენის შემთხვევაში, მუნიციპალიტეტის მხრიდან ქონების გარანტირებულად ჩამორთმევისა და საკომპენსაციოდ 971,260 ლარის (ნაწილობრივ უძრავი ქონების სახით) გადაცემის თაობაზე.

ოპოზიცია თბილისის მერიას მოსამართლე ნატა ნაზღაიძისთვის ქრთამის სახით მიწის ნაკვეთის გადაცემას ედავება. მათ აღნიშნულ საკითხთან დაკავშირებით დედაქალაქის მერი დავით ნარმანია საკრებულოში დაიბარეს, თუმცა, ნარმანიამ მისვლაზე უარი განაცხადა.

ნაზღაიძის საკითხთან დაკავშირებით სპეციალური განცხადება გაავრცელეს არასამთავრობო ორგანიზაციებმაც, რომლებმაც თქვეს, რომ ნატა ნაზღაიძის ოჯახს 1 მილიონი, სავარაუდოდ, ქრთამის სახით არ მიუღია. მოგვიანებით, ამ განცხადებას თბილისის მერია გამოეხმაურა.