ევროპარლამენტი აქებს საქართველოს რეფორმებისთვის და აკრიტიკებს მოლდოვას

მოლდოვაში დემოკრატიული სტანდარტებისა და კანონის უზენაესობის მხრივ მდგომარეობა გაუარესდა, მაშინ როცა საქართველო მტკიცედ ადგას რეფორმების გზას- ამის შესახებ ევროპარლამენტის საგარეო საქმეთა კომიტეტის წევრებმა განაცხადეს.

როგორც ევროპარლამენტის ვებგვერდზე გამოქვეყნებულ ინფორმაციაშია ნათქვამი კომიტეტის წევრებმა განიხილეს, თუ როგორ სრულდება ევროკავშირთან მოლდოვისა და საქართველოს მიერ დადებული ასოცირების ხელშეკრულებები, რომლებიც ძალაში ორი წლის წინ შევიდა და ყურადღება გაამახვილეს საკითხებზე, რომლის თაობაზეც ამ ქვეყნებს ევროკავშირთან დასაახლოებლად მეტი ძალისხმევა ესაჭიროებათ.

მოლდოვაზე მიღებულ რეზოლუციაში ნათქვამია, რომ ქვეყანამ რეფორმების გატარების ვალდებულება იკისრა და ეს მისი უმთავრესი პრიორიტეტი უნდა იყოს.

პარლამენტის წევრები შეშფოთებული არიან იმ უკუსვლით, რომელიც ქვეყანამ დემოკრატიული სტანდარტებისა და კანონის უზენაესობის თვალსაზრისით განიცადა. ქვეყანაში არ ტარდება სამართლიანი და გამჭვირვალე არჩევნები, არ არსებობს მიუკერძოებელი სასამართლო და არ მიიღება სათანადო ზომები კორუფციისა და ფულის გათეთრების წინააღმდეგ. მიუხედავად ამისა, ისინი დადებითად აფასებენ მათ, ვინც ძალისხმევას არ იშურებს საბანკო სექტორის რეფორმირებისათვის, რაც 2014 წელს 1 მილიარდი აშშ დოლარის ოდენობის მაქინაციების გამჟღავნების შემდეგ გახდა აუცილებელი.

ტექსტში ნათქვამია, რომ მოლდოვა ოლიგარქიული ინტერესების ტყვეობაშია. ეკონომიკური და პოლიტიკური ძალაუფლება ადამიანების იმ პატარა ჯგუფის ხელშია მოქცეული, რომელიც პარლამენტზე, მთავრობაზე, პოლიტიკურ პარტიებზე, სახელმწიფო ადმინისტრაციაზე, პოლიციაზე, სასამართლო სისტემასა და საინფორმაციო საშუალებებზე ახდენს გავლენას.

ევროპარლამენტის საგარეო საქმეთა კომიტეტის წევრები მოლდოვის ხელისუფლებას მოუწოდებენ, ამ პრობლემების მოგვარებაზე იზრუნონ და კიდევ ერთხელ აცხადებენ, რომ კიშინიოვს ევროკავშირის ფინანსურ დახმარებას 2019 წლის თებერვლის საპარლამენტო არჩევნების შემდგომ პერიოდამდე შეუჩერებენ, სანამ ისინი საერთაშორისო სტანდარტების შესაბამისად არ ჩატარდება და შესაბამისი საერთაშორისო ორგანიზაციების მიერ დადებითად არ შეფასდება და სანამ დემოკრატიული სტანდარტების დაცვაში მნიშვნელოვანი პროგრესი არ იქნება მიღწეული. ისინი დასძენენ, რომ ვიდრე ეს მოხდება, ეს დახმარება ძირითადად მოლდოვის სამოქალაქო საზოგადოებისა და დამოუკიდებელი საინფორმაციო საშუალებების მხარდაჭერისაკენ იქნება მიმართული.

„დასანანია, რომ დღეს იძულებული ვართ ვილაპარაკოთ მოლდოვაზე, როგორც სახელმწიფოზე, სადაც დემოკრატიისა და კანონის უზენაესობის ელემენტარულ ნორმებს ერთი მუჭა ხალხისაგან საფრთხე ემუქრება. არ სრულდება ასოცირების ხელშეკრულების უმთავრესი დებულებები. იმედს ვიტოვებ, რომ ეს მოხსენება  თუნდაც იმისათვისაა ძალიან აუცილებელი, რომ კიშინიოვის მთავრობა გამოაღვიძოს. ევროკავშირსა და მოლდოვას შორის ურთიერთობების მომავალი დიდად არის დამოკიდებული იმაზე, თუ როგორ ჩატარდება შემდეგი საპარლამენტო არჩევნები. პრობლემა ის კი არ არის, ვინ გაიმარჯვებს, არამედ, როგორ გაიმარჯვებს," განაცხადა პარლამენტის მომხსენებელმა მოლდოვის საკითხებზე პეტრას აუშტრევიჩუსმა (ლიბერალურ-დემოკრატიული ალიანსი ევროპისათვის, ლიეტუვა).

ევროპარლამენტის საგარეო საქმეთა კომიტეტის წევრები მიესალმებიან იმ ფაქტს, რომ საქართველო რეფორმების გზას მტკიცედ ადგას, რაც მას რეგიონში ევროკავშირის უმთავრეს პარტნიორად აქცევს. ისინი აღნიშნავენ, რომ ამჟამად ევროკავშირი საქართველოს უდიდესი სავაჭრო პარტნიორი და პირდაპირი უცხოური ინვესტიციების უმთავრესი წყაროა.

ევროპარლამენტის წევრები საქართველოს მთავრობას მოუწოდებენ კვლავაც უზრუნველყონ სტაბილურობა, განაგრძონ დემოკრატიული რეფორმები და საქართველოს მოსახლეობის ეკონომიკური და სოციალური მდგომარეობის გაუმჯობესებაზე ზრუნვა. ისინი ხაზგასმით აღნიშნავენ, რომ ელიტურ კორუფციასთან, სასამართლო სისტემის დამოუკიდებლობასთან და საინფორმაციო საშუალებების დეპოლიტიზებასთან დაკავშირებული პრობლემები კვლავაც შეშფოთების ძირითადი წყაროებია.

რეზოლუციაში ასევე სინანულითაა აღნიშნული, რომ 10 წელია რუსეთი საქართველოს ტერიტორიების უკანონო ოკუპაციას განაგრძობს. ევროპარლამენტის წევრები კიდევ ერთხელ ადასტურებენ საქართველოს სუვერენიტეტისა და ტერიტორიული მთლიანობის ურყევ მხარდაჭერას და ხაზგასმით აღნიშნავენ აღმოსავლეთ პარტნიორობის ხელშესახები სიკეთეებისა და მიზნების თაობაზე საქართველოს მოქალაქეების პროაქტიური ინფორმირების მნიშვნელობას.

ევროპარლამენტის წამყვანმა წევრმა საქართველოს საკითხებში ანდრეის მამიკინსმა (სოციალ-დემოკრატები, ლატვია) განაცხადა: „საქართველოს აქვს მკაფიოდ გამოხატული მისწრაფება გახდეს ევროპული ოჯახის წევრი და ამ ევროპულ დღის წესრიგზე პარტიებს შორის კონსენსუსია, რაც ძალიან მნიშვნელოვანია. ასოცირების ხელშეკრულება ისევე, როგორც მისი ღრმა და ყოვლისმომცველი თავისუფალი ვაჭრობის სივრცის კომპონენტი, კარგად ხორციელდება. თვალსაჩინოა ასევე უვიზო რეჟიმის პოზიტიური დინამიკა და, სხვა საკითხებთან ერთად, ევროკავშირსა და საქართველოს შორის დიალოგი უსაფრთხოების საკითხებზე.

მიუხედავად ამისა, საქართველოს კვლავაც აქვს რამდენიმე პრობლემა, რომლებზეც ყურადღება უნდა გამახვილდეს. მათ შორისაა შრომითი უფლებები, ეკონომიკური ემიგრაცია, ელიტური კორუფცია, სამართალდამცავების მიერ ძალაუფლების გადამეტება, გენდერული თანასწორობა და ბავშვთა უფლებების დაცვა. ევროკავშირისა და ევროპარლამენტის ჩართულობა და საქართველოს დახმარება ამბიციური რეფორმების გზაზე გაგრძელდება.“

9 ოქტომბერს ევროპარლამენტში საქართველოსთან დაკავშირებული ანგარიშის პროექტი დაამტკიცეს.

ანდრეს მამიკინსის ანგარიში საქართველოს შესახებ სექტემბრის დასაწყისში დებატების საგანი გახდა. ოპოზიციას ქვეყანაში არსებულ ვითარებაზე, ანგარიშის ავტორისგან განსხვავებული მოსაზრებები ჰქონდა. მოსაზრებების გასამყარებლად ისინი ბრიუსელში ჩავიდნენ. მმართველმა პარტიამ ეს ქვეყნის ინტერესების წინააღმდეგ გადადგმულ ნაბიჯად შეაფასა.

ანგარიშში, რომელიც ევროპარლამენტარმა ანდრეს მამიკინსმა მოამზადა, ნათქვამია, რომ ქვეყანამ მნიშვნელოვან პროგრესს მიაღწია, თუმცა საუბარია რეკომენდაციებზეც. 

ევროპარლამენტის პლენარულ სხდომაზე, დოკუმენტს კენჭი ნოემბერში უნდა უყარონ.

მოლდოვამ და საქართველომ ევროკავშირთან ასოცირების ხელშეკრულებებს ხელი 2014 წლის 27 ივნისს მოაწერეს, რამაც ეკონომიკური და პოლიტიკური კავშირების განმტკიცებას შეუწყო ხელი. ეს ხელშეკრულებები ძალაში 2016 წლის 1 ივლისს შევიდა.