ოპოზიცია პატარკაციშვილის საქმეს სხვა ჩანაწერების გადაფარვად აფასებს

პროკურატურამ ბადრი პატარკაციშვილის მკვლელობის მომზადების საქმე გახსნილად გამოაცხადა. დღეს საგამოძიებო უწყებამ ორი ჩანაწერი გაავრცელა, რომელიც 2007 წლით თარიღდება, თუმცა როგორც პროკურატურაში აცხადებენ ისინი 2016 წელს აღმოაჩინეს.

ოფიციალური ცნობით, ამ ჩანაწერებში კუდის ყოფილი მაღალჩინოსნები ფიგურირებენ და ისინი ბადრი პატარკაციშვილის მკვლელობაზე საუბრობენ. ჩანაწერის მონაწილეები არიან: ლევან  ქარდავა, რევაზ შიუკაშვილი, გიორგი მერებაშვილი და გიორგი დგებუაძე.  

ქარდავა და შიუკაშვილი პატარკაციშვილის მკვლელობის მომზადების ბრალს არ აღიარებენ.

გირჩის საპრეზიდენტო კანდიდატის ზურაბ ჯაფარიძე კი ფიქრობს, რომ ბადრი პატარკაციშვილის მკვლელობის საქმე მირზა სუბელიანისა და ზაზა ოქუაშვილის საქმეების გადასაფარადაა დღის წესრიგში დაყენებული.

„მეტი სხვა ახსნა ამას არ აქვს, რატომ გაახსენდათ ამდენი წლის შემდეგ პატარკაციშვილი, ჩემთვის გაუგებარია”,- აღნიშნა ზურაბ ჯაფარიძემ.

ოპოზიციონერი დეპუტატი სალომე სამადაშვილი მთავარი პროკურატურის მიერ ბადრი პატარკაციშვილის საქმის გახსნას უნიჭო პიარსვლად აფასებს. როგორც ჟურნალისტებს სამადაშვილმა განუცხადა, ჩანაწერები ათი წლის სიძველისაა, ქართული ოცნება კი, ქვეყანას ექვსი წელია მართავს.

“ქართული ოცნება იგივე მეთოდებით მუშაობს და არ გამიკვირდება, ხვალ მოვისმინო, რომ ილია ჭავჭავაძის მკვლელობა სხვისი ბრალია, ან სხვა აბსურდული განცხადება გაავრცელონ. ეს ყველაფერი უნიჭო, აბსურდული, ფუჭი მცდელობაა და ქართველი ხალხი ქართულ ოცნებას პასუხს 28 ოქტომბერს გასცემს. ხელისუფლება ქართველი ხალხის მოტყუებას უსინდისოდ ცდილობს”, - განაცხადა სამადაშვილმა.

პარლამენტის ადამიანის უფლებათა დაცვის კომიტეტის თავმჯდომარის სოფო კილაძის განცხადებით, როგორც იქნა ბადრი პატარკაციშვილის მკვლელობის მომზადების საქმე გაიხსნა. კომენტარი გააკეთა საპარლამენტო უმრავლესობის ლიდერმა არჩილ თალაკვაძემაც.

"პროკურატურის მიერ გავრცელებული ინფორმაცია კიდევ ერთხელ ადასტურებს, რა ხალხთან და რა პოლიტიკურ პარტიასთან გვაქვს საქმე. ისინი ოპონენტებს ასეთი გზით იშორებდნენ. ამ არჩევნებშიც, ჩონჩხებივით სკივრიდან ამოძვრნენ და ქვეყანას უკან ექაჩებიან," - განაცხადა არჩილ თალაკვაძემ.

მთავარი პროკურატურის განცხადებით, „ფარული კადრების ჩამწერი პირების საქმეზე“,  ერთ-ერთი ბრალდებულის საცხოვრებელ სახლში ჩატარებული ჩხრეკის დროს, იპოვეს შსს-ს აუდიოჩანაწერები, რომლებიც 2007 წლის 4 და 5 თებერვლით თარიღდება. ჩანაწერებში კუდის ყოფილი მაღალჩინოსნები ბადრი პატარკაციშვილის მკვლელობას გეგმავენ, მათ შორის ცდილობენ გადაიბირონ ბიზნესმენის დაცვის წევრი. ამასთან ჩანაწერებით ირკვევა, რომ პატარკაციშვილის ლიკვიდაცია მიხეილ სააკაშვილის მიერ იყო სანქცირებული. 

პროკურატურამ საქმეში არსებული აუდიოჩანაწერებიც გამოაქვეყნა.