მმართველი გუნდი ნაციონალებს დესტაბილიზაციის მცდელობაში ადანაშაულებს

მმართველ გუნდში აცხადებენ, რომ ნაციონალური მოძრაობა ქვეყანაში დესტაბილიზაციას ცდილობს. განცხადებებს ქართული ოცნების დეპუტატები აკეთებენ.

„მიმდინარე პროცესებს აშკარად ეტყობა „ნაციონალური მოძრაობის“ კვალი. მათი ხელწერაა ძალადობა, თუმცა ვერც ძალადობით და ვერც ნებით ისინი ვერ დაბრუნდებიან ხელისუფლებაში. ნებით იმიტომ, რომ ქართველი ამომრჩეველი მათ ხმას აღარ მისცემს, ხოლო ყველა ქმედების მიმართ, რომელიც კანონის ფარგლებიდან იქნება გასული შესაბამისი ზომები გატარდება”, – განაცხადა დავით მათიკაშვილმა.

პარლამენტის იურიდიული კომიტეტის ხელმძღვანელმა ეკა ბესელიამ განაცხადა, რომ  „ნაციონალური მოძრაობის“ მხრიდან საარჩევნო კამპანიის ბოლო ეტაპი პროვოკაციული სურვილით მიმდინარეობს, მათი მიზანია ქვეყანაში ქაოტურობის განცდა შექმნან.

ეკა ბესელიას შეფასებით, „ნაციონალური მოძრაობა“ არის პოლიტიკური ძალა, რომელსაც გამარჯვების არანაირი შესაძლებლობა არ აქვს და ფიქრობს, რომ საწადელს არეულობით მიაღწევს.

„ვხედავთ საარჩევნო კამპანიის ბოლო ეტაპი, ძალიან აშკარა ხელწერით, „ნაციონალური მოძრაობის“ მხრიდან მიმდინარეობს პროვოკაციული სურვილით და მათი სასურველი მიზნით, რომ ქვეყანაში რაღაც ქაოტურობის განცდა შექმნან. ეს არის პოლიტიკური ძალა, რომელსაც არანაირი შანსი არ აქვს გამარჯვების და ფიქრობს, რომ მხოლოდ არეულობით შეიძლება, საწადელს მიაღწიოს. რა თქმა უნდა, მე ვფიქრობ, რომ ეს მათ ინტერესებშია, მაგრამ ყველა ინსტიტუტი, ყველა უწყება, ყველა სამსახური, ჩვენ ყველა, ყველაფერს გავაკეთებთ, რომ მშვიდ გარემოში, რაც შეიძლება თავისუფალ გარემოში, პროვოკაციების თავიდან აცილების გზით, არჩევნების დღეს უზრუნველყოფილი იყოს თავისუფალი არჩევანი ყველა მოქალაქისთვის“, – განაცხადა ეკა ბესელიამ.

არ მგონია, რომ ქვეყანაში დესტაბილიზაციის საფრთხე არსებობდეს, – ამის შესახებ პოლიტიკური გაერთიანება „გირჩის“ საპრეზიდენტო კანდიდატმა ზურაბ ჯაფარიძემ განაცხადა. როგორც ზურაბ ჯაფარიძემ აღნიშნა, „ქართულ ოცნებასა“ და „ნაციონალურ მოძრაობას“ აწყობთ იმ ტიპის საარჩევნო კამპანია, რომელიც დღეს ქვეყანაში მიმდინარეობს.

„მე არ მგონია, რომ რაიმე დესტაბილიზაციის საფრთხე იყოს. ჩემი აზრით, „ქართულ ოცნებას“ და „ნაციონალურ მოძრაობას“ აწყობს ესეთი ტიპის კამპანია, როგორიც მათ აქვთ ახლა.„ქართული ოცნება“ საუბრობს, რომ ვიღაცა ცდილობს დესტაბილიზაციასა და ცხადია, გულისხმობს „ნაციონალურ მოძრაობას“. „ნაციონალური მოძრაობის“ შიგნით ცხადია, მართლა არიან ვიღაც ადამიანები, ვისაც წარმოუდგენიათ რაღაც რევოლუციის გზით ხელისუფლებაში დაბრუნება. რეალურად კი, არ მგონია, ახლა ეს საფრთხე არსებობდეს ქვეყანაში”, – განაცხადა ზურაბ ჯაფარიძემ.

მანამდე შინაგან საქმეთა მინისტრი გიორგი გახარია ტელეკომპანია "რუსთავი 2"-ის გენერალური დირექტორის ნიკა გვარამიას განცხადებას გამოეხმაურა, რომელშიც გვარამია ჩანაწერების გამოქვეყნებას აანონსებდა. გახარიას განცხადებით, მან არ იცის, რომელ ჩანაწერზე საუბრობს ნიკა გვარამია, თუმცა დეტალურად იცის ყველა ის გეგმა, რითაც ქვეყანაში დესტაბილიზაცია იგეგმებოდა.

„რუსთავი 2“-მა 17 ოქტომბერს გაავრცელა კიდევ ერთი ფარული აუდიოჩანაწერი, რომელშიც სავარაუდოდ, მირზა სუბელიანი ამბობს, რომ დაკავებამდე ორი დღით ადრე შეხვდა კახა კახიშვილს, პატიმრობის გარკვეული პირობების შექმნაზე შეთანხმდნენ და რადგან შეთანხმება დაირღვა, კახიშვილის წინააღმდეგ კომპრომატები აქვს და საჭიროების შემთხვევაში გამოაქვეყნებს. 

ნიკა გვარამიამ თქვა, რომ სახელმწიფო უსაფრთხოების სამსახური მისი და მიხეილ სააკაშვილის საუბრის ჩანაწერების გამოქვეყნებას აპირებს.