ტექნიკური ინსპექტირების 10 ცენტრს გამოძიების დასრულებამდე აკრედიტაცია შეუჩერდება

ეკონომიკის მინისტრის მოადგილე აკაკი საღირაშვილმა განაცხადა, რომ ავტოსატრანსპორტო საშუალებების ტექნიკური ინსპექტირების 10 ცენტრს გამოძიების დასრულებამდე აკრედიტაცია შეუჩერდება. მისი თქმით, არ არის გამორიცხული, რომ გამოძიების დასრულების შემდეგ, ტექინსპექტირების ცენტრებს ლიცენზიაც შეუჩერონ.

„ამ ეტაპზე, ჩვენ ვგეგმავთ შეჩერების მექანიზმი ათივე ცენტრის მიმართ ავამოქმედოთ, ხოლო გამოძიების შედეგებიდან გამომდინარე, არ გამოვრიცხავთ, რომ შემდგომ ეტაპზე, მათი ლიცენზიის გაუქმების საკითხი დავაყენოთ.

თავის დროზე, ყველას შევუწყვეთ ხელი, რომ მათი ცენტრები ტექნიკური რეგლამენტით გათვალისწინებულ ნორმებთან შესაბამისობაში მოეყვანათ. სამწუხაროდ, როგორც ჩანს, ყველა ცენტრმა არ დაიცვა კეთილსინდისიერი თამაშის წესები. ასეთი ცენტრების მიმართ ყოველთვის ვიქნებით მკაცრი და კანონის მოთხოვნათა შესაბამისად ვიმოქმედებთ“, – განაცხადა მინისტრის მოადგილემ.

ფინანსთა სამინისტროს საგამოძიებო სამსახურის ცნობით, მათ ავტოსატრანსპორტო საშუალებებზე ტექნიკური ინსპექტირების ყალბი ანგარიშების გაცემის ფაქტები გამოავლინეს.

გამოძიება მიმდინარეობს საქართველოს სისხლის სამართლის კოდექსის 362-ე მუხლის მეორე და 221-ე მუხლის მეოთხე ნაწილებით, რაც სასჯელის სახით ითვალისწინებს თავისუფლების აღკვეთას 4-დან 6 წლამდე.

2018 წლის პირველი ოქტომბრიდან საქართველოში ავტოსატრანსპორტო საშუალებების პერიოდული ტექნიკური ინსპექტირების მესამე ფაზა ამოქმედდება. ინსპექტირება სავალდებულო იქნება ყველა ავტომობილისთვის, რომლის ძრავის მოცულობა 3 000 კუბური სმ. ან მეტია.

ავტოსატრანსპორტო საშუალებების სავალდებულო ტექნიკური ინსპექტირება 2018 წლის 1 იანვრიდან დაიწყო და ეტაპობრივად მიმდინარეობს. 

ტექინსპექტირების გავლა საქართველოს მასშტაბით მოქმედ 32 აკრედიტებულ, პერიოდული ტექნიკური ინსპექტირების ცენტრშია შესაძლებელი. თემაზე ყველა საჭირო ინფორმაციის ნახვა კი შესაძლებელია ვებგვერდზე pti.ge. მოქმედებს ცხელი ხაზიც – 1484.